ކައުންސިލަރުންގެ އަދަދު މަދުކުރުމަށް ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނަށް ހުށަހަޅާފައިވާ އިސްލާހު ރައްޔިތުންގެ މަޖިލީހުން ފާސްކޮށްފި އެވެ.

ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނަށް ސަރުކާރުގެ ފަރާތުން އިސްލާހު ހުށަހެޅުއްވީ އިނގުރައިދޫ ދާއިރާގެ މެންބަރު އިބްރާހީމް ފަލާހު އެވެ.

މި އިސްލާހު މަޖިލީހުން ފާސްކޮށްފައިވަނީ ވޯޓުގައި ބައިވެރިވި 54 މެންބަރުންގެ ވޯޓުންނެވެ. މި އިސްލާހު ފާސްކުރުމާ ދެކޮޅަށް 11 މެންބަރުން ވޯޓު ދެއްވާފައިވެ އެވެ.

މި އިސްލާހުގައި ބުނެފައިވަނީ، 2000 އަށްވުރެ މީހުން މަދު އާބާދީތަކަށް އިންތިޚާބުކުރާނީ 3 ކައުންސިލަރުން ކަމަށާއި އަދި 2000 އަށްވުރެ މީހުން ގިނަ އާބާދީތަކަށް އިންތިޚާބުކުރާނީ 5 ކައުންސިލުން ކަމަށެވެ. 3 ކައުންސިލަރުންގެ މައްޗަށް އެކުލެވޭ ކައުންސިލްތަކުގައި 1 އަންހެން ކައުންސިލަރެއް ހިމެނެންޖެހޭނެ ކަމަށާއި އަދި 5 ކައުންސިލަރުންގެ މައްޗަށް އެކުލެވޭ ކައުންސިލްތަކުގައި 2 އަންހެން ކައުންސިލަރުން ހިމެނެންޖެހޭނެ ކަމަށްވެސް ބަޔާންކޮށްފައިވެ އެވެ.

މީގެއިތުރުން އިދާރީ ދައިރާތަކުގައި ސަރުކާރުން ހިންގާ ތަރައްގީގެ މަޝްރޫއުތަކާއި ހަރަކާތްތައް ހިންގުމަށް ކައުންސިލްތަކުން ހޯދަންޖެހޭ ހުއްދަތައް ހޯދުމަށް ހުށަހަޅައި އެކަށީގެންވާ މުއްދަތެއްގެ ތެރޭގައި އެ ހުއްދައެއް ކައުންސިލުން ދީފައިނުވާނަމަ ލޯކަލް ގަވަމެންޓް އޮތޯރިޓީގެ ހުއްދައާއެކު އެ މަޝްރޫއެއް ނުވަތަ ހަރަކާތެއްގެ މަސައްކަތްތައް އިދާރީ ދާއިރާތަކުގައި ކުރިއަށް ގެންދިއުމުގެ އިޚްތިޔާރު ސަރުކާރަށް ލިބިގެންވާ ކަމަށްވެސް މިއަދު ފާސްކުރި އިސްލާހުގައި ބުނެފައިވެ އެވެ.

ސިޓީ ކައުންސިލްތައް އެކުލެވޭގޮތް ކަމަށް މި އިސްލާހުގައި ބުނެފައިވަނީ، ސިޓިއެއްގައި ރަޖިސްޓްރީ ކުރެވިފައިވާ އާބާދީ 10،000 މީހުންނާއި 25،000 މީހުންނާ ދެމެދުގައި ހުރިނަމަ މޭޔަރު ހިމެނޭގޮތަށް 7 ގޮނޑި، 25،000 މީހުންނާއި 50،000 މީހުންނާއި ދެމެދުގެ އަދަދެއްގައި ހުރިނަމަ މޭޔަރު ހިމެނޭގޮތަށް 11 ގޮނޑި އަދި 50،000 މީހުނަށްވުރެ އިތުރު އަދަދެއްނަމަ މޭޔަރު ހިމެނޭގޮތަށް 15 ގޮނޑި އެކުލެވޭގޮތަށެވެ.

މީގެއިތުރުން އެލްޖީއޭގެ މަސައްކަތްތައް ހަރުދަނާ ކުރުމާގުޅޭ އިސްލާހުތައްވެސް މީގެތެރޭގައި ހިމަނާފައިވެ އެވެ.

ރައްޔިތުންގެ މަޖިލިސް ލާމަރުކަޒީ ނިޒާމް ލޯކަލް ގަވަމެންޓް އޮތޯރިޓީ (އެލްޖީއޭ)