ދައުލަތުގެ ޕޭ ފްރޭމްވޯކަށް ސަރުކާރުން މިދިޔަ މަހު ގެނައި ބަދަލާ ގުޅިގެން، މި މަހުން ފެށިގެން މުސާރަ ކުޑަވެފައިވާ ކަމަށް ބުނެ، ހައި ކޯޓުގެ މުވައްޒަފުން ޑިޕާޓްމަންޓް އޮފް ޖުޑީޝަން އެޑްމިނިސްޓްރޭޝަން (ޑީޖޭއޭ) އަށް ހިނގައްޖެ އެވެ.

އެނގިފައިވާ ގޮތުގައި ހައި ކޯޓުގެ މުވައްޒަފުން ޑީޖޭއޭއަށް ގޮސްފައި ވަނީ މުސާރައިގެ މައްސަލާގައި ޑީޖޭއޭގެ ޗީފް ޖުޑިޝަލް އެޑްމިނިސްޓްރޭޓަރު އަމްޖަދު މުސްތަފާއާ ބައްދަލު ކުރުމަށެވެ.

މި ބަދަލާއި ގުޅިގެން ހިތްހަމަނުޖެހުން ފާޅުކުރުމުގެ ގޮތުން މިދިޔަ ހޯމަ ދުވަހު ޝަރުއީ ދާއިރާގައި މަސައްކަތްކުރާ މުވައްޒަފުން އޮފީހަށް ދިޔައީ ކަޅު ހެދުމުގަ އެވެ.

އެނގިފައިވާ ގޮތުގައި ޝަރުއީ ދާއިރާގެ 609 މުވައްޒަފުންގެ ސޮޔާއެކު، ޝަރުއީ ދާއިރާގެ މުވައްޒަފުން ވަނީ ރައީސް އޮފީހަށާއި ރައްޔިތުންގެ މަޖިލީހަށާއި ޖުޑީޝަލް ސާވިސް ކޮމިޝަންއަށް ޕެޓިޝަން ހުށަހަޅައިފަ އެވެ. އެ ޕެޓިޝަންގައި ބުނެފައިވަނީ، މުސާރައިގެ އާ އޮނިގަނޑަށް މުވައްޒަފުން ގެންދިއުމުގައި ޝަރުތުތަކަށް ރިއާޔަތްކުރުމެއްނެތި ދަށް ރޭންކުތަކަށް މުވައްޒަފުން ބަދަލުކޮށްފައިވާ ކަމަށާއި އަދި ގިނަ އަހަރުތަކެއް ވަންދެން އެ ދާއިރާއަށް ޚިދުމަތްކުރި މުވައްޒަފުންނަށް ދެމުން ދިޔަ އިނާޔަތްތައް ކަނޑާލުމުން މުވައްޒަފުން މާޔޫސްވެފައި ތިބި ކަމަށެވެ.

ދައުލަތުގެ ބައެއް އިދާރާތަކުން މުވައްޒަފުން ހާސިލްކޮށްފައިވާ ސެޓްފިކެޓަށް ބަލައި، މަތީ ރޭންކުތަކަށް މުވައްޒަފުންނަށް ކުރިއެރުން ދެމުން އައި ނަމަވެސް، ޝަރުއީ ދާއިރާގައި އެފަދަ ފުރުސަތުތައް ފަހިވެފައި ނެތް ކަމަށްވެސް އެ މުވައްޒަފުންގެ ޕެޓިޝަންގައި ބުނެފައިވެ އެވެ.

ސަރުކާރުން ޖުޑީޝަރީގެ މުވައްޒިފުން ހިމެނޭގޮތަށް، ސިވިލް ސަރވިސްގެ ގިނަ މުވައްޒިފުންނެއްގެ މުސާރަ ބޮޑުކޮށްފައިވަނީ މި މަހުގެ 1 ވަނަ ދުވަހުން ފެށިގެންނެވެ.

މުސާރަ ބޮޑުވި ދާއިރާއްތައް:

• ބިޒްނަސް އެންޑް އެޑްމިނިސްޓްރޭޓިވް ސާވިސް،
• ތައުލީމީ ދާއިރާ،
• ސިއްހީ ދާއިރާ،
• އިންފޮމޭޝަން އެންޑް ކޮމިއުނިކޭޝަންސް ދާއިރާ،
• ލީގަލް، ކަލްޗަރަލް އަދި ސޯޝަލް ސާވިސް،
• ސައިންސް އެންޑް ބިލްޓް އެންވަޔަރަމެންޓް ސާވިސް،
• ސެކްރެޓޭރިއަލް، ސްކިލްޑް އެންޑް އެލެމެންޓްރީ ސާވިސް

މި މައްސަލާގަ ފިނޭންސް މިނިސްޓްރީން ބުނެފައިވަނީ ބޮޑުކުރި މުސާރަ ފުރިހަމަ ގޮތުގައި ލިބެން ފަށާނީ ޑިސެންބަރު މަސް ނިމޭއިރު ކަމަށެވެ. އެގޮތުން މިނިސްޓްރީން ބުނި ގޮތުގައި މުވައްޒަފުންގެ ހާޒިރީއަށް ބަލައިގެން ދެމުންދާ އެލަވަންސްތަކާއި އިނާޔަތްތައް ހިސާބުކުރުމުގައި ބަލަނީ ވޭތުވި މަހުގެ 16 ވަނަ ދުވަހުން ފެށިގެން ހިނގާ މަހުގެ 15 ވަނަ ދުވަހުގެ ނިޔަލަށެވެ. އެހެންކަމުން، މި މަހުގެ އެއްވަނަ ދުވަހުން ފެށިގެން މުސާރައަށް ގެނެސްފައިވާ ބަދަލާއެއްގޮތަށް މުސާރައަށް އައި ކުރިއެރުން ފުރިހަމަ ގޮތުގައި ލިބެން ފަށާނީ ޑިސެންބަރު މަސް ނިމޭއިރު ލިބޭ މުސާރައިންނެވެ.

މިނިސްޓްރީން އިތުރަށް ބުނެފައިވާ ގޮތުގައި، ނޮވެންބަރު މަހުގެ މުސާރަ ލިބޭއިރު، މުސާރަ ހިސާބު ކުރުމުގައި ޢަމަލުކުރާ އުސޫލަށް ބަލާއިރު، އޮކްޓޫބަރު 16 އިން 31 އަށް ހިސާބުކުރާނީ އޮކްޓޫބަރު މަހުގެ އެލަވަންސާއި ޢިނާޔަތްތައް ހިމަނައިގެންނެވެ.

މިނިސްޓްރީން ބުނީ، ޕޭ ފްރޭމްވޯކް ތެރެއަށް ބަދަލުވުމާ ގުޅިގެން އެއްވެސް މުވައްޒަފެއްގެ މުސާރަ ކުޑަވާ ހާލަތެއް މެދުވެރިވެއްޖެ ނަމަ، މައިގްރޭޝަން އެލަވަންސް ދޭނެ ގޮތުގެ މިންގަޑާ އެއް ގޮތްވާ ގޮތުގެ މަތިން އެލަވަންސްއެއް ހަމަޖެހިގެންދާނެ ކަމަށެވެ. މީގެ މަގުސަދަކީ އެއްވެސް މުވައްޒަފަކަށް މާލީ ގޮތުން ގެއްލުމެއް ނުލިބޭނެކަން ކަށަވަރުކުރުމެވެ.

މި ބަދަލުގެ މައިގަނޑު އެއް މަޤްސަދަކީ ދައުލަތުގެ އިދާރާތަކުން މުވައްޒަފުންނަށް ވަކި މިންވަރެއްގެ ޖުމްލަ އުޖޫރައެއް ދިނުމުގެ ގޮތުން ގިނަ ވަގުތު އިތުރުގަޑީގެ ފައިސާ ދެވޭގޮތަށް އޮތް ނިޒާމު ބަދަލުކޮށް، މަސައްކަތު ގަޑީގެ ބޭނުން ފުރިހަމަގޮތުގައި ހިފުގެ ސަޤާފަތެއް އާލާކުރުން ކަމަށްވެސް ފިނޭންސް މިނިސްޓްރީން ހާމަކުރެ އެވެ.

ހައި ކޯޓު މިނިސްޓްރީ އޮފް ފިނޭންސް ޑިޕާޓްމަންޓް އޮފް ޖުޑިޝަލް އެޑްމިނިސްޓްރޭޝަން (ޑީޖޭއޭ)