ޓެކްސީ ދަތުރުތަކަށް ޓްރާންސްޕޯޓު މިނިސްޓްރީން ކަނޑައަޅާ އަގަށް ވުރެ ބޮޑު އަގު ނަގާ ނަމަ، އެ ހިދުމަތްދޭ ފަރާތުގެ ލައިސަންސް ހިފެހެއްޓުމުގެ ނުވަތަ ބާތިލް ކުރުމުގެ ބާރު މިނިސްޓްރީއަށް ލިބޭ ގޮތަށް ގާނޫނު އެކުލަވާލުމަށް ރައްޔިތުންގެ މަޖިލީހަށް ހުށަހަޅައިފި އެވެ.
މި ބިލަކީ ސަރުކާރުގެ ފަރާތުން މަޖިލީހަށް ހުށަހެޅުއްވި ބިލެކެވެ. މި ބިލު ހުށަހެޅުއްވީ ކުރެންދޫ ދާއިރާގެ މެންބަރު މުހައްމަދު ޝާމިން އެވެ.
މި ބިލުގެ މައިގަނޑު މަގުސަދަކީ އާންމު ދަތުރުފަތުރުގެ ހިދުމަތްތަކުގެ އަގު ކޮންޓްރޯލް ކުރުމާއި، މިނިސްޓްރީން ކަނޑައަޅާ މިންގަނޑުތަކާ އެއްގޮތަށް ހިދުމަތްތައް ދިނުން ކަށަވަރު ކުރުމެވެ. ބިލުގައި ބުނެފައިވާ ގޮތުން، އާންމު ދަތުރުފަތުރުގެ ހިދުމަތުގެ އަގު ހުންނަންވާނީ، ގާނޫނުގެ ދަށުން ޓްރާންސްޕޯޓު މިނިސްޓްރީން ކަނޑައަޅާ މިންގަޑާ އެއްގޮތަށެވެ. އެގޮތުން، އަގު ކޮންޓްރޯލު ކުރުމަށް މިނިސްޓްރީން ކަނޑައަޅާފައިވާ މިންގަނޑުތަކާ ހިލާފުވުމަކީ ލައިސަންސް ހިފެހެއްޓޭނެ ނުވަތަ ބާތިލް ކުރެވޭނެ ހާލަތެއް ކަމަށް ބިލުގައި ބަޔާންކޮށްފައިވެ އެވެ.
ލައިސަންސް ހިފެހެއްޓޭނެ ނުވަތަ ބާތިލް ކުރެވޭނެ ގޮތްތަކުގެ ތެރޭގައި، ގާނޫނާ ހިލާފަށް ކުރި ކަންތައް އިސްލާހު ކުރުމަށް ގަވާއިދުގެ ދަށުން އެންގުމަށް ފަހު، އެކަށީގެންވާ މުއްދަތެއްގައި އެކަން އިސްލާހުނުކުރާ ނަމަ ވެސް ހިމެނެ އެވެ. ނަމަވެސް، ބިލުގައި ވަނީ އަމަލުގެ ކުޑަ ބޮޑުމިނަށް ބަލާ ވަގުތުން ލައިސަންސް ހިފެހެއްޓުމުގެ ނުވަތަ ބާތިލް ކުރުމުގެ ބާރު ވެސް ޓްރާންސްޕޯޓު މިނިސްޓްރީއަށް ލިބޭ ގޮތަށް ހިމަނައިފަ އެވެ.
ސަރުކާރުން އަންނަނީ މާލެ ސަރަހައްދުގައި ޓެކްސީގެ ހިދުމަތުގެ ފެންވަރު ރަނގަޅުކުރުމަށް ގިނަ މަސައްކަތްތަކެއް ކުރަމުންނެވެ. އެގޮތުން އަންނަ ފެބުރުއަރީ މަހު ސަރުކާރުގެ ޓެކްސީ ލައިނެއް ފެށުމަށް ވަނީ ނިންމާފަަ އެވެ.
ރައްޔިތުންގެ މަޖިލިސް މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަން
