ހައިކޯޓުގެ ފަނޑިޔާރުކަމުގެ މަގާމުގައި ހުންނެވި މުޙައްމަދު ފައިސަލް އެ މަގާމުން އިސްތިއުފާ ދެއްވައިފި އެވެ.
ފައިސަލް އިސްތިއުފާ ދެއްވިއިރު، އޭނާގެ މައްސަލަތަކެއް ޖުޑީޝަލް ސާވިސް ކޮމިޝަން (ޖޭއެސްސީ) އިން ބަލަމުންދާކަމަށް މީޑިއާ ރިޕޯޓްތައް ބުނެ އެވެ. މީގެ އިތުރުން، މިދިޔަ ދެ ދުވަހު ސޯޝަލް މީޑިއާގައި ވެސް ފައިސަލަށް އެކި ތުހުމަތުތައް ކޮށްފައިވެ އެވެ. ނަމަވެސް އޭނާ އިސްތިއުފާ ދެއްވި ސަބަބެއް ރަސްމީކޮށް ހާމަކޮށްފައެއް ނުވެ އެވެ.
ޖޭއެސްސީން އަންނަނީ ފައިސަލްގެ އިތުރުން ހައިކޯޓުގެ އެހެން ފަނޑިޔާރުންތަކެއްގެ މައްސަލަތައް ވެސް ބަލަމުންނެވެ. އެ ފަނޑިޔާރުންނަކީ؛
- ފަނޑިޔާރު ހުސެއިން މަޒީދު
- ފަނޑިޔާރު ފާތިމަތު ފަރުހީޒާ
- ފަނޑިޔާރު ދީބާނާޒް ފަހުމީގެ މައްސަލަތަ
ފައިސަލް ހައިކޯޓުގެ ފަނޑިޔާރުކަމާއި ހަވާލުވީ 2018 ވަނަ އަހަރުގެ ޖުލައި މަހުގެ 24 ވަނަ ދުވަހު އެވެ. އޭނާ ވަނީ ޝަރުޢީ ދާއިރާގައި ގިނަ ދުވަހު ޚިދުމަތް ކުރައްވައިފަ އެވެ. އެގޮތުން އޭނާ ވަނީ ޖުޑީޝަލް ސާވިސް ކޮމިޝަންގެ މެންބަރުކަމާއި، އެ ކޮމިޝަންގެ ނާއިބު ރައީސްކަމުގެ މަގާމު ވެސް އަދާކުރައްވައިފަ އެވެ.
19 މާރިޗު 2025 ވަނަ ދުވަހުން ފެށިގެން، 19 ނޮވެންބަރު 2025 ވަނަ ދުވަހާއި ހަމައަށް ހައިކޯޓު ހިންގެވުން ވަގުތީ ގޮތުން ހަވާލުވެ ހުންނެވީ ފައިސަލް އެވެ. ފައިސަލް އެމަގާމުން އިސްތިއުފާ ދެއްވީ ޖޭއެސްސީ އިން އޭނާ އާއި ރަސްމީކޮށް އިސްފަނޑިޔާރުގެ މަގާމު ހަވާލުނުކުރައްވާ ގިނަ ދުވަސްތަކެއްވެފައި ވަނިކޮށެވެ.
ހައި ކޯޓު ހިންގުން ވަގުތީ ގޮތުން މިހާރުު ހަވާލުކުރެވިފައިވަނީ އެ ކޯޓަށް އެންމެ ފަހުން އައްޔަންކުރި ފަނޑިޔާރު އަބްދުﷲ ޖަމީލް މޫސާއާ އެވެ.
