އާސަންދަ ނިޒާމު އޮތީ ރައްޔިތުން ބޭސްފަރުވާއަށް ސަލާންޖަހަންޖެހޭ ގޮތަކަށް ނޫން ކަމަށް ހެލްތް މިނިސްޓަރު އަބްދުﷲ ނާޒިމް ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރުންގެ ސުވާލުތަކަށް ޖަވާބު ދެއްވަމުން މިނިސްޓަރު ނާޒިމް ވިދާޅުވީ، އާސަންދަ ނިޒާމުގައި ރައްޔިތުން ބޭސްފަރުވާއަށް ސަލާންޖަހަންޖެހޭ ކަމަށް ގަބޫލުނުކުރައްވާ ކަމަށެވެ. އަދި އާސަންދަ ނިޒާމު ތައާރަފުކުރީ ބޭސްފަރުވާއަށް ރައްޔިތުން ސަލާންޖެހުން ނިމުމަކަށް ގެނައުމަށްކަން މިނިސްޓަރު ފާހަގަކުރެއްވި އެވެ.
މިނިސްޓަރު ނާޒިމް ވިދާޅުވީ އެމަނިކުފާނުގެ އަމިއްލަ ތަޖުރިބާއާއި ފެންނަ މަންޒަރަށް ބަލާއިރު ރާއްޖެއިން އާސަންދައިން ކުރެވިފައި ހުރި ހަރަދުތަކާއި އާސަންދަ ނިޒާމު ރަނގަޅުވަމުން އަންނަ ގޮތާއި ކަންކަމަށް ބަލާއިރު އާސަންދަ ނިޒާމު އޮތީ ރައްޔިތުން ބޭސްފަރުވާއަށް ސަލާންޖަހަން ޖެހޭގޮތަށް ނޫންކަމަށް ބުރަވެވޭ ކަމަށެވެ.
”އަޅުގަނޑު އެއްބަސްނުވާން މިއުޅޭ ކަމަކީ އާސަންދަ ނިޒާމު އޮތީ ސަލާންޖަހާގޮތަކަށޭ، އެކަމާ އެއްބަސްވާން އަޅުގަނޑަށް ތަންކޮޅެއް ދަތިވާހަކަ ދަންނަވަން. އެއީ އަޅުގަނޑަށް އެ ނިޒާމު ހިނގާގޮތް އެނގޭތީ، އެ ނިޒާމު ބަލަމުންދާ މީހަކަށްވާތީ.“
ރާއްޖެއަށް އަންނަ ބޭރުގެ ސިއްހީ ދާއިރާގެ މާހިރުންވެސް އާސަންދަ ނިޒާމު ހިނގާގޮތަށް ތައުރީފުކުރައްވާކަން ފާހަގަކުރައްވާ މިނިސްޓަރު ނާޒިމް ވިދާޅުވީ މިއީ ދުނިޔޭގައިވެސް އޮތް އެންމެ ޖެނެރަސް ހެލްތު ނިޒާމު ކަމަށެވެ. އަދި އ.ދ.އިން ކަނޑައަޅާފައިވާ ލަނޑުދަނޑިތަކުގައި ރާއްޖެއަށް ހާސިލްކުރެވިފައިވާ އެންމެ ބޮޑު ކާމިޔާބީއަކީ ވެސް ޔުނިވާސަލް ހެލްތު ކަވަރޭޖެއް އޮތުންކަން ފާހަގަކުރެއްވި އެވެ.
ކޮންމެ ނިޒާމެއްގައިވެސް ފުރިހަމަ ކުރަންޖެހޭނެ ކަންކަން ހުންނާނެކަމަށާއި އެގޮތުން އާސަންދާގައިވެސް ރަނގަޅުކުރަންޖެހޭނެ ކަންކަން ހުންނާނެކަމަށް މިނިސްޓަރު ވިދާޅުވި އެވެ.
އާސަންދައިގެ ހިންގުން ހަރުދަނާ ކުރުމަށް މި ސަރުކާރުންވެސް ގިނަ މަސައްކަތްތަކެއް ކޮށްފައިވެ އެވެ. އަދި އާސަންދައިގެ ތެރެއިން ފައިސާ އިސްރާފުވާވުމަށް ނިމުމެއް ގެނައުމަށްވެސް އަންނަނީ މަސައްކަތްތަކެއް ކުރަމުންނެވެ.
ހެލްތް މިނިސްޓަރ އަބްދުﷲ ނާޒިމް އިބްރާހިމް ރައްޔިތުންގެ މަޖިލިސް އާސަންދަ
