މޫޑީޒް ރޭޓިންގސް އިން ދިވެހިރާއްޖޭގެ ކްރެޑިޓް ރޭޓިންގގެ އައުޓްލުކް ”ނެގެޓިވް“ އިން ”ސްޓޭބަލް“ އަށް މަތިކޮށްފި އެވެ.

ކްރެޑިޓް ރޭޓިންގގެ އައުޓްލުކް ”ނެގެޓިވް“ އިން ”ސްޓޭބަލް“ އަށް މަތިކުރި ނަމަވެސް ރާއްޖޭގެ ކްރެޑިޓް ރޭޓިންގ ކަމަށްވާ ސީއޭއޭ-2 ހަމަ އެގޮތުގައި ދަމަހައްޓާފައިވާކަމަށް މޫޑީޒްގެ ރޭޓިންގ އެކްޝަންއިން ވަނީ ފާހަގަކޮށްފަ އެވެ.

ފިނޭންސް މިނިސްޓްރީން ބުނި ގޮތުގައި މޫޑީޒްގެ މި ނިންމުމަކީ ފާއިތުވި އަހަރުގެ ތެރޭގައި ރާއްޖެއިން ގެންގުޅެފައިވާ ހަރުދަނާ މާލީ ސިޔާސަތުތަކާއި، އަޅާފައިވާ ފިޔަވަޅުތަކުގެ ނަތީޖާ ރަނގަޅުކަމުގެ ހެއްކެއް ކަމަށެވެ. އަދި ރާއްޖޭގެ ދަރަނި ދެއްކުމުގެ ޤާބިލުކަން އިތުރުކުރުމަށް ރޭވުންތެރިކަމާއެކު ކުރަމުން އަންނަ މަސައްކަތްތަކުގެ ނަތީޖާވެސް މިކަމުން ދައްކުވައިދޭކަމަށް މިނިސްޓްރީން ބުނެ އެވެ.

ފާއިތުވި އަހަރުތަކުގައި އާމްދަނީއާ ނުބައްދަލު މިންވަރަށް ސަރުކާރުގެ ޚަރަދުތައް ބައްޓަން ކޮށްފައިވާތީ، ޚަރަދުތައް ފައިނޭންސްކުރުމަށް ބޮޑު އަގުގައި ދަރަނި ނަގާފައިވާ މިންވަރު އިތުރުވެފައިވެ އެވެ. މިކަމުގެ ސަބަބުން، ސަރުކާރުގެ ފިސްކަލް ހާލަތު ދަށްވެ، ބައިނަލްއަޤުވާމީ މާލީ އިދާރާތަކުން އަންނަނީ ރާއްޖޭގެ މާލިއްޔާ އޮތީ ދަރަނި އަދާނުކުރެވޭ މިސްރާބެއްގައި ކަމަށް ފާހަގަކުރަމުންނެވެ. ބޭރުފައިސާއިން ނަގާފައިހުރި ދަރަނިތައް އަދާކުރުމަށް ބޮޑެތި އަދަދުތަކުން ހޭދަކުރަންޖެހުމުގެ ނަތީޖާއަކަށް ވެގެން ދިޔައީ، ދައުލަތުގެ ރަސްމީ ރިޒަރވް ފަހުގެ ތާރީހެއްގައި ހީނަރު ނުވާ މިންވަރަށް ހީނަރުވެގެން ދިއުމެވެ. މި ހާލަތުން އަރައިގަނެ، ދެމެހެއްޓެނިވި ގޮތެއްގެ މަތިން މާލީ ކަންކަން ތަރުތީބުކުރުމަށް 2024 ވަނަ އަހަރުން ފެށިގެން ސަރުކާރުން ހަރުދަނާ ފިޔަވަޅުތަކެއް އަޅައި ތަންފީޒުކުރަން ފަށާފައިވާކަން ފިނޭންސް މިނިސްޓްރީން ފާހަގަ ކުރެ އެވެ.

މޫޑީޒްއިން ނެރުނު ބަޔާނުގައި، ރޭޓިންގ އަށް މި ލިބުނު ކުރިއެރުމުގެ މައިގަނޑު ސަބަބަކީ ރާއްޖޭގެ ފިސްކަލް އަދި މަނިޓަރީ ސިޔާސަތުތަކުގެ ނަތީޖާއެއްގެ ގޮތުން ރާއްޖޭގެ މެކްރޮފިސްކަލް ހާލަތު ރަނގަޅުވުންކަމަށް ބުނެފައިވެ އެވެ. އެގޮތުން ބޭރު ފައިސާގެ އާމްދަނީ އިތުރުވެ، ސޮވްރިން ޑިވެލޮޕްމަންޓް ފަންޑުގައި ބޭރު ފައިސާގެ އަދަދުވެސް އިތުރުވެފައިވާކަން ފާހަގަކޮށްފައިވެ އެވެ. އެގޮތުން މޫޑީސް އިން ފާހަގަކޮށްފައިވާ ގޮތުގައި؛ 

• ބޭރު ފައިސާގެ ހާލަތު ރަނގަޅުވުން:

  • ބޭރު ފައިސާގެ އާމްދަނީ އިތުރުކުރުމަށް އެއަރޕޯޓް ޓެކުހާއި ފީ، ގްރީން ޓެކްސް އަދި ޓީޖީއެސްޓީގެ ރޭޓުތައް މުރާޖައާކުރުން.

  • ބޭރު ފައިސާގެ ޤާނޫނާއި ގަވާއިދު ތަންފީޒުކުރުން.

  • މިކަމުގެ ސަބަބުން ރަސްމީ ރިޒަރވް އަދި ބޭރު ފައިސާގެ ލިކުއިޑިޓީ ވަނީ ރަނގަޅުވެފައި.

• މި ސިޔާސަތުތަކާއެކު، މި މަހުގެ 9 ވަނަ ދުވަހުގެ ނިޔަލަށް ސޮވްރިން ޑިވެލޮޕްމަންޓް ފަންޑު (އެސްޑީއެފް) ގެ ބޭރު ފައިސާގެ ކޭޝް ބެލެންސް 126 މިލިއަން އެމެރިކާ ޑޮލަރަށް އިތުރުވެފައިވާކަން މޫޑީޒްއިން ފާހަގަކުރެ.

• ސަރުކާރުން ބަޖެޓު ތަންފީޒުކުރުމުގައި، ޚަރަދުތައް ކޮންޓްރޯލްކޮށް އަދި މި އަހަރުގެ ބަޖެޓް ޑެފިސިޓް ކުޑަކުރުމަށް ކޮށްފައިވާ މަސައްކަތްތައްވެސް މޫޑީޒްއިން ފާހަގަކޮށްފައިވޭ.

ފިނޭންސް އިން ބުނި ގޮތުގައި އިޤްތިސާދު ކުރިއެރުވުމުގައި ސަރުކާރަށް ވަނީ ރަނގަޅު ކާމިޔާބުތަކެއް ހާސިލްކުރެވިފަ އެވެ. އެގޮތުން ރާއްޖޭގެ އިޤްތިޞާދުގައި އެންމެ ބޮޑު ހިއްސާއެއް އަދާކުރާ ދާއިރާ ކަމުގައިވާ ފަތުރުވެރިކަމުގެ ސިނާއަތަށް ބަލާއިރު، މިއަހަރުގެ މިހާތަނަށް ރާއްޖެއަށް ޒިޔާރަތްކުރި ފަތުރުވެރިންގެ އަދަދު ފާއިތުވި އަހަރުގެ މި މުއްދަތާ އަޅާބަލައި 10 އިންސައްތައިން ވަނީ އިތުރުވެފައިކަން މިނިސްޓްރީން ފާހަގަކުރި އެވ ހަމަ އެހެންމެ، މިއަހަރުގެ ސެޕްޓެމްބަރު މަހުގެ ނިޔަލަށް ފަތުރުވެރިން ރާއްޖޭގައި ހޭދަކުރާ ރޭގެ އަދަދު، ފާއިތުވި އަހަރުގެ މި މުއްދަތާ އަޅާބަލާއިރު، 7.2 އިންސައްތައިން ވަނީ ކުރިއަރާފަ އެވެ.

ފިނޭންސް އިން އިތުރަށް ބުނި ގޮތުގައި 2026 އިން 2028 ވަނަ އަހަރަށް ފާސްކޮށްފައިވާ މެދުރާސްތާގެ ބަޖެޓުގައި ރާއްޖޭގެ އިގުތިސާދަށް ނޭދެވޭ އަސަރެއް ނުކުރާނެ ފަދަ މިންވަރަކަށް ސަރުކާރުގެ ޑެފިސިޓް ކުޑަކުރަމުން ގެންދިއުމަށް ވަނީ ނިންމާފަ އެވެ.

މޫޑީސް އިން ވަނީ ދަރަނީގެ މިންވަރު މަތިވެފައިވުމުގެ ސަބަބުން، ސީއޭއޭ-2 ރޭޓިންގ ވަނީ ދަމަހައްޓާފަ އެވެ. އެހެންވެ ދަރަނި އަދާކުރުމާއި ގުޅޭގޮތުން ފިނޭންސް އިން ބުނީ 2026 ވަނަ އަހަރު މެޗުއަރވާ 500 މިލިއަން އެމެރިކާ ޑޮލަރުގެ ސުކޫކު އަދި އެހެނިހެން ދަރަނި އަދާކުރުމަށް ވަނީ ރޭވިފައި ކަމަށެވެ. އަދި ދަރަނި ޑިފޯލްޓްނުވެ، ދަރަނި އެ މުއްދަތަށް ދެއްކޭނެކަމަށްވެސް ފިނޭންސް އިން ބުންޏެވެ.

މޫޑީސްއިން ސަރުކާރުގެ ކްރެޑިޓް ރޭޓިންގގެ އައުޓްލުކް ”ނެގެޓިވް“ އިން ”ސްޓޭބަލް“ އަށް ބަދަލުކުރިއިރު، ސަރުކާރުން އަންނަނީ ހަރަދު ކުޑަކޮށް، އިންވެސްޓްމެންޓް އިތުރުކުރުމަށް ގިނަ މަސައްކަތްތަކެއް ކުރަމުންނެވެ. އެގޮތުން ރާއްޖޭގެ ފަތުރުވެރިކަން އިތުރަށް ފުޅާކޮށް، އައު ބްރޭންޑްތައް ގެނައުމުގެ މަސައްކަތްވެސް ސަރުކާރުން އަންނަނީ ކުރަމުންނެވެ. މިދިޔަ ހަފްތާގަ މަޖިލީހުން ވަނީ ސަރުކާރުން ހުށަހެޅި 64.2 ބިލިއަންގެ ބޮޑު ބަަޖެޓް ފާސްކޮށްފަ އެވެ. ނަމަވެސް ދަރަނި ދެއްކުން ނުހިމަނާ، އަންނަ އަހަރަށް ލަފާކޮށް ސަރުކާރުން ހުށަހެޅީ މިހިނގާ އަހަރަށްވުރެ ކުޑަ ބަޖެޓެކެވެ.

ރާއްޖޭގެ އިގްތިސާދީ ހާލަތު ކްރެޑިޓް ރޭޓިންގްސް މިނިސްޓްރީ އޮފް ފިނޭންސް