ޖަޕާނުން ރާއްޖެއަށް ގާތްގަނޑަކަށް 10.5 މިލިއަން ޑޮލަރު ހިލޭ އެހީގެ ގޮތުގައި ދިނުމުގެ އެއްބަސްވުމެއްގައި ދިވެހި ސަރުކާރާއި ޖަޕާން އިންޓަނޭޝަލް ކޯޕަރޭޝަން އެޖެންސީ (ޖައިކާ) އިން ސޮއިކޮށްފި އެވެ.
ޖަޕާނުން މި އެހީ ދެނީ، މާލެއަށް ކުރިމަތިވާ ކާރިސާތަކަށް ދެމެހެއްޓެނިވި ގޮތެއްގައި ތައްޔާރުވުމަށް ހިންގާ ’މާލެ އައިލެންޑް ޑިޒާސްޓާ ރެޒިލިއެންސް އެންހާންސްމެންޓް ޕްރޮޖެކްޓް’ގެ އިމާރާތްކުރުމުގެ މަރުހަލާއަށެވެ.
މި އެއްބަސްވުމަކީ މިދިޔަ މަހު 26ގައި ޖަޕާނު ސަރުކާރާއި ދިވެހި ސަރުކާރާ ދެމެދު ސޮއިކުރި އެކްސްޗޭންޖް އޮފް ނޯޓްސްގެ ދަށުން ހެދި އެއްބަސްވުމެކެވެ. މި އެހީގެ ދަށުން މާލޭގެ ކަނޑުތޮށި ވަރުގަދަކޮށް، ވާރޭ ފެން ހިންދުމަށް ބޭނުންވާ އާލާތްތައް ހޯދައި އުދަ އާއި ބޯކޮށް ވެހޭ ވާރެއިން ކުރިމަތިވާ ނުރައްކާތައް ކުޑަކުރެވޭނެ އެވެ.
މި މަޝްރޫއުގެ މަގްސަދަކީ މާލޭގައި ކާރިސާތަކަށް ތައްޔާރުވުން ހަރުދަނާކޮށް، ދިރިއުޅުމާއި އިގްތިސާދީ ހަރަކާތްތަކާއި މުޖުތަމައުގެ ރައްކާތެރިކަން ހަރުދަނާކުރުމެވެ.
