އެމްޑީޕީ ޗެެއާޕާސަންގެ މަސްއޫލިއްޔަތުތައް، ޤައުމީ މަޖިލީހުން ކަނޑައަޅާ ފަރާތަކާ ހަވާލު ކުރުމަށް ނިންމައިފި އެވެ.
އެމްޑީޕީން ރޭ ނެރުނު ނޫސްބަޔާނެއްގައި ބުނެފައިވަނީ ޗެއާޕާސަންގެ މަގާމުން ފައްޔާޒް އިސްމާއީލް އިސްތިއުފާދެއްވުމާ ގުޅިގެން، ޕާޓީގެ ހިންގުން ކުރިއަށް ގެންދާނެ ގޮތާއި އަދި މި ވަގުތަށް ކޮންމެހެން ހަމަޖައްސަންޖެހޭ ކަންކަމާމެދު އިއްޔެ ޕާޓީގެ ލީޑަރޝިޕުން މަޝްވަރާކޮށްފައިވާ ކަމަށެވެ.
މިކަމާ ގުޅޭގޮތުން އެމްޑީޕީގެ ލީޑަރޝިޕްއިން މަޝްވަރާ ކުރުމަށްފަހު ޤައުމީ ހިންގާ ކޮމިޓީގައި ވެސް މިކަމާ މަަޝްވަރާ ކުރިކަމަށް އެމްޑީޕީން ބުނެފައިވެ އެވެ.
އެގޮތުން ޤައުމީ ހިންގާ ކޮމިޓީން ނިންމައިފައިވަނީ، ޗެއާޕާސަންގެ މަގާމަށް މީހަކު އިންތިހާބު ކުރެވެންދެން އެ މަގާމުގެ މަސްއޫލިއްޔަތުތައް، ޤައުމީ މަޖިލީހުން ކަނޑައަޅާ ފަރާތަކާ ވަގުތީގޮތުން ހަވާލު ކުރުމަށް ކަމަށާއި އަދި، ޗެއާޕާސަންގެ އިންތިހާބު ބާއްވާނެ ތާރީޚެއް ކަނޑައެޅުމަށް، ވަރަށް އަވަހަށް ގައުމީ މަޖިލީހުގެ ބައްދަލުވުމެއް ބާއްވައިދިނުމަށް ހުށަހެޅުމަށް ކަމަށް އެމްޑީޕީން މައުލޫމާތުދީފައިވެ އެވެ.
”ދެންނެވު ކަންކަމުގައި، ޕާޓީން ކުރިއަށްދާނީ، ހުޅުވައިލެވިފައިވާ މާހައުލެއްގައި އަދި ފުޅާދާއިރާއެއްގައި މަޝްވަރާކުރުމަށްފަހު ޤައުމީ މަޖިލީހުން ނިންމާގޮތެއްގެ މަތިންކަމުގައި ދަންނަވަމެވެ.“ އެމްޑީޕީން ބުނެފައިވެ އެވެ.
ފައްޔާޒް އެމްޑީޕީގެ ޗެއާޕާސަންގެ މަގާމުން އިސްތިއުފާ ދެއްވީ މިދިޔަ އާދީއްތަ ދުވަހުގެ ރޭ ބޭއްވި އެޕާޓީގެ ގައުމީ މަޖިލީހުގެ ބައްދަލުވުމަށްފަހު އެވެ. އެމްޑީޕީގެ ޗެއާޕާސަންގެ މަގާމުން އިސްތިއުފާ ދެއްވަން ފައްޔާޒް ނިންމެވި ސަބަބެއްގެ ގޮތުގައި އޭނާ ވިދާޅުވީ އަންނަ ރިޔާސީ އިންތިހާބުގައި އެމްޑީޕީގެ ޓިކެޓުގައި ވާދަކުރެއްވުމުގެ ޝައުގުވެރިކަން އޭނާ ފާޅުކުރެއްވިފަހުން ޕާޓީގެ މަސައްކަތްތައް ކުރިއަށް ގެންދިއުމަށް ގޮންޖެހުންތަކެއް ކުރިމަތިވާތީ އެވެ. އެކަމުގެ ސަބަބުން ބޮޑެތި ގޮންޖެހުންތަކެއް ޕާޓީ ހިންގުމުގައި ދިމާވާކަން ގައުމީ މަޖިލީހުގެ މެންބަރުންނަށްވެސް އެނގިވަޑައިގަންނަވާނެ ކަމަށް ފައްޔާޒް ވިދާޅުވި އެވެ.
