ޢަރަބި އިސްލާމީ ޤައުމުތަކުގެ ކުއްލި ބައްދަލުވުމުގައި ބައިވެރިވެވަޑައިގަތުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޤަޠަރަށް ކުރައްވާ ދަތުރުފުޅުގެ ތެރެއިން މިއަދު ކުރިއަށްދާ މުހިންމު ސަމިޓުގައި ޚާއްޞަ ބަޔާނެއް އިއްވަވާނެ ކަމަށް ރައީސް އޮފީހުން ބުނެފި އެވެ.
މި ސަމިޓަކީ އިސްރާއީލުން ސެޕްޓެމްބަރު 9 ވަނަ ދުވަހު ދިން ހަމަލާތަކާ ގުޅިގެން ބާއްވާ ސަމިޓެކެވެ. އޯއައިސީގެ މެމްބަރު ޤައުމުތަކުގެ ލީޑަރުން ބައިވެރިވެ ވަޑައިގަންނަވާ މި ސަމިޓުގައި އިސްލާމީ އުއްމަތަށް ދިމާވެފައިވާ ނާޒުކު ހާލަތާ ގުޅޭގޮތުން މަޝްވަރާކުރެވޭނެއެވެ.
ރައީސް އޮފީހުން ފާހަގަކުރައްވާފައިވާ ގޮތުގައި، މި ސަމިޓުގައި ރައީސް މުޢިއްޒު ބައިވެރިވެ ވަޑައިގަތުމަކީ ޤަޠަރާއެކު ދިވެހިރާއްޖެއިން އޮތް އެކުވެރިކަން ހާމަކޮށްދޭ ކަމެއްގެ އިތުރުން، ފަލަސްޠީނު ރައްޔިތުންގެ ޙައްޤުތައް ހިމާޔަތްކުރުމުގައި ދިވެހިރާއްޖެއިން ދެމިހުރި ކަމުގެ ހެއްކެކެވެ.
އިސްރާއީލުން އެ ސަރަޙައްދުގައި ހިންގަމުންދާ އަނިޔާވެރި ޢަމަލުތައް ހުއްޓުވުމަށް ބައިނަލްއަޤްވާމީ މުޖުތަމަޢުގެ ފަރާތުން އަވަސް ފިޔަވަޅުތަކެއް އެޅުމަށް ދިވެހިރާއްޖެއިން ގޮވާލާ ގޮވާލުން ވެސް މި ސަމިޓުގައި ބައިވެރިވުމުން އާކޮށްދޭނެއެވެ. މި ސަމިޓަކީ އިސްރާއީލުގެ އަނިޔާވެރި ޢަމަލުތައް ހުއްޓުވުމަށާއި، ސަރަޙައްދުގައި އަމާންކަމާއި ސުލްޙަ ޤާއިމުކުރުމަށް ބޭނުންވާ ފިޔަވަޅުތައް އެޅުމަށް މުސްލިމް އުއްމަތުގެ އެއް އަޑެއް އުފުލުމަށް ލިބޭ މުހިންމު ފުރުޞަތެއްގެ ގޮތުގައި ފާހަގަކުރެވެއެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ރާއްޖެ - ގަތަރް
