ތިލަމާލެ ބްރިޖްގެ މަސައްކަތް ނިމުމާ ގާތްވުމާއެކު، ވިލިމާލޭގައި ވެހިކަލް ޕާކްކުރުމަށް ޚާއްސަ ޕާކިން ބިލްޑިންގއެއް ހެދުމުގެ މަސައްކަތް ކުރިއަށްދާ ކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު ވިދާޅުވެއްޖެ އެވެ.
މިނިސްޓަރު މުއްތަލިބު މިކަން ހާމަކުރެއްވީ ރައީސް ޑރ. މުހައްމަދު މުއިއްޒު ވިލިމާލޭ ރައްޔިތުންނާ ބައްދަލުކުރެއްވުމަށް ބޭއްވި ޖަލްސާގައި ވާހަކަ ދައްކަވަމުންނެވެ. ތިލަމާލެ ބްރިޖުގެ މަސައްކަތް ކުރިއަށްދާ ސްޕީޑާ މެދު ކަންބޮޑުވުން ފާޅުކުރައްވައި މިނިސްޓަރު ވިދާޅުވީ، މަސައްކަތް ކުރިއަށްދަނީ ބޭނުންފުޅުވާ ސްޕީޑަށް ވުރެ ލަހުން ކަމަށެވެ. ނަމަވެސް ބްރިޖުގެ ސަބް ސްޓްރަކްޗާގެ މޫދު އަޑީގެ ހުރިހާ މަސައްކަތެއް ނިމިފައިވާ ކަމަށާއި، ސުޕަސްޓްރަކްޗާގެ މަސައްކަތް ވެސް ކުރިއަށްދާ ކަމަށް އޭނާ ފާހަގަކުރެއްވި އެވެ.
މަސައްކަތް ލަސްވާ ސަބަބާ ގުޅޭގޮތުން މުއްތަލިބު ވިދާޅުވީ، މިފަދަ ބޮޑު މަޝްރޫޢެއް އަލަށް ކުރާ ކޮންޓްރެކްޓަރަކަށް މަސައްކަތް ހަވާލުކޮށްފައިވުމުގެ ސަބަބުން ބޮޑެތި ދަތިތަކާ ކުރިމަތިވަމުން އަންނަ ކަމަށެވެ. އަދި ކޮންޓްރެކްޓުގައި ފާހަގަކޮށްފައިވާ މުއްދަތަށް މަޝްރޫޢު ނުނިމިދާނެ ކަމަށް ވެސް ވިދާޅުވި އެވެ. ނަމަވެސް ވީހައިވެސް އަވަހަށް ޕްރޮޖެކްޓް ކުރިއަށް ގެންދިއުމަށް ސަރުކާރުން މަސައްކަތް ކުރަމުން އަންނަ ކަމަށް މިނިސްޓަރު ވިދާޅުވި އެވެ.
އޭގެއިތުރުން މިނިސްޓަރު ރޭގެ ބައްދަލުވުމުގަައި ވަަނީ ބްރިޖާއެކު، ވިލިމާލެއަށް އަންނާނެ ބަދަލުތަކާއި، ސަރުކާރުގެ ސިޔާސަތާއި ގުޅޭ މައުލޫމާތުތަކެއްވެސް ހިއްސާކުރައްވާފަ އެވެ. އެގޮތުން މިނިސްޓަރ ވިދާޅުވީ ސަރުކާރުގެ އަމާޒަކީ ބްރިޖް މެދުވެރިކޮށް ވިލިމާލެއަށް އަންނަ އެއްވެސް އިންޖީނުލީ ވެހިކަލެއް ރަށުތެރޭގައި ދުއްވުމަށް ހުއްދަ ނުދިނުން ކަމަށެވެ. އެކަމަށް ވިލިމާލޭގަ ޕާކިންގ ބިލްޑިންއެއް ހެދުމުގެ މަސައްކަތް ކުރަމުން އަންނަކަމަށް މިނިސްޓރ ވިދާޅުވި އެވެ.
ވިލިމާލޭގައި ޕާކިން ބިލްޑިން ހެދުމަށް ހަމަޖެހިފައިވަނީ ބްރިޖުން ފައިބާ ސަރަހައްދުގައިވާ ހުސްބިމުގަ އެވެ. މި މަސައްކަތް ކުރިއަށްގެންދަނީ އިންޑިއާގެ އެލްއޯސީ (ލައިން އޮފް ކްރެޑިޓް) ގެ ދަށުންނެވެ.
މިނިސްޓަރު މުއްތަލިބު ވިދާޅުވީ، ސަރުކާރުގެ ވިސްނުމަކީ ވިލިމާލެއަށް އަންނަ އެއްވެސް އިންޖީނުލީ ވެހިކަލެއް ރަށުތެރޭގައި ދުއްވުމުގެ ބަދަލުގައި، އެ ޕާކިން ސަރަހައްދުގައި ޕާކުކުރުމަށްފަހު، ޕަބްލިކް ޓްރާންސްޕޯޓް ނުވަތަ އެހެނިހެން ވަސީލަތްތައް ބޭނުންކޮށްގެން ދަތުރުފަތުރު ކުރުމަށް މަގުފަހި ކުރުން ކަމަށެވެ.
”އަޅުގަނޑުމެން އެ ސަރަހައްދުގައި ޕާކު ކޮށްފައި ޕަބްލިކް ޓްރާންސްޕޯޓް ނޫނިއްޔާ ދެން އެ އޮންނަ ވަސީލަތެއް ބޭނުން ކޮށްގެން ވިލިމާލޭގަ ދަތުރުފަތުރު ކުރުމަށް މަގުފަހި ކުރުން. އެއީ ސަރުކާރުގެ ވިސްނުމަކީ.“ މުއްތަލިބު ވިދާޅުވިއެވެ.
މީގެ އިތުރުން ތަރައްގީގެ މަސައްކަތްތަކުގައި ވިލިމާލޭގެ ގުދުރަތީ ރީތިކަން ހިފަހައްޓައި، ވީހައިވެސް މަދު ގަހެއް ކަނޑައިގެން މަސައްކަތް ކުރިއަށް ގެންދިއުމަށް ސަރުކާރުން އަމާޒު ހިފައިފައިވާ ކަމަށް މިނިސްޓަރު ވިދާޅުވި އެވެ. އެގޮތުން ރައްޔިތުންގެ ހިޔާލާއި މަޝްވަރާ ހޯދައިގެން ތަރައްގީގެ ކަންކަން ކުރިއަށް ގެންދާނެ ކަމަށް ވެސް ޑރ. މުއްތަލިބު ވިދާޅުވި އެވެ.
ވިލިމާލެ މިނިސްޓަރު ޑރ. އަބްދުﷲ މުއްތަލިބު މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ ތިލަމާލެ ބްރިޖް
