ވިލިމާލެއިން ކަނޑާ ދެ ނިކަގަހުގެ ބަދަލުގައި، 300 ގަސް އިންދަން އެންވަޔަރަންމެންޓް މިނިސްޓްރީއަށް އަންގަފައިވާނެ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ވިލިމާލެ ރައްޔިތުންނާއި ބައްދަލު ކުރެއްވުމަށް މިދިޔަ އާދިއްތަ ދުވަހު ބޭއްވި ބައްދަލުވުމުގައި ވިލިމާލޭގެ ރައްޔިތުން ވަނީ ވިލިމާލެ ޕޮލިސް ސްޓޭޝަނާ ޖެހިގެން އޮންނަ ހުސްބިމުގައި ހުންނަ އެ ދެ ނިކަގަހުގެ މުލުގެ އުނދަގޫ ވާ ކަމަށް ބުނެފަ އެވެ.
މިކަމާއި ގުލިގެން ރަޢީސް އެ ގަސް އެ ތަނުން ނަގަން ބޭނުންވާ މީހުން އަތްމައްޗަށް ނެގުމަށް އެދިވަޑައިގަތެވެ. އެތަނަށް ހާޒިރުވި ތިބި ވަރަށް ގިނަ ބަޔަކު ވަނީ އަތް ނަގައި، ގަސް ކަނޑަން ބޭނުންވާ ކަމަށް ބުނެފައެވެ. އެހެންކަމުން ރައީސް ވިދާޅުވީ، އެ މަސައްކަތް ކުރިއަށްދާނެ ކަމަށެވެ.
ރައީސްގެ މި ނިންމެވުމަށް ބައެއް މީހުން ވަނީ، ދުވަސްވީ ގަސްތައް ކެނޑުމާ ގުޅޭ ގޮތުން ކަންބޮޑުވުން ފާޅުކޮށްފަ އެވެ.
އެ ކަންބޮޑުވުންތަކާ ގުޅިގެން ރޭ ރައީސް ވިދާޅުވީ، މި ސަރުކާރަކީ ދެމެހެއްޓެނިވި ތަރައްގީއާއި ތިމާވެއްޓަށް ވަރަށް ބޮޑު އިސްކަމެއް ދޭ ސަރުކާރެއް ކަމަށެވެ.
ގަސް ނެގުމަށް ޖެހިއްޖެ ހާލަތްތަކުގައި ޢަމަލުކުރާނެ އުޞޫލުތަކާ ބެހޭގޮތުން ވާހަކަ ދައްކަވަމުން ރައީސް ވިދާޅުވީ، ޒަރޫރީ ބޭނުމަކަށް ނުވަތަ އިންސާނީ ދިރިއުޅުމަށް އުނދަގޫވާ ހާލަތެއްގައި، ޤާނޫނީ އިޖުރާއަތްތައް ފުރިހަމަކޮށް، ހަމަތަކާއި އުޞޫލުތަކުގެ މަތިން ގަހެއް ނެގުމަކީ ތިމާވެއްޓާ ދެކޮޅު ހެދުމެއް ނޫން ކަމަށެވެ. ނަމަވެސް، އެއް ގަސް ނަގައިފިނަމަ، މަދުވެގެން ތިން ގަސް އިންދަން ޖެހޭނެ ކަމަށް ވިދާޅުވި އެވެ. މިސާލެއްގެ ގޮތުން އެމަނިކުފާނު ފާހަގަކުރެއްވީ، ވިލިމާލެއިން ނަގާ ނިކަގަހުގެ ބަދަލުގައި، މުޅި ވިލިމާލޭގައި މަދުވެގެން ތިން ސަތޭކަ ގަސް އިންދުމުގެ ޕްރޮގްރާމް މިހާރު ފަށާފައިވާ ކަމެވެ.
”ދެ ގަހުގެ ބަދަލުގައި ތިން ސަތޭކަ ގަސް. އެހެންވީމާ، އަޅުގަނޑުމެންނަކީ ފެހިކުރުމަށް ލޯބިކުރާ ބަޔެކޭ،“ ރައީސް ވިދާޅުވި އެވެ.
ރައީސް މުއިއްޒު ވަނީ ތިމާވެއްޓާ ގުޅޭގޮތުން ސަރުކާރުން ކުރަމުންދާ މުހިންމު މަސައްކަތްތަކަށް އަލިއަޅުވާލައްވާފަ އެވެ. އެގޮތުން، ފަސް އަހަރު ތެރޭގައި ފަސް މިލިއަން ގަސް އިންދުމުގެ ޕްރޮގްރާމްގެ ވާހަކަ އެމަނިކުފާނު ފާހަގަކުރެއްވި އެވެ. މިހާރު ގާތްގަނޑަކަށް އެއް މިލިއަން ގަސް އިންދާފައިވާ ކަމަށާއި، ބާކީ ތިން އަހަރުގެ ތެރޭގައި މި ޢަދަދު ހަމަކުރުމަށް މަސައްކަތް ކުރައްވާނެ ކަމަށް ވިދާޅުވި އެވެ. މީގެ އިތުރުން، ބޭރުގެ ދޭދޭ ޤައުމުތަކާއި އެން.ޖީ.އޯ.ތަކުން ހަ މިލިއަނަށްވުރެ ގިނަ ގަސް އިންދުމަށް ޕްލެޖްކޮށްފައިވާ ކަމަށާއި، ސަރުކާރުގެ ބަޖެޓުން ޚަރަދުކޮށްގެންވެސް ރާއްޖޭގެ އެކި ހިސާބުތައް ފެހިކުރުމުގެ މަސައްކަތް ކުރިއަށްދާ ކަމަށް ވިދާޅުވި އެވެ.
އޭގެއިތުރުން ރައީސް މުއިއްޒު ވިދާޅުވީ މީގެކުރިން ދުވަހަކުވެސް ނުދޭ މިންވަރަށް މިހާރު ރިނިއުބަލް އެނަރޖީއަށް އިސްކަންދޭ ކަމަށެވެ. އަދި މިދިޔަ ދެ އަހަރުގެ ތެރޭގައި އެކަނިވެސް 100 މެގަވޮޓްގެ ހަކަތަ އުފައްދާފައިވާ ކަމަށާއި، ބާކީ ތިން އަހަރުގެ ތެރޭގައި ޤައުމީ ކަރަންޓުގެ ޑިމާންޑްގެ ތެރެއިން 33 ޕަސެންޓް ރިނިއުބަލް އެނަރޖީއިން ހަމަޖައްސާނެ ކަމުގެ ޔަޤީންކަން ދެއްވި އެވެ. މީގެ ސަބަބުން، ތެޔޮ އެތެރެކުރުމަށް ކުރަންޖެހޭ ބޮޑު ޚަރަދުން ސަރުކާރަށް ލުއިވެ، އެ ފައިސާ ބޭނުންތެރި އެހެން ކަންކަމަށް އިންވެސްޓް ކުރެވޭނެ ކަމަށް އެމަނިކުފާނު ވިދާޅުވި އެވެ.
މި ހުރިހާ ކަމަކީވެސް ދެމެހެއްޓެނިވި ތަރައްޤީ (ސަސްޓެއިނަބަލް ޑިވެލޮޕްމަންޓް) ގެ މުހިންމު ބައިތަކެއް ކަމަށް ރައީސް ވިދާޅުވިއެވެ.
