’ވީ ރަން މޯލްޑިވްސް‘ އިން އިންތިޒާމުކޮށްގެން ބާއްވާ ’ދަ ޝޯ ރަނިން ފެސްޓިވަލް 2025‘ ގެ އޮފިޝަލް ޑިޖިޓަލް ޕާޓްނަރަކަށް އުރީދޫ މޯލްޑިވްސް ހަމަޖައްސައިފި އެވެ.
މި ބޮޑު އިވެންޓް ބޭއްވުމަށް ހަމަޖެހިފައިވަނީ 2025 ވަނަ އަހަރުގެ ނޮވެމްބަރު މަހުގެ 28 ވަނަ ދުވަހު ހުޅުމާލޭގަ އެވެ.
އުރީދޫން ބުނި ގޮތުގައި މި ޕާޓްނަރޝިޕްގެ ސަބަބުން، ރާއްޖޭގެ އެކި ކަންކޮޅުތަކުގައި ސިއްޙީ އަދި ދުޅަހެޔޮކަމަށް ކުރާ މަސައްކަތްތަކަށް އެހީތެރިވުމާއި، ޑިޖިޓަލް ސޮލިއުޝަންތައް މެދުވެރިކޮށް މުޖުތަމައުތައް ބާރުވެރިކުރުވުމަށް އެ ކުންފުނިން ކުރަމުންދާ މަސައްކަތްތައް އިތުރަށް ހާމަވެގެންދާނެ އެވެ.
ޝޯ ރަނިން ފެސްޓިވަލް ފަރުމާކޮށްފައި ވަނީ ’ދަ ގްރޭޓެސްޓް ޝޯ‘ ގެ ތިއޭޓްރިކަލް އެނާޖީ އިން އިންސްޕިރޭޝަން ހޯދައިގެންނެވެ. މި ފެސްޓިވަލްގެ މަޤްސަދަކީ ދުވުންތެރިންނާއި، އާއިލާތަކާއި، ބެލުންތެރިން އަދި ފިޓްނަސް އަށް ލޯބިކުރާ މީހުން އެއްތަނަކަށް ގެނެސްދީ، ފޯރިގަދަ މާހައުލެއް ޤާއިމުކުރުމެވެ.
އުރީދޫއިން ބުނި ގޮތުގައި، މި ފެސްޓިވަލްގައި މައިގަނޑު ތިން ރޭހެއް ހިމެނެ އެވެ. އެއީ 10ކޭ ސަންރައިޒް ރޭސް، 5ކޭ ސަންސެޓް ރަން އަދި ކުޑަކުދިންނަށް ޚާއްސަ 2ކޭ ކިޑްސް ޑޭޝް އެވެ. މި ތިން ރޭސްގެ އިތުރުން، ފެސްޓިވަލްގައި ބައިވެރިވާ ފަރާތްތަކަށް ހިތްފަސޭހަ ތަފާތު ހަރަކާތްތަކެއް ވަނީ ރާވާފަ އެވެ.
މި ހަރަކާތްތަކުގެ ތެރޭގައި ކާނިވަލް ވިލެޖަކާއި، ފޮޓޯ ޒޯންތަކާއި، ރެޑިކަލް ފިޓްނަސް ސްޓޭޖް ސެޝަންތަކާއި، މިއުޒިކާއި ގޭމްތަކާއި، އާއިލީ މަޖާ އެންޓަޓެއިންމަންޓް ފަދަ ކަންތައްތައް ހިމެނެ އެވެ. މި ހުރިހާ ކަމަކީ ދިވެހި ރައްޔިތުންގެ ދިރިއުޅުން ރަނގަޅު ކުރުމަށް އުރީދޫ މޯލްޑިވްސްއިން ކުރަމުންދާ މަސައްކަތްތަކުގެ ތެރެއިން، ދުޅަހެޔޮކަމަށް ބާރުއަޅާ އިވެންޓެކެވެ.
