މަސްތުވާތަކެއްޗަށް ފުލުހުން ކުރިއަށް ގެންދިޔަ ”އޮޕަރޭޝަން އަލިމަގު“ ގައި 110 މީހަކު ހައްޔަރުކޮށް 23 މިލިއަން ރުފިޔާގެ ތަކެތި އަތުލައިގަނެފައިވާ ކަމަށް ހޯމް މިނިސްޓަރު އަލީ އިހުސާނު ވިދާޅުވެއްޖެ އެވެ.
ސަންގު ޓީވީ އަށް ދިން އިންޓަވިއުއެއްގައި އިހުސާނު ވިދާޅުވީ އޮޕަރޭޝަން އަލި މަގު ކުރިއަށް ގެންގޮސްފައިވަނީ ހަ މަސްދުވަހުގެ އިންޓެލިޖެންސް ތަހުގީގުތަކަށް ފަހުގައި ކަމަށެވެ. އަދި މި އޮޕަރޭޝަނުގެ އެންމެ ބޮޑޫ އަމާޒަކަށް ވީ މަސްތުވާތަކެތި މަގުތަކަށް ދިއުން ހުއްޓުވުން ކަމަށް ވިދާޅުވި އެވެ.
މިނިސްޓަރު ވިދާޅުވީ މި އޮޕަރޭޝަނުގައި 110 މީހުން ހައްޔަރުކޮށްފައިވާ ކަމަށެވެ. އަދި ގިނަ އަދަދެއްގެ މަސްތުވާތަކެތި އަތުލައިގަނެވުނު ކަމަށް ވެސް މިނިސްޓަރު ވިދާޅުވި އެވެ.
”އޮޕަރޭޝަން އަލިމަގު ނިމުނުއިރު ޖުމްލަ 110 މީހުން ހައްޔަރު ކުރެވިފައިވޭ. މަސްތުވާތަކެތި ވިއްކުމަށް އެމީހުން ބޭނުންކުރި އާލާތްތަކާއި ގިނަ އަދަދެއްގެ މަސްތުވާތަކެއްޗާއި، ފައިސާ ވެސް ފުލުހުންގެ ބެލުމުގެ ދަށަށް ގެނެވިފަވޭ. މީގެ ތެރޭގައި ގާތްގަނޑަކަށް 23 މިލިއަން ރުފިޔާގެ މަގުމަތީ އަގުގެ ޕްރޮޑަކްޓްތައް ހިމެނޭ“ އިހުސާން ވިދާޅުވި އެވެ.
އިހުސާން ވިދާޅުވީ މަސްތުވާތަކެތި ރާއްޖެ އެތެރެކޮށް އޭގެ ވިޔަފާރިކުރާ ފަރާތްތަކާ ގާނޫނު އަރާހަމަ ކުރާނެ ކަމަށެވެ. އަދި ރައީސްގެ ވައުދާ އެއްގޮތަށް، އިސްލާމީ ޝަރީއަތުގައި ގާނޫނު ހުއްދަ ކުރާ އެންމެ ބޮޑު އަދަބު އެމީހުންނަށް ދޭނެ ކަމަށް ވެސް ވިދާޅުވި އެވެ.
”ދެން މިކަމަކަށް ރާއްޖޭގައި ފުރުސަތެއް ނުލިބޭނެ ރާއްޖޭގައި. އަޅުގަނޑުމެން ހިފާ ހައްޔަރުކުރާނަން އެމީހުން. އެ ހިސާބަށް ދާންވެސް ދާނަން. ފުލުހުންގެ ހުރިހާ މަސައްކަތެއް މިހާރު ޑްރަގްސްގެ ދާއިރާގައި މިއޮތީ މި މީހުންނާ ހިސާބަށް ވާސިލުވުމަށް،“ އިހުސާން ވިދާޅުވި އެވެ.
އޮޕަރޭޝަން އަލިމަގަކީ ރައީސް ގެ އެންގެވުމާ އެއްގޮތަށް މަސްތުވާތަކެއްޗާއި ދެކޮޅަށް ކުރިއަށް ގެންދިޔަ ހާއްސަ އޮޕަރޭޝަނެކެވެ. މި އޮޕަރޭޝަން ފެށީ މި މަހުގެ 13 ވަނަ ދުވަހުގަ އެވެ. މި އޮޕަރޭޝަން ވަރަށް ކާމިޔާބު ކަމާއެކު ނިންމާލެވުނު ކަމަށް ވެސް އިހުސާނު ފާހަގަ ކުރައްވާފައިވެ އެވެ.
ހޯމް މިނިސްޓަރު އަލީ އިހުސާން މަސްތުވާތަކެތި މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޯލޮޖީ ދިވެހި ފުލުހުންގެ ޚިދުމަތް
