ރަށްރަށުގެ މަގުތައް ތާރުއަޅައިގެން ތަރައްޤީކުރުމަށް ސަރުކާރުން މަޖުބޫރުނުކުރާނެ ކަމަށް ކޮންސްޓްރަކްޝަން މިނިސްޓަރ ޑރ. ޢަބްދުﷲ މުއްޠަލިބް ވިދާޅުވެއްޖެ އެވެ.
މިނިސްޓަރ މިހެން ވިދާޅުވެފައި ވަނީ، ދައުލަތުގެ މީޑިއާއަށް ދެއްވި އިންޓަރވިއުއެއްގަ އެވެ.
މިނިސްޓަރ ވިދާޅުވި ގޮތުގައި ރައީސް ޑރ. މުޙައްމަދު މުޢިއްޒު ރަށްރަށަށް ކުރައްވާ ދަތުރުފުޅުތަކުގައި ކައުންސިލްތަކާ ބައްދަލުކުރައްވައި، ރައްޔިތުން ބޭނުންވާ މައްސަލަތައް ހައްލުކުރުމަށް ސަރުކާރުން އިސްކަން ދެއްވާނެ އެވެ. އެގޮތުން، ލޯކަލް ޓުއަރިޒަމް ހިންގަމުންދާ ރަށްތަކުގައި ވެލި މަގުތައް ބޭއްވުމަށްފަހު ފެންބޮޑުވުން ފަދަ މައްސަލަތައް ހައްލުކުރުމަށް ބޭނުންވާ ވެހިކަލްތަކާއި މަގު މެއިންޓެއިން ކުރުމަށް ބޭނުންވާ އާލާތްތައް ހޯދައިދިނުމަށް ހުށަހަޅުއްވާ ކަމަށް މިނިސްޓަރ ފާހަގަކުރެއްވި އެވެ.
މިނިސްޓަރ ވިދާޅުވި ގޮތުގައި، ކުރިން އެއްވެސް ކައުންސިލަކުން މިކަމަށް ސީދާ އެއްބަސްވެފައި ނުވާތީ، ސަރުކާރުން މަސައްކަތް ކުރައްވަމުން ގެންދިޔައީ ރައްޔިތުން އެގޮތަށް ބޭނުން ނުވާކަމަށް ބަލައި މަގުތައް ތާރު އަޅައިގެން ތަރައްޤީކުރުމަށެވެ. ނަމަވެސް މިހާރު ބައެއް ކައުންސިލްތަކުން އެރަށްރަށުގެ މަގުތައް ހެދުމުގެ ބަދަލުގައި މަގު ބެލެހެއްޓުމަށް ބޭނުންވާ ވެހިކަލްތައް ހޯދައިދިނުމަށް އެދެމުންދާ ކަމަށާއި، މިހާތަނަށް 3 ކައުންސިލުން މިގޮތަށް އެދިފައިވާ ކަމަށް މިނިސްޓަރ ހާމަކުރެއްވި އެވެ.
”ރަށްރަށުގެ މަގުތައް ތާރުއަޅައިގެން ތަރައްޤީކުރުމަށް ސަރުކާރުން މަޖުބޫރެއް ނުކުރާނެ. އޭގެ ބަދަލުގައި ރަށަށް އިޤްތިޞާދީ ގޮތުންނާއި އިޖުތިމާޢީ ގޮތުން ފައިދާވާނެ ގޮތަކަށް ކަންކަން ކުރިއަށް ގެންދާނީ،“ މިނިސްޓަރ މުއްޠަލިބް ވިދާޅުވި އެވެ.
މިނިސްޓަރު ޑރ. އަބްދުﷲ މުއްތަލިބު މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ
