ކުރީގެ ރައީސުންނަށް އިނާޔަތާއި ރައްކާތެރިކަން ދިނުމުގެ ގާނޫނަށް ގެނައި އިސްލާހުގެ ދަށުން ކުރީގެ ނައިބު ރައީސުންނަށް ވެސް ދައުލަތުގެ އިނާޔަތް ލިބޭ ގޮތަށް ރައްޔިތުންގެ މަޖިލީހަށް ހުށަހެޅި އިސްލާހުގައި އިނާޔަތް ލިބުމުގެ ޝަރުތު ހަމަވަނީ ހަމަވަނީ ހަމައެކަނި ކުރީގެ ނައިބު ރައީސް ފައިސަލް ނަސީމްގެ އެވެ.

ކުރީގެ ރައީސުންނަށް އިނާޔަތާއި ރައްކާތެރިކަން ދިނުމުގެ ގާނޫނަށް ސަރުކާރުގެ ފަރާތުން އިސްލާހު ހުށަހެއްޅުއްވީ ހުޅުދޫ ދާއިރާގެ މެންބަރު މުހައްމަދު ޝާހިދެވެ. މިއަދު ބޭއްވި ރައްޔިތުންގެ މަޖިލީހުގެ ޖަލްސާގައި މި ބިލުގެ ފުރަތަމަ ކިޔުން ވަނީ އިއްވާފަ އެވެ.

ރައްޔިތުންގެ މަޖިލީހަށް ހުށަހަޅާފައިވާ އިސްލާހުގައި ވަނީ ކުރީގެ ނައިބު ރައީސުންނަށް ކޮންމެ މަހަކު ދައުލަތުން 25،000ރ. އިނާޔަތެއް ދިނުމަށް ހިމަނާފަ އެވެ. އަދި އެ ބޭފުޅުންނަށް ވެސް ރާއްޖެ އާއި ބޭރު ގައުމުތަކުން ސިއްހީ ހިދުމަތް ލިބޭނެ އިންތިޒާމު ހަމަޖައްސަން ހިމަނާފައިވެ އެވެ.

މި އިނާޔަތްތައް ލިބޭނީ ގާނޫނުއަސާސީގައިވާ ގޮތުގެ މަތިން ފަސް އަހަރުގެ ރިޔާސީ ދައުރެއް ފުރިހަމަ ކޮށްފައިވާ ނައިބު ރައީސުންނަށެވެ. މި އުސޫލުން ބަލާއިރު، ނައިބު ރައީސްކަމުގައި ފަސް އަހަރުގެ ދައުރެއް ފުރިހަމަ ކުރެއްވި ހަމައެކަނި ބޭފުޅަކީ ފައިސަލް ނަސީމް އެވެ. އިތުރު އެހެން ބޭފުޅަކު ނައިބު ރައީސްކަމުގައި މިހާތަނަށް ފަސް އަހަރުގެ ދައުރެއް ފުރިހަމަ ކުރައްވާފައި ނުވާތީ، މި އިސްލާހު ފާސްވިޔަސް އެ ބޭފުޅުންނަށް މި އިނާޔަތްތައް ލިބިވަޑައެއް ނުގަންނަވާނެ އެވެ.

އިނާޔަތް ލިބުމަށް ޝަރުތު ހަމަ ނުވާ ކުރީގެ ނައިބު ރައީސުން:

• ކުރީގެ ނައިބު ރައީސް (ކުރީގެ ރައީސް) ޑރ. މުހައްމަދު ވަހީދް ހަސަން މަނިކު
• ކުރީގެ ނައިބު ރައީސް މުހައްމަދު ވަހީދުއްދީން
• ކުރީގެ ނައިބު ރައީސް ޑރ. މުހައްމަދު ޖަމީލް އަހުމަދު
• ކުރީގެ ނައިބު ރައީސް އަބްދުﷲ ޖިހާދު
• ކުރީގެ ނައިބު ރައީސް އަހުމަދު އަދީބް

މި އިސްލާހުގެ ތެރެއިން ހުށަހަޅާފައިވާ އެންމެ ބޮޑު އެއްކަމަކީ، ކުރީގެ ރައީސުންގެ އޮފީސް ހިންގުމުގެ ހަރަދު އުނިކުރުމެވެ. ކުރީގެ ރައީސުންނަށް އޮފީސް ހިންގުމުގެ ހަރަދުގެ ގޮތުގައި މިހާރު މަހެއްގެ މައްޗަށް 175،000 ރުފިޔާއާ ހަމައަށް ދައުލަތުން ފައިސާ ހަމަޖައްސައިދެ އެވެ.

ރައީސުލްޖުމްހޫރިއްޔާކަން ކޮށްފައިވާ މީހަކަށް ދޭންޖެހޭ ރައްކާތެރިކަމާއި ޢިނާޔަތްތަކާބެހޭ ޤާނޫނަށް ހުށަހަޅާފައިވާ އިސްލާހުގައި ބުނެފައިވަނީ، ގައުމަށް ދިމާވާ އިގްތިސާދީ ތަދުމަޑުކަމަކާ ގުޅިގެން ދައުލަތުގެ ހަރަދުތައް ކޮންމެހެން ކުޑަކުރަންޖެހޭ ފަދަ ހާލަތެއް މެދުވެރިވެއްޖެ ހިނދެއްގައި، އިނާޔަތްތަކަށް ބަދަލުގެނައުމުގެ އިޚްތިޔާރު ސަރުކާރަށް ލިބިގެންވާ ކަމަށެވެ. އަދި މިފަދަ ބަދަލެއް ގެންނަންޖެހޭނަމަ، އެފަދަ ބަދަލެއް ގެނައުމުގެ ކުރިން ރައްޔިތުންގެ މަޖިލީހުގެ މަޝްވަރާއެއް ހޯދުމަށް މަޖިލީހަށް ހުށަހެޅިދާނެ ކަމަށްވެސް ބަޔާންކޮށްފައިވެ އެވެ.

ހުޅުދޫ ދާއިރާގެ މެންބަރު މުހައްމަދު ޝާހިދު ރައްޔިތުންގެ މަޖިލިސް ކުރީގެ ނައިބު ރައީސް ފައިސަލް ނަސީމް