ހަނިމާދޫ އިންޓަނޭޝަނަލް އެއަރޕޯޓާއެކު ރާއްޖޭގެ އުތުރުގެ ސަރަޙައްދުގައި ފަތުރުވެރިކަން ކުރިއެރުވުމަށް ކުރާ މަސައްކަތަށް ބޮޑު ކުރިއެރުމެއް ލިބިގެންދާނެކަމަށް ކުރީގެ ރައީސް، ޑރ. މުޙައްމަދު ވަޙީދު ޙަސަން މަނިކު ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ ދައުލަތުގެ މީޑިއާއަށް ދެއްވި އިންޓަވިއުއެއްގަ އެވެ.
ހަނިމާދޫ އިންޓަނޭޝަނަލް އެއަރޕޯޓް ތަރައްޤީކުރުމުގެ މަސައްކަތް ނިންމާ މިރޭ ހުޅުވަން ތައްޔާރުވެފައިވާއިރު ރައީސް ވަހީދު ވިދާޅުވީ، ހަނިމާދޫ އިންޓަނޭޝަނަލް އެއަރޕޯޓް ހުޅުވިގެންދިއުމާއެކު އުތުރުގެ އަތޮޅުތަކަށް ފަތުރުވެރިންކުރަންޖެހޭ ދަތުރުގެ ވަގުތު ކުރުވެ، ޚަރަދު ކުޑަވާނެ ކަމަށެވެ. މީގެ ސަބަބުން އުތުރުގެ އަތޮޅުތަކުގައި ހުންނަ ރިސޯޓުތަކަށާއި ގެސްޓްހައުސްތަކަށް ޒިޔާރަތްކުރާ ފަތުރުވެރިންގެ އަދަދު އިތުރުވެ، ސަރަހައްދުގެ އިގްތިސޯދަށް ހެޔޮ ބަދަލުތަކެއް އަންނާނެކަމަށް އެމަނިކުފާނު ވިދާޅުވި އެވެ.
ފަތުރުވެރިންގެ އަދަދު އިތުރުވުމަށް މަގުފަހިވަމުންދާއިރު، ޑިމާންޑާ އެއްވަރަށް އެ ސަރަހައްދަށް ރިސޯޓާއި ގެސްޓްހައުސް އިތުރުކުރަންޖެހޭކަންވެސް ރައީސް ވަހީދު ވަނީ ފާހަގަކުރައްވާފަ އެވެ. އެމަނިކުފާނު ވިދާޅުވީ، ހަނިމާދޫ އެއަރޕޯޓުން 40 މިނެޓަށްވުރެ ކުޑަ ރޭންޖެއްގައި 3،000 އަށް ވުރެ ގިނަ އެނދު ހުންނަންޖެހޭ ކަމަށެވެ.
މި ސަރަހައްދުގައި އެއަރޕޯޓުން 40 މިނެޓަށްވުރެ ކުޑަ ރޭންޖެއްގައި 3،000 އަށް ވުރެ ގިނަ އެނދު ހުންނަން އެބަޖެހޭ. ރަށްރަށުގެ ރައްޔިތުންނާއި ކައުންސިލްތަކުން ޓޫރިޒަމަށް ހިތްވަރު ދިނުމަށް ކުރަންޖެހޭ ކަންތައްތަކެއް އެބަހުރި. ޓޫރިޒަމަށް އިންވެސްޓްކުރާ މީހުންނަށް ކައުންސިލްތަކުން އިންސެންޓިވްއެއްދީ ލުއިތައް ދީ އެހީތެރިވުން އެއީ ވަރަށް މުހިންމު ކަމެއް.
ރައީސް ވަހީދު ވިދާޅުވީ، ހަނިމާދޫ އިންޓަނޭޝަނަލް އެއާޕޯޓާއެކު އުތުރުގެ ފަތުރުވެރިކަން ކުރިއެރުވުމަށް ސަރުކާރުން ހާއްސަ އިސްކަމެއްދޭނެ ކަމަށާއި، ސަރަހައްދުގައި ދަތުރުފަތުރުގެ ލުއިކަން ހޯދައިދިނުމަށްވެސް މަސައްކަތްތަކެއް ކުރަމުން އަންނަ ކަމަށެވެ.
އިންޑިއާގެ ލޯނު އެހީގެ ދަށުން ކުރިއަށް ގެންދިޔަ މި މަޝްރޫއަކީ ރާއްޖޭގައި ހިންގި އެއާޕޯޓް ތަރައްގީކުރުމުގެ އެންމެ ބިޔަ އެއް މަޝްރޫ އެވެ. މި މަޝްރޫގެ ދަށުން 2.7 ކިލޯމީޓަރުގެ އާ ރަންވޭއަކާއި، އަހަރަކު 1.3 މިލިއަން ފަސިންޖަރުންނަށް ޚިދުމަތް ދެވޭ އާ ޓާމިނަލެއް އަދި އާ އެއަރ ޓްރެފިކް ކޮންޓްރޯލް ޓަވަރެއް ތަރައްގީކޮށްފައިވެ އެވެ. މީގެ އިތުރުން ކާގޯ އިމާރާތަކާއި ފިއުލް ފާމެއް ހެދުމުގެ މަސައްކަތް ވެސްކޮށްފައިވެ އެވެ.
އިންޑިއާގެ ކަލްޕަތަރު ޕްރޮޖެކްޓްސްއާ މި މަޝްރޫ ހަވާލުކުރެވުނީ 2022 ވަނަ އަހަރުގެ ސެޕްޓެމްބަރު މަހުގަ އެވެ. މި މަޝްރޫޢަށް އިންޑިއާގެ އެގްޒިމް ބޭންކުގެ ލައިން އޮފް ކްރެޑިޓްގެ ދަށުން 136 މިލިއަން ޑޮލަރު (ދެ ބިލިއަން ރުފިޔާ) ހަމަޖެހުނެވެ.
ހދ. ހަނިމާދޫ ހަނިމާދޫ އިންޓަނޭޝަނަލް އެއާޕޯޓް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރައީސް ޑރ. މުހައްމަދު ވަހީދު ހަސަން މަނިކު ފަތުރުވެރިކަން
