ދައުލަތުގެ ޕޭ ފްރޭމްވޯކަށް ސަރުކާރުން މިދިޔަ މަހު ގެނައި ބަދަލާ ގުޅިގެން، މި މަހުން ފެށިގެން މުސާރަ ކުޑަވެފައިވާ ކަމަށް ބުނެ، ޝަރުއީ ދާއިރާގެ 600 އަށް ވުރެ ގިނަ މުވައްޒަފުންގެ ސޮޔާއެކު, ކަމާ ގުޅުންހުރި އިދާރާތަކަށް ޕެޓިޝަނެއް ހުށަހަޅައިފި އެވެ.
އެނގިފައިވާ ގޮތުގައި ޝަރުއީ ދާއިރާގެ 609 މުވައްޒަފުންގެ ސޮޔާއެކު، ޝަރުއީ ދާއިރާގެ މުވައްޒަފުން ވަނީ ރައީސް އޮފީހަށާއި ރައްޔިތުންގެ މަޖިލީހަށާއި ޖުޑީޝަލް ސާވިސް ކޮމިޝަންއަށް ޕެޓިޝަން ހުށަހަޅައިފަ އެވެ.
ޝަރުއީ ދާއިރާގެ މުވައްޒަފުންގެ ޕެޓިޝަންގައި ބުނެފައިވަނީ، މުސާރައިގެ އާ އޮނިގަނޑަށް މުވައްޒަފުން ގެންދިއުމުގައި ޝަރުތުތަކަށް ރިއާޔަތްކުރުމެއްނެތި ދަށް ރޭންކުތަކަށް މުވައްޒަފުން ބަދަލުކޮށްފައިވާ ކަމަށާއި އަދި ގިނަ އަހަރުތަކެއް ވަންދެން އެ ދާއިރާއަށް ޚިދުމަތްކުރި މުވައްޒަފުންނަށް ދެމުން ދިޔަ އިނާޔަތްތައް ކަނޑާލުމުން މުވައްޒަފުން މާޔޫސްވެފައި ތިބި ކަމަށެވެ.
ދައުލަތުގެ ބައެއް އިދާރާތަކުން މުވައްޒަފުން ހާސިލްކޮށްފައިވާ ސެޓްފިކެޓަށް ބަލައި، މަތީ ރޭންކުތަކަށް މުވައްޒަފުންނަށް ކުރިއެރުން ދެމުން އައި ނަމަވެސް، ޝަރުއީ ދާއިރާގައި އެފަދަ ފުރުސަތުތައް ފަހިވެފައި ނެތް ކަމަށްވެސް އެ މުވައްޒަފުންގެ ޕެޓިޝަންގައި ބުނެފައިވެ އެވެ.
މުސާރައަށް ގެނައި ބަދަލާ ގުޅިގެން އެކަމުގެ ހިތްހަމަނުޖެހުން ފާޅުކުރުމުގެ ގޮތުން ޝަރުއީ ދާއިރާގައި މަސައްކަތްކުރާ މުވައްޒަފުން އިއްޔެ މަސައްކަތަށް ނިކުމެފައިވަނީ ކަޅު ހެދުމުގަ އެވެ.
