ޗައިނާގެ ހިލޭ އެހީގެ ދަށުން ކުރިޔަށްގެންދާ ގިނަ މަޝްރޫއުތަށް ކުރިޔަށް ގެންދަނީ ވިލިމާލޭގައި ކަމަށް ކޮންސްޓްރަކްޝަން މިނިސްޓަރ ޑރ. އަބްދުﷲ މުއްތަލިބް ވިދާޅުވެއްޖެ އެވެ.
މިނިސްޓަރ މިހެން ވިދާޅުވެފައި ވަނީ، ރައީސް ޑރ. މުހައްމަދު މުއިއްޒު ވިލިމާލެ ރައްޔިރުންނާއި ބައްދަލު ކުރެއްވުމަށް ބޭއްވި ބައްދަލުވުމުގައި ވާހަކަފުޅު ދައްކަވަމުންނެވެ.
މިނިސްޓަރ ވިދާޅުވީ، ޗައިނާގެ ހިލޭ އެހީގައި ހިނގާ ޕްރޮޖެކްޓް ތަކަކީ ވަރަށް ގިނަ މަރުހަލާތަކެއް ހިނގާ ޕޮރޮޖެކްޓްތަކެެއް ކަމަށެވެ. އެއީ ރައްޔިތުންގެ ފައިސާކަމުން ވަރަށް ގިނަ ކަންތައްތަކެއް ކޮށްގެން ޕްރޮޖެކްޓް އިމްޕްލިމޭޝަނައި ހަމަޔަށް ދެވޭ ކަމަށްވެސް މިނިސްޓަރ ވިދާޅުވި އެވެ.
100 އެނދުގެ ހޮސްޕިޓަލުގެ މަސައްކަތުގެ އަމަލީ މަސައްކަތް އަންނަ އަހަރުގެ މެދު ތެރޭގައި އަމަލީ މަސައްކަތް ފެށޭނެ ކަމަށާއި، 2 އަހަރުގެ ތެރޭގައި ހޮސްޕިޓަލްގެ މަސައްކަތް ނިމޭނެ ކަމަށް އުންމީދު ކުރަށްވާ ކަމަށްވެސް މިނިސްޓަރ ވިދާޅުވި އެވެ.
މި ހޮސްޕިޓަލް ނިމޭއިރު މި ހޮސްޕިޓަލް ވެގެންދާނީ ޒަމާނީ ފެންވަރުގެ ހުރިހާ ވަސީލަތްތަކެއް ގާއިމް ކުރެވިފައިހުރި ހޮސްޕިޓަލަކަށް ކަމަށާއި، މި ދައުރުގެ ތެރޭގައި ވިލިމާލޭގެ ރައްޔިތުންނަށް ތާޝަރީ ހޮސްޕިޓަލެއްގެ ހިދުމަތް ލިބިގެންދާނެ ކަަމަށް މިނިސްޓަރ ވިދާޅުވި އެވެ.
މީގެ އިތުރުން، މިނިސްޓަރ ވިދާޅުވީ، މާލެގެ ހުރިހާ މަގުތަކެއް ހެދުމަކީވެސް ޗައިނާގެ ހިލޭ އެހީގެ ދަށުން ކުރިޔަށްގެންދާ މަޝްރޫއުއެއް ކަމަށެވެ.
”އެބޭފުޅުންގެ ފީސިބިލިޓީ ޓީމް ވަޑައިގެން މާލޭގެ މަގުތަކުގެ ހާލަތު ބެއްލެވިއިރު އެބޭފުޅުން ގަބޫލު ކުރަށްވަނީ ވަރަށް ޑީޓެއިލް ދިޒައިންއެއް މަސައްކަތް ކޮށްގެންނޭ މާލޭގެ ފެންބޮޑުވުން ހައްލު ކުރެވޭނީ، މިހާރު އެދަނީ މާލޭގެ ބޮޑު އެއްމަގު ހެދުމާއި ޑިޒައިންގެ މަސައްކަތް ކުރިޔަށް.“
މިނިސްޓަރ އިތުރަށް ވިދާޅުވީ، ޑިޒައިންގެ މަސައްކަތް އަންނަ އަހަރުގެ ކުރީކޮޅު ފެށިގެންދާނެ ކަމަށެވެ.
