ސްރީ ލަންކާގައި މޫސުން ގޯސްވެ، ގުދުރަތީ ކާރިސާއެއްގެ ސަބަބުން ގިނަ ބަޔަކަށް ގެއްލުންވެ، ފުރާނަ ގެއްލިފައިވާތީ، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ލަންކާގެ ރައްޔިތުންނަށް ތައުޒިޔާ ފޮނުއްވައިފި އެވެ.

މި ހާދިސާއާ ގުޅިގެން ހިތާމަ ފާޅު ކުރައްވާ ފުރާނަ ގެއްލުނު ފަރާތްތަކުގެ އާއިލާތަކަށް ރައީސް މުއިއްޒު ތައުޒިޔާ ފޮނުއްވީ މިއަދު އެކްސްގައި ކުރެއްވި ޕޯސްޓެއްގަ އެވެ.

ރައީސް މުއިއްޒު އެކްސްގައި ކުރެއްވި ޕޯސްޓުގައި ވިދާޅުވެފައިވަނީ، ސްރީ ލަންކާއަށް ކުރިމަތިވި ގަދަ ވިއްސާރައާއި ގުދުރަތީ ކާރިސާގެ ސަބަބުން ފުރާނަ ގެއްލި، ގެއްލުންތަކާއި ހަލާކުތައް ލިބިފައިވާތީ ވަރަށް ބޮޑަށް ހިތާމަ ކުރައްވާ ކަމަށެވެ. އަދި މި ހިތާމަވެރި ދަނޑިވަޅުގައި ރާއްޖޭގެ ރައްޔިތުން ސްރީ ލަންކާއާ އެކު ތިބިކަމަށާއި މި ހާދިސާގައި ފުރާނަ ގެއްލުނު ފަރާތްތަކުގެ އާއިލާތަކަށް ތައުޒިޔާ ކިޔާ ކަމަށެވެ.

ސްރީ ލަންކާގެ މީޑިއާތަކުން ރިޕޯޓުކުރާ ގޮތުގައި، ހާލަތު ގޯސްވެ، ފެންބޮޑުވުމާއި ބިންގަނޑު ކަނޑައިގެން ދިއުމުގެ ސަބަބުން ގިނަ އަދަދެއްގެ މީހުން ވަނީ މަރުވެފަ އެވެ. އަދި އެތައް ހާސް ބަޔަކު ވަނީ ގެދޮރު ދޫކޮށް ދާން މަޖުބޫރުވެ، ބޮޑެތި ގެއްލުންތައް ލިބިފަ އެވެ. ބައެއް ރިޕޯޓްތައް ބުނާ ގޮތުން މި ހާދިސާގައި މިހާތަނަށް 56 މީހަކު ވަނީ މަރުވެފަ އެވެ.

ލަންކާގެ އިތުރުން މެލޭޝިއާ އާއި ތައިލެންޑާއި ސިންގަޕޫރުގައިވެސް ފެން ބޮޑުވުމުގެ ކާރިސާތަކެއް ވަނީ ކުރިމަތިވެފަ އެވެ. އެ ގައުމުތުން 183 މީހުންނަށް ވުރެ ގިނަ މީހުން ވަނީ މަރުވެފަ އެވެ.

ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރާއްޖެ - ލަންކާ ސްރީލަންކާ