ފޮރިން މިނިސްޓަރު އަބްދުﷲ ހަލީލް ބެލްޖިއަމް އަށް ކުރެއްވި ރަސްމީ ދަތުރުފުޅު ނިންމަވާލައްވައި އެނބުރި ރާއްޖެ ވަޑައިގަންނަވައިފިއެވެ.

ފޮރިން މިނިސްޓްރީ އިން މައުލޫމާތު ދިން ގޮތުގައި ހަލީލް ބެލްޖިއަމް އަށް މި ކުރެއްވި ދަތުރުފުޅަކީ މި މަހުގެ 20 ވަނަ ދުވަހުން ފެށިގެން 21 ވަނަ ދުވަހުގެ ނިޔަލަށް ކުރިއަށް ގެންދިޔަ ޔޫނިއަން އިންޑޯ- ޕެސިފިކް މިނިސްޓީރިއަލް ފޯރަމް ގައި ބައިވެރިވުމަށް ކުރެއްވި ދަތުރުފުޅެކެވެ. މި ފޯރަމް ކުރިއަށް ގެންގޮސްފައިވަނީ ބެލްޖިއަމް ގެ ބްރަސެލްސް ގައެވެ.

މި ދަތުރުފުޅުގެ ތެރެއިން ހަލީލު ބައެއް ގައުމުތަކުގެ އިސްވެރިންނާ އެކު ރަސްމީ ބައްދަލުވުންތަކުގައި ހަލީލު ބައިވެރިވެވަޑައިގަންނަވާފައިވާ ކަމަށް މިނިސްޓްރީ އިން ބުނެފައިވެ އެވެ. އަދި އެ ރަސްމީ ބައްދަލުވުންތަކުގައި ހާރިޖީ ގުޅުންތައް އިތުރަށް ބަދަހިކޮށް، ސަރަހައްދީ އަދި ބައިނަލްއަގުވާމީ މައިދާންތަކާއި ގުޅިގެން މަސައްކަތް ކުރުމާ ގުޅޭގޮތުން މަޝްވަރާވެސް ކުރައްވާފައިވާ ކަމަށް ވެސް މިނިސްޓްރީ އިން ބުނެފައިވެ އެވެ.

މިނިސްޓްރީ އިން ބުނީ ކުރިއަށްގެންދިޔަ ފޯރަމްގެ ހަވާސާގެ ތެރޭގައި ކުރިއަށްގެންދިޔަ އެކި ހައި- ލެވެލް އިވެންޓުތަކުގައިވެސް ހަލީލު ރާއްޖެ ތަމްސީލު ކުރައްވާފައި ކަމަށެވެ. އަދި އެ ގައުމުގައި ހުންނަ ރާއްޖޭގެ އެމްބަސީ އަށް ޒިޔާރަތްކުރައްވައި، ރާއްޖޭން ބޭރުގައި ދިރިއުޅޭ ދިވެހިންނަށް ސަރުކާާރުން ފޯރުކޮށްދޭ ހިދުމަތްތަށް އިތުރަށް ހަރުދަނާ ކުރެއްވުމާ ގުޅޭާގޮތުން ވާހަކަ ދައްކަވައި މަޝްވަރާކުރައްވާފައިވާ ކަމަށް ވެސް މިނިސްޓްރީ އިން ބުނެފައިވެ އެވެ.

ޔޫނިއަން އިންޑޯ- ޕެސިފިކް މިނިސްޓީރިއަލް ފޯރަމް ގައި ބައިވެރިވުމަށް މިނިސްޓަރު ކުރެއްވި ދަތުރުގައި މިނިސްޓަރުގެ އަރިހުގައި ބެލްޖިއަމަށާއި، ޔޫރަޕިއަން ޔޫނިއަނަށް ދިވެހިރާއްޖެއިން ކަނޑައަޅުއްވައިފައި ހުންނަވާ ސަފީރު ގީލާ އަލީ، ސެކްރެޓަރީ މަލްޓިލެޓަރަލް އަޙްމަދު ޝިއާން އަދި ޕޮލިޓިކަލް ޑިރެކްޓަރ ފާތިމަތު ނަޝާ އިސްމާއިލް ބައިވެރިވެވަޑައިގެންފައިވެ އެވެ.

މިނިސްޓްރީ އޮފް ފޮރިން އެފެއާޒް ފޮރިން މިނިސްޓަރު ޑރ. އަބްދުﷲ ހަލީލް