ސުލްހަވެރިކަމާއެކު އެއްވެއުޅުމުގެ މިނިވަންކަމުގެ ޤާނޫނު އުވާލުމަށް ރައްޔިތުންގެ މަޖިލީހަށް ހުށަހެޅި ބިލް ބަލައިނުގަނެ ބޭރުކޮށްލައިފި އެވެ.

މި ބިލް ހުށަހެޅުއްވީ ގަލޮޅު ދެކުނު ދާއިރާގެ މެންބަރު މީކާއީލު އަހްމަދު ނަސީމް އެވެ. މީކާއިލް ހުށަހެޅުއްވީ ސުލްހަވެރިކަމާއެކު އެއްވެއުޅުމުގެ މިނިވަންކަމުގެ ޤާނޫނު އުވާލުމަށެވެ.

ރައްޔިތުންގެ މަޖިލީހުގެ މިއަދުގެ ޖަލްސާގައި މި ބިލް ބޭރުކޮށްލާފައިވަނީ ވޯޓުގައި ބައިވެރިވި މެންބަރުންގެ ތެރެއިން 48 މެންބަރުންގެ ވޯޓުންނެވެ. މި ބިލް ބަލައިގަތުމަށް ވޯޓުދެއްވީ 11 މެންބަރުންނެވެ.

ކުރީގެ ރައީސް އަބްދުﷲ ޔާމީންގެ ވެރިކަމުގައި އެ ޤާނޫނަށް ގެނައި އިސްލާހުގައި ބުނެފައިވަނީ، ވެރިކަން ކުރާ މާލޭގައި އެއްވެސް ބާވަތެއްގެ އެއްވުމެއް ނުވަތަ ހިނގާލުމެއްވެސް ބޭއްވޭނީ ފުލުހުން ދޭ ހުއްދައަކާއެކު ހޯމް މިނިސްޓްރީން ކަނޑައަޅާފައިވާ ތަންތަނުގައި އެކަނި ކަމަށެވެ. މި އިސްލާހު އުވާލުމަކީ، އަދި އެއްވެ އުޅުމުގެ މިނިވަންކަން އެންމެ ފުޅާމިނުގައި ދިނުމަކީ ކުރީގެ ރައީސް އިބްރާހިމް މުހައްމަދު ސޯލިހްގެ ރިޔާސީ ވައުދުފުޅެކެވެ. ނަމަވެސް އެމްޑީޕީ ސަރުކާރުގެ 5 އަހަރު ނިންމާލިއިރު އެކަން އޮތީ މަޖިލީހުގައި ”ޕާކު“ ކޮށްފަ އެވެ.

މިދިޔަ ރައްޔިތުންގެ މަޖިލީހުގައި ކާށިދޫ ދާއިރާގެ އޭރުގެ މެންބަރު އަބްދުﷲ ޖާބިރު ވަނީ 2019 އޮގަސްޓް 8 ވަނަ ދުވަހު، ސުލްހަވެރިކަމާއެކު އެއްވެ އުޅުމުގެ މިނިވަންކަމުގެ ގާނޫނަށް ކުރީގެ ރައީސް ޔާމީންގެ ވެރިކަމުގައި ގެނައި އިސްލާހު އުވާލުމަށް މަޖިލީހަށް ހުށަހަޅާފަ އެވެ. އެ ބިލް ކޮމިޓީ މަސައްކަތް ނިންމުމަށްފަހު އެއްފަހަރު ތަޅުމަށް ފޮނުވުމުން ތަޅުމުން އޭރުވަނީ އެ ބިލް އަނބުރާ ކޮމިޓީއަށް ފޮނުވާލާފަ އެވެ. އޭގެފަހުން މި މަސައްކަތް ކޮމިޓީން ކުރިއަށްގެންގޮސްފައެއް ނުވެ އެވެ.

އެމްޑީޕީގެ ސުޕަރ މެޖޯރިޓީ މަޖިލިސްގެ ދައުރު ނިންމާލީ، އަދި އެމްޑީޕީ ސަރުކާރުގެ ފަސް އަހަރު ނިންމާލީ މި އިސްލާހު ނުގެނެސް، ކުރިންވެސް އޮތްގޮތަށް އެއްވެއުޅުމުގެ ޤާނޫނު ބާއްވައިގެންނެވެ.

ރައްޔިތުންގެ މަޖިލިސް އެމްޑީޕީ މެންބަރު މީކާއިލް ނަސީމް