ރައްކާތެރި އަދި ދެމެހެއްޓެނެވި ގޮތެއްގައި ކުނި މެނޭޖްކުރުމަކީ ތިމާވެށި ރައްކާތެރިކުރުމަށާއި، އާއްމު ސިއްހަތު ރައްކާތެރިކުރުމަށް ކޮންމެހެން ކުރަންޖެހޭ ކަމެއް ކަމަށާއި އެކަން ކުރެވޭނީ ފަރުދީ ޒިންމާ ނަގައިގެންކަމަށް އެންވާރަމެންޓް މިނިސްޓަރު ޠާރިޤް އިބްރާހިމް ވިދާޅުވެއްޖެ އެވެ.

މިނިސްޓަރު ޠާރިޤް މިހެން ވިދާޅުވީ ލ. ގަމުގައި ކުރިއަށްދާ ”މަގޭ ސާފު ރާއްޖެ ޤައުމީ މަހާސިންތާ 2025 – ޒޯން 2، 4، އަދި 5“ ފެށުމުގެ ރަސްމިއްޔާތުގައި ވީޑިއޯ މެދުވެރިކޮށް މަހާސިންތާގެ ބައިވެރިންނާ ދެއްކެވި ވާހަކަފުޅުގަ އެވެ. މި މަހާސިންތާ ފެށުމުގް ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރު ޠާރިޤް އިބްރާހިމް ވަނީ، ރައްކާތެރި މާހައުލެއް ބިނާކުރުމަށް ސަރުކާރުން ކުރައްވާ މަސައްކަތްތަކުގެ މައްޗަށް އަލިއަޅުވާލައްވައި، ކުނި މެނޭޖްކުރުމުގައި ފަރުދީ ޒިންމާގެ މުހިންމުކަން ވަރަށް ބޮޑަށް ފާހަގަކުރައްވާފަ އެވެ.

މިނިސްޓަރު ޠާރިޤް ވަނީ ރައްކާތެރި އަދި ދެމެހެއްޓެނެވި ގޮތެއްގައި ކުނި މެނޭޖްކުރުމަކީ ތިމާވެށި ރައްކާތެރިކުރުމަށާއި، އާއްމު ސިއްހަތު ރައްކާތެރިކުރުމަށް ކޮންމެހެން ކުރަންޖެހޭ ކަމެއް ކަމަށާއި ރައްކާތެރި، ސާފު ތާހިރު މާހައުލެއްގައި ދިރިއުޅުމަކީ އެންމެންގެ ހައްގެއް ނަމަވެސް، މި މަޤްޞަދު ޙާޞިލްކުރެވޭނީ އެންމެން އެކަމުގައި ފަރުދީ ޒިންމާ ނަގައި، ގުޅިގެން މަސައްކަތްކޮށްގެން ކަމަށް ވިދާޅުވެފަ އެވެ.

މި މަހާސިންތާގެ މައިގަނޑު މަޤްޞަދަކީ މިފަދައިން މަސައްކަތް ކުރުމަށް މަގު ފަހިކުރުން ކަމަށް މިނިސްޓަރު ވިދާޅުވި އެވެ. މި ބައްދަލުވުމުގައި ސިޔާސަތުތައް ކަނޑައަޅާ ފަރާތްތަކާއި، ކުނި މެނޭޖްކުރުމުގެ ޢަމަލީ މަސައްކަތުގައި އުޅުއްވާ ފަރާތްތަކާއި، އަދި ޖަމިއްޔާ ޖަމާޢަތްތައް ބައިވެރިވުމަކީ ބައްދަލުވުން އިތުރަށް މުއްސަނދިވެގެންދާނެ ކަމެއް ކަމުގައި ދެކެވަޑައިގަންނަވާ ކަމަށް މިނިސްޓަރު ވިދާޅުވި އެވެ.

މިނިސްޓަރު ޠާރިޤް ވިދާޅުވީ، ރައްކާތެރި އަދި ދެމެހެއްޓެނިވި ގޮތުގައި ކުންޏާއި ވަޞީލަތްތައް މެނޭޖްކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ވަރަށް ބޮޑު އިސްކަމެއް ދެއްވާ މަސައްކަތެއް ކަމަށެވެ. މި ސަރުކާރުގެ ފުރަތަމަ 14 ހަފުތާގެ ތެރޭގައި، ކުންޏާއި ވަޞީލަތްތައް މެނޭޖްކުރުމުގެ ޤައުމީ ޕްރޮގްރާމް – ”މަގޭ ސާފު ރާއްޖެ“ އެކުލަވާލައި ތަންފީޒުކުރުމުގެ ޢަމަލީ މަސައްކަތް ވަނީ ފަށާފައިވާކަން މިނިސްޓަރު ފާހަގަކުރެއްވި އެވެ.

މިއަދާ ހަމައަށް، ރާއްޖޭގެ 137 ރަށެއްގައި ކުނި މެނޭޖްކުރުމުގެ އިންފްރާސްޓްރަކްޗަރ ތަރައްޤީކުރުމުގެ މަސައްކަތް ވަނީ ސަރުކާރު ހިއްސާވާ ކުންފުނިތަކާއި ބައެއް އަމިއްލަ ކުންފުނިތަކަށް ހަވާލުކޮށްފަ އެވެ. އަދި ކުނި މެނޭޖްކުރާ މަރުކަޒުތަކުގެ މަސައްކަތް ނިމުމުން، އެތަންތަނަށް ބޭނުންވާ އިކުއިޕްމަންޓްތައް ފޯރުކޮށްދިނުމުގެ މަސައްކަތް ވެސް މިހާރު ވަނީ ފަށާފަ އެވެ. މި މަސައްކަތްތައް ނިމުމުން، ރާއްޖޭގެ މީހުން ދިރިއުޅޭ ކޮންމެ ރަށެއްގައި ވެސް އެރަށަކާއި އެކަށޭނަ އެންމެ ޒަމާނީ ކުނި މެނޭޖްކުރުމުގެ ނިޒާމެއް ޤާއިމުކުރެވި، އޭގެ ފައިދާ ރައްޔިތުންނަށް ލިބިގެންދާނެކަމުގެ އުންމީދު މިނިސްޓަރު ޠާރިޤް ފާޅުކުރެއްވި އެވެ.

މި މަހާސިންތާ ބާއްވަމުން ދަނީ ވޯލްޑް ބޭންކުގެ އެހީގައި ހިންގާ މޯލްޑިވްސް ކްލީން އެންވަޔަރަންމަންޓް ޕްރޮޖެކްޓްގެ ދަށުންނެވެ. މި ޕްރޮޖެކްޓް މި ނޮވެމްބަރު މަހުގެ ނިޔަލަށް ނިންމުމަށް ހަމަޖެހިފައިވާއިރު، ޕްރޮޖެކްޓްގެ މުއްދަތުގައި ރާއްޖޭގެ ކުނި މެނޭޖްކުރުމުގެ މައްސަލަ ހައްލުކުރުމަށް ގިނަ މަސައްކަތްތަކެއް ކޮށްފައިވާކަން މިނިސްޓަރު ފާހަގަކުރެއްވި އެވެ. އަދި މި ޕްރޮޖެކްޓުން ކޮށްފައިވާ މަސައްކަތްތައް ދެމެހެއްޓެނެވި ގޮތެއްގައި ކުރިއަށް ގެންދިއުމުގެ އުއްމީދު އެބަހުރި ކަމަށް ވެސް މިނިސްޓަރު ޠާރިޤް ވިދާޅުވި އެވެ.

މަގޭ ސާފުރާއްޖެ - ކުނި މެނޭޖްކުރުމުގެ ޤައުމީ މަޝްރޫޢު 2028-2024 މަގޭ ސާފުރާއްޖެ ޤައުމީ މަހާސިންތާ މިނިސްޓަރ ޠާރިޤު އިބްރާހީމް މިނިސްޓްރީ އޮފް ޓޫރިޒަމް އެންޑް އެންވަޔަރަންމަންޓް