މެންބަރުންނަށް ލިބޭ މުސާރައިން އަނބިމީހާއަށް 15،000 ރުފިޔާ ދިނުމަށްފަހު އަދި ދެންހުރި ހަރަދުތައް ކުރުމަށްފަހު މެންބަރުގެ އަތުގައި އެއްޗެއް ނޯންނަ ކަމަށް ވެލިދޫ ދާއިރާގެ މެންބަރު މުހައްމަދު އައްބާސް ވިދާޅުވެއްޖެ އެވެ.
އައްބާސް މިފަދައިން ވިދާޅުވެފައިވަނީ، ރައްޔިތުންގެ މަޖިލީހުގެ މިއަދުގެ ޖަލްސާގައި ރައީސުލްޖުމްހޫރިއްޔާކަން ކޮށްފައިވާ މީހަކަށް ދޭންޖެހޭ ރައްކާތެރިކަމާއި ޢިނާޔަތްތަކާބެހޭ ޤާނޫނަށް ހުށަހަޅާފައިވާ އިސްލާހަށް ވާހަކަ ދައްކަވަމުންނެވެ.
އެގޮތުން އައްބާސް ވިދާޅުވީ މަޖިލީހުގެ މެންބަރަކަށް މުސާރައުގެ ގޮތުގައި 82،500 ރުފިޔާ ލިބޭއިރު ޓެކްސްއަށް ކެނޑުމަށްފަހު ލިބެނީ 79،600 ވަރަކަށް ރުފިޔާ ކަމަށެވެ. އަދި ކުރަން ހުންނަ ހަރަދުތައް ކުރުމަށްފަހު މަޖިލިސް މެންބަރުގެ އަތުގައި އެއްޗެއް ނޯންނަ ކަމަށް އައްބާސް ވިދާޅުވި އެވެ.
”އަޅުގަނޑުމެން ގޭގެ ރެންޓު 25،000 ދައްކާފައި، އެއްއަނބި ހުރިއްޔާ އެ އަނބިމީހާއަށް 15،000 ރުފިޔާދީފައި، ދެން ކޮންމެ ދުވަހަކު ކޮފީއަށް 500، 1،000 ރުފިޔާ ދިޔައިމަ، އަތަކު ނޯވޭ އެކައްޗެއްވެސް.“ އައްބާސް ވިދާޅުވި އެވެ.
އައްބާސް ވިދާޅުވީ އޭނާ ކުރިންވެސް އުޅުނީ މަޖިލީހުން ލިބުނު އެއްޗަކުން ނޫން ކަމަށާއި ދެންވެސް އެގޮތަށް އުޅެވޭނެ ކަމަށެވެ. އަދި އިންޝުއަރެންސާއި އިނާޔަތާއި ހިމާޔަތް ނުލިބުނަސްވެސް އުޅެވޭނެ ކަމަށް ވިދާޅުވި އެވެ.
މީގެއިތުރުން އައްބާސް ވިދާޅުވީ ކުރީގެ ރައީސުންނަކީ ރައްޔިތުންގެ ޓެކްސް ފައިސާއިން އިނާޔަތާއި ހިމާޔަތާއި ރައްކާތެރިކަން ލިބިގެން އަބުރުވެރި ދިރިއުޅުމެއް އުޅުއްވަމުންދާ ބޭފުޅުން ކަމަށެވެ. އެހެންނަމަވެސް މަދު ރައީސަކު ނޫނީ ގައުމުގެ ސުލްހަ މަސަލަސްކަން އިސްކުރައްވާ ގައުމަށް ފައިދާހުރި ކަންކަން ކުރައްވާތަން ނުފެންނަ ކަމަށް އައްބާސް ވިދާޅުވި އެވެ.
އައްބާސް ވިދާޅުވީ ދައުލަތުން އިނާޔަތްދޭ ފަރާތްތަކުގެ އަދަދު އިތުރުވެ އިނާޔަތުގެ ގޮތުގައި ބޮޑު ހޭދައެއް ކުރާއިރު ނިކަމެތި ރައްޔިތުންގެ ހާލަތު ރަނގަޅު ނުވާ ކަމަށެވެ.
”ރައްޔިތުން އަނގަޔާ އަތާ ދިމާނުވެ އުޅެންމިޖެހެނީ، އެހެންމަ ދައުލަތުގެ ހަރަދު ހަމަ ކުޑަކުރައްވަންވީ.“
ރައީސުލްޖުމްހޫރިއްޔާކަން ކޮށްފައިވާ މީހަކަށް ދޭންޖެހޭ ރައްކާތެރިކަމާއި ޢިނާޔަތްތަކާބެހޭ ޤާނޫނަށް ސަރުކާރުގެ ފަރާތުން އިސްލާހު ހުށަހެޅުއްވީ ހުޅުދޫ ދާއިރާގެ މެންބަރު މުހައްމަދު ޝާހިދު އެވެ.
މި އިސްލާހުގައި ވަނީ ރައީސުލްޖުމްހޫރިއްޔާގެ މަގާމު އެއް ދައުރެއްގައި އަދާކޮށްފައިވާ މީހަކު ދެވަނަ ދައުރަކަށް އިންތިޚާބުވެއްޖެނަމަ، އެ މަގާމު އަދާކުރާ މުއްދަތުގައި ކުރީގެ ރައީސުންނަށް ލިބޭ އިނާޔަތް ނުލިބޭނެ ކަމަށެވެ. އަދި ދައުލަތުގެ އެނޫންވެސް މަގާމަކާ ހަވާލުވާނަމަ، އެ މަގާމެއް އަދާކުރާ މުއްދަތުގައި ކުރީގެ ރައީސުންގެ އިނާޔަތް ނުލިބޭނެ ކަމަށެވެ. ކުރީގެ ރައީސަކު ދިވެހިރާއްޖެއިން ބޭރުގައި ދިރިއުޅޭނަމަ، ރާއްޖެއިން ބޭރުގައި ދިރިއުޅެމުންދާ މުއްދަތުގައި ހިމާޔަތާއި ރައްކާތެރިކަން ފޯރުކޮށްދިނުން ލާޒިމުވެގެން ނުވާކަމަށް މި އިސްލާހުގައި ބުނެފައިވެ އެވެ.
މި އިސްލާހުގެ ތެރެއިން ހުށަހަޅާފައިވާ އެންމެ ބޮޑު އެއްކަމަކީ، ކުރީގެ ރައީސުންގެ އޮފީސް ހިންގުމުގެ ހަރަދު އުނިކުރުމެވެ. ކުރީގެ ރައީސުންނަށް އޮފީސް ހިންގުމުގެ ހަރަދުގެ ގޮތުގައި މިހާރު މަހެއްގެ މައްޗަށް 175،000 ރުފިޔާއާ ހަމައަށް ދައުލަތުން ފައިސާ ހަމަޖައްސައިދެ އެވެ.
ރައްޔިތުންގެ މަޖިލިސް ވެލިދޫ ދާއިރާގެ މެންބަރު މުހައްމަދު އައްބާސް
