އަތޮޅު ކައުންސިލްތައް އުފެއްދުމަށް ޤާނޫނުއަސާސީން ލާޒިމުކުރާ ކުރުން އުވާލުމަށް މުޅި މަޖިލީހުގެ ކޮމިޓީން ފާސްކޮށްފި އެވެ.

ސަރުކާރުގެ ފަރާތުން ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއަށް އިސްލާހު ހުށަހެޅުމުގެ ބިލް މަޖިލީހަށް ހުށަހެޅުއްވީ ބާރަށު ދާއިރާގެ މެންބަރު އިބްރާހީމް ޝުޖާއު އެވެ. މި ބިލް ދިރާސާ ކުރުމުގެ މަސައްކަތް ކުރިއަށްގެންގޮސްފައިވަނީ މުޅި މަޖިލީހުގެ ކޮމިޓީންނެވެ.

މިއަދު ކުރިއަށްގެންދިޔަ މުޅި މަޖިލީހުގެ ކޮމިޓީގައި، ބިލަށް ކޮމިޓީން ގެނައި އިސްލާހާއެކު ފާސްކޮށްފައިވަނީ ވޯޓުގައި ބައިވެރިވި 52 މެންބަރުންގެ ވޯޓުންނެވެ. މި އިސްލާހު ފާސްކުރުމާ ދެކޮޅަށް 10 މެންބަރުން ވޯޓުދެއްވާފައިވެ އެވެ.

އަތޮޅު ކައުންސިލްތައް އުވާލަށް ޤާނޫނުއަސާސީއަށް ހުށަހެޅި އިސްލާހުގައި، ޤާނޫނުއަސާސީގެ 230 ވަނަ މާއްދާގެ (ށ) އަށް އިސްލާހު ހުށަހަޅާފައިވެ އެވެ. އެގޮތުން، ލާމަރުކަޒީ އުސޫލުން އިދާރީ ދާއިރާތައް ހިންގުމަށްޓަކައި، ޤާނޫނުގައި ކަނޑައަޅައިފައިވާ ގޮތުގެމަތީން އިދާރާތަކާއި، މަޤާމުތަކާއި ރަށުކައުންސިލްތަކާއި ސިޓީކައުންސިލްތައް އުފެއްދުމުގެ ބާރު ރައީސުލްޖުމްހޫރިއްޔާއަށް ލިބިގެންވާ ކަމަށް އިސްލާހުގައި ވަނީ ބަޔާންކޮށްފަ އެވެ.

ޤާނޫނުއަސާސީއަށް ހުށަހެޅި އިސްލާހުގައި ވަނީ ޤާނޫނުއަސާސީގެ 231 ވަނަ މާއްދާ ”ކައުންސިލްތައް އިންތިޚާބުކުރުން“، މި މާއްދާގެ (ހ) ގައި އަތޮޅު ކައުންސިލްތައް އިންތިހާބުކުރާނެގޮތް ބަޔާންކޮށްފައިވާ 3 ވަނަ ނަންބަރު އުނިކުރުމަށެވެ. އަދި 231 ވަނަ މާއްދާގެ (ށ) ގައި އަތޮޅު ކައުންސިލް ހިމެނޭބައިތައް އުނިކުރުމަށްވެސް ހުށަހަޅާފައިވެ އެވެ. 

އަތޮޅު ކައުންސިލްތައް އުވާލާ ކައުންސިލްތަކުގެ މެންބަރުންގެ އަދަދު މަދުކުރުމަށް ސަރުކާރުން ޤާނޫނުއަސާސީގެ އިތުރުން ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނު އަދި ލޯކަލް ކައުންސިލްތަކުގެ އިންތިޚާބުގެ ޤާނޫނަށްވެސް އިސްލާހު ހުށަހަޅާފައިވެ އެވެ.

ރައްޔިތުންގެ މަޖިލިސް ލާމަރުކަޒީ ނިޒާމް