ސްރީލަންކާ ކައިރީގައި އުފެދިފައިވާ ތޫފާނުގެ ސީދާ އަސަރު ރާއްޖެއަށް ނުކުރާނެކަމަށް މޫސުމާ ބެހޭ ޤައުމީ އިދާރާ (މެޓް އޮފީސް) އިން ބުނެފި އެވެ.
ލަންކާ ކައިރީގައި އުފެދިފައިވާ ތޫފާނުގެ އަސަރު ސީދާ ރާއްޖެއަށް ނުކުރި ނަމަވެސް، މި ތޫފާނުގެ ސަބަބުން ރާއްޖޭގެ އެކި ހިސާބަށް ބޯކޮށް ވާރޭވެހި، ވައި ގަދަވާނެކަމަށް ލަފާކުރެވޭކަމަށް އެ އިދާރާއިން ވަނީ ހާމަކޮށްފަ އެވެ.
މެޓް އޮފީހުން ބުނި ގޮތުގައި، ލަންކާ ސަރަހައްދުގައި އުފެދިފައިވާ ތޫފާން ދަތުރު ކުރަމުންދަނީ އެ ޤައުމުގެ އައްސޭރި ފަށުން އުތުރަށްކަމަށާއި، މިސްރާބު ހުރީ އިންޑިއާގެ ޓެމިލްނާޑާ ދިމާއަށް ކަމަށެވެ. ތޫފާނުގެ މިސްރާބު ހުރީ ރާއްޖެއާ ދުރަށްކަމަށްވާތީ، ރާއްޖެއަށް ސީދާ އަސަރެއް ނުކުރާނެކަމަށް މޫސުމާ ބެހޭ ޤައުމީ އިދާރާއިން ބުނެ އެވެ.
ކުރިއަށް އޮތް 24 ގަޑިއިރު ތެރޭގައި ދެކުނާއި މެދުރާއްޖެތެރެއަށް ގުގުރުމާ އެކު ބޯކޮށް ވާރޭވެހޭނެ ކަމަށް ލަފާކުރެވޭކަމަށް މެޓު އޮފީހުން ބުނެފައިވެ އެވެ. މީގެ އިތުރުން، ވިލާގަނޑުގައި ގަޑިއަކު 40 މޭލަށް ވައި ގަދަވާނެކަމަށް ވެސް މެޓް އޮފީހުން ވަނީ ލަފާކޮށްފަ އެވެ. މިކަމުގެ ސަބަބުން ކަނޑުތައް ގަދަވެ، ދަތުރުފަތުރުގެ ދަތިކަން ކުރިމަތިވުމަކީ އެކަށީގެންވާ ކަމެކެވެ.
މި ތޫފާނުގެ ސަބަބުން ސްރީލަންކާއަށް ވަނީ ބޮޑެތި ގެއްލުންތަކެއް ލިބިފަ އެވެ. މީޑިއާތަކުން ރިޕޯޓުކޮށްފައިވާ ގޮތުގައި، ވިއްސާރައިގައި ފެން ބޮޑުވުމާއި ބިންގަނޑު ކަނޑައިގެން ދިއުމުގެ ޙާދިސާތަކުގައި މިހާތަނަށް މަރުވި މީހުންގެ އަދަދު 56 އަށް ވުރެ މައްޗަށް އަރާފައިވާއިރު، ގެއްލުނު މީހުންގެ އަދަދު 100 އަށް ވުރެ މައްޗެވެ. އަދި ނުރައްކާތެރި ސަރަހައްދުތަކުން އެތަށް ހާސް ބަޔަކު ރައްކާތެރި ސަރަހައްދުތަކަށް ބަދަލުކޮށްފައިވާކަމަށް ރިޕޯޓުތައް ބުނެ އެވެ.
