މާލޭގެ ޕާކިން މައްސަލައަށް ހައްލެއް ހޯދުމުގެ ގޮތުން، ޕާކިން ބިލްޑިންތައް ގާއިމް ކުރުމުގެ މަސައްކަތް ކުރިއަށް އޮތް މަހެއްހާ ދުވަހުގެ ތެރޭގައި ކޮންޓްރެކްޓަރުންނާ ހަވާލުކުރުމަށް ހަމަޖެހިފައިވާ ކަމަށް ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވެއްޖެ އެވެ.

މިނިސްޓަރު މިކަން ހާމަކުރެއްވީ ދައުލަތުގެ މީޑިޔާ ޕީއެސްއެމްގެ ޕްރޮގްރާމެއްގައި ވާހަކަ ދައްކަވަމުންނެވެ.

މިނިސްޓަރު އަމީން ވިދާޅުވީ މާލޭގެ ޕާކިން އާއި ވެހިކަލް މައްސަލަ ހައްލުކޮށްދިނުމަށް ސަރުކާރުން ހާއްސަ އިސްކަމެއް ދެއްވާ ކަމަށާއި، އެ ގޮތުން މާލެ ސަރަހައްދުގައި ޕާކިން ބިލްޑިންތަކެއް އެޅުމަށް ނިންމާފައިވާ ކަމަށެވެ. މި ބިލްޑިންތަކުގެ ޖުމްލަ ޖާގައިގައި 7500 އެއްހާ އުޅަނދު ޕާކު ކުރެވޭނެ ކަމަށް އޭނާ ވިދާޅުވި އެވެ.

އަމީން ވިދާޅުވީ މި ޕްރޮޖެކްޓްގެ މަސައްކަތް އޮތީ ކޮންޓްރެކްޓަރުންނާ ހަވާލުކުރުމުގެ މަރުހަލާގައި ކަމަށެވެ.

”އެއް މަސް ތެރޭ ކޮންޓްރެކްޓަރުންނާ ޙަވާލުކުރާނެ. އަދި 3-4 މަސް ތެރޭގައި ޢަމަލީ މަސައްކަތްތައް ފެށޭނެ.“

މި ބިލްޑިންތަކުގައި ވިޔަފާރި އުސޫލުން ދޫކުރާ ޕާކިން ސްލޮޓްތަކާއި، އާއްމު ޚިދުމަތްތަކަށް ބޭނުންކުރާ ވެހިކަލްތަކަށް ޚާއްސަ ސްލޮޓްތައް ވެސް ހިމެނޭނެ ކަމަށް އަމީން ވިދާޅުވި އެވެ.

މީގެ ކުރިން އޮކްޓޯބަރު 27 ވަނަ ދުވަހު ރައްޔިތުންގެ މަޖިލީހަށް ހާޒިރުވެ މިނިސްޓަރު އަމީން ވަނީ މި މަސައްކަތް ކުރިއަށް ގެންދަނީ ޑިޒައިން ބިލްޑިން އޮޕަރޭޓް ކޮންސެޕްޓް ގެ ދަށުން ކަމަށް ވިދާޅުވެފަ އެވެ. އަދި އެ ދުވަހު ވެސް ވިދާޅުވެފައިވަނީ ވަކި މުއްދަތެއްގައި މަސައްކަތް ނިންމާގޮތަށް 30 އަކަށް ދުވަހުގެ ތެރޭގައި މި މަސައްކަތް ބަޔަކާ ހަވާލު ކުރެވޭނެ ކަމަށެވެ. މިހާރު މި މަސައްކަތް ކޮންޓްރެކްޓަރުންނާ ހަވާލުކުރުމުގެ މަރުހަލާގައިވާ އިރު، މާލޭގެ ޕާކިން މައްސަލައަށް ދާއިމީ ހައްލެއް ލިބޭނެ ކަމަށް ސަރުކާރުން އުންމީދު ކުރެ އެވެ.

މިނިސްޓަރު މުހައްމަދު އަމީން މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ