ރާއްޖޭގެ ކަނޑުގެ ސަރަހައްދުން އަތުލައިގަތް ސްރީލަންކާގެ ބޯޓަކުން 350 ކިލޯގެ މަސްތުވާތަކެތި ފެނުނު މައްސަލާގައި ލަންކާގެ ކަމާ ގުޅުންހުރި އިދާރާތަކާ ގުޅިގެން އިތުރު އޮޕަރޭޝަންތަކެއް ހިންގަންޖެހިދާނެ ކަމަށް ފުލުހުން ބުނެފި އެވެ.
މިއަދު ފުލުހުން ކުރިއަށްގެންދިޔަ ޕްރެސް ކޮންފަރެންސްގައި ލަންކާ ބޯޓުން ފެނުނު މަސްތުވާތަކެއްޗާއި ގުޅޭގޮތުން މައުލޫމާތުދެމުން ފުލުހުން ބުނެފައިވަނީ، މި މައްސަލައިގައި ލަންކާގެ ކަމާބެހޭ ފަރާތްތަކާ ގުޅިގެން އިތުރު ފަރާތްތަކާ ސުވާލުކޮށް އިތުރު އޮޕަރޭޝަންތަކެއް ހިންގަންޖެހިދާނެ ކަމަށެވެ.
އެހެންކަމުން އެ މައްސަލައިގައި އިތުރު މައުލޫމާތެއް އަދި ހާމަކުރެވެން ނެތްކަމަށް ފުލުހުން މިއަދު ޕްރެސް ކޮންފަރެންސްގައި ބުނެފައިވެ އެވެ.
މި މަސްބޯޓު އަތުލައިގަތީ މި މަހުގެ 7 ވަނަ ދުވަހު އެވެ. އެ މަސްބޯޓު ފެނުނީ ބޭރުގެ ބޯޓެއް ގާނޫނާ ހިލާފަށް ރާއްޖޭގެ ކަނޑުގެ ސަރަހައްދުގައި ހަރަކާތެރިވާކަން ފާހަގަކުރެވިގެން ސިފައިންގެ ވައިގެ ހިދުމަތް، އެއާ ކޯއިން ޑްރޯން ބޭނުންކޮށްގެން ހިންގި ސަވެއިލަންސް އޮޕަރޭޝަނެއްގަ އެވެ.
މި މަސްބޯޓު ރާއްޖޭގެ ސަރަހައްދަށް ވަދެފައިވަނީ އެއްވެސް ހުއްދައެއް ނެތި ގާނޫނާއި ގަވާއިދާ ހިލާފަށެވެ.
މި އޮޕަރޭޝަނާއި ގުޅިގެން ފުރަތަމަ ފަހަރަށް ފުލުހުން ނެރުނު ބަޔާނުގައި ބުނީ ދިވެހި ސިފައިން މި އުޅަނދު ބަލައި ފާސްކުރި އިރު، މަސްތުވާތަކެތިކަމަށް ޝައްކުކުރެވޭ ގޯނިތަކެއް ހުރިކަން ފާހަގަކުރެވިގެން، އުޅަނދާއި އުޅަނދުގައި ތިބި 05 ފަޅުވެރިން މި މަހުގެ 9 ވަނަ ދުވަހު ދިވެހި ފުލުހުންގެ ހިދުމަތާ ހަަވާލުކޮށްފައިވާ ކަމަށެވެ. އަދި މި މަހުގެ 10 ވަނަ ދުވަހު ކޯޓު އަމުރެއްގެ ދަށުން އުޅަނދު ބަލައި ފާސްކުރި އިރު މަސްތުވާތަކެތިކަމަށް ޝައްކުކުރެވޭ އެއްޗެއްހުރި 24 ގޯނި ފެނިފައިވާކަމަށް ފުލުހުން ބުންޏެވެ.
ފުލުހުން ބުނި ގޮތުގައިއ މިތަކެތީގެ ވަގުތީ ބަރުދަނުގައި 355.9 ކިލޯ ގްރާމް ހުރި އިރު، އޭގެތެރޭގައި ހިމެނެނީ ހެރޮއިން ކަމަށް ޝައްކުކުރެވޭ 58.6 ކިލޯ ގްރާމް އަދި މެތަމްފެޓަމިން ކަމަށް ޝައްކުކުރެވޭ 297.3 ކިލޯ ގްރާމްގެ ތަކެއްޗެވެ.
މި މައްސަލަ، ދިވެހި ފުލުހުންގެ ހިދުމަތް، މޯލްޑިވްސް ނޭޝަނަލް ޑިފެންސް ފޯސް، ސްރީލަންކަން ނޭވީ، އަދި ސްރީލަންކަން ޕޮލިސް ގުޅިގެން ދަނީ ތަހުގީގު ކުރަމުން ކަމަށް ފުލުހުން ބުންޏެވެ.
