ލާމަރުކަޒީ ގާނޫނަށް ގެންނަން ހުށަހަޅާފައިވާ އިސްލާހުތަކަކީ ރައްޔިތުންނަށް ފައިދާހުރި އިސްލާހުތަކެއްކަމަށް ވިދާޅުވެ، އެ ނިޒާމު އަލިފުން ޔާއަށް އެނގިވަޑައިގަންނަވާ ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެއެވެ.
ބ. ދަރަވަންދޫގައި ބޭއްވި ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ، އެމަނިކުފާނަކީ ލާމަރުކަޒީ ނިޒާމު ހިންގުމުގައި އަމަލީ ގޮތުން އުޅުއްވާފައިވާ ބޭފުޅެއް ކަމަށެވެ. އަދި ވެރިކަމަށް ވަޑައިގަތުމުގެ ކުރިން މާލޭ މޭޔަރުގެ މަގާމުގައި ހުންނެވިއިރު، މާލޭގައި ލާމަރުކަޒީ ނިޒާމު ހިންގުމަށް ގޮންޖެހުންތަކާ ކުރިމަތިވި ކަމަށް ފާހަގަކުރެއްވިއެވެ.
”ކައުންސިލްތައް ހިންގަން ޖެހޭނީ ރައްޔިތުންނަށް ފައިދާވާ ގޮތަށް. ރައްޔިތުން ބާރުވެރި ކުރާ ގޮތަށް،“ ރައީސް ވިދާޅުވިއެވެ.
ކައުންސިލްތަކުގެ ވިޔަފާރިތަކާމެދު ކަންބޮޑުވުން
ރައީސް ވިދާޅުވީ ބައެއް ކައުންސިލްތަކުން އުފައްދާފައިވާ ލޯކަލް އޮތޯރިޓީ ކޮމްޕެނީތަކުން ރަށްރަށުގެ އާންމު ފަރުދުން ހިންގާ ކުދި ވިޔަފާރިތަކުގެ ދާއިރާއަށް ވަދެ، ރައްޔިތުންގެ މުއްސަނދިކަމަށް އޮތް މަގުތަކަށް ހުރަސްއަޅަމުންދާ ކަމަށެވެ. އަދި ރައްޔިތުންނަށް އާންމު ޚިދުމަތްތައް ދިނުމަށް ދޫކުރާ ބިންތަކަށް ބައެއް ކައުންސިލްތަކުން ބޮޑެތި ކުލިތައް ނަގަމުންދާ ކަމަށާއި، މިކަމުގެ ސަބަބުން ރައްޔިތުންނަށް ދެވޭ ޚިދުމަތްތަކުގެ އަގު ބޮޑުވަމުންދާ ކަމަށް ފާހަގަކުރެއްވިއެވެ.
މާލީ ހާމަކަން ބޮޑުކުރުމަށް އިސްލާހު
ކައުންސިލްތަކުގެ އެކައުންޓުތަކުގައި ހުންނަ ފައިސާގެ މައުލޫމާތު ރައްޔިތުންނަށާއި ލޯކަލް ގަވަމަންޓް އޮތޯރިޓީއަށް ހާމަނުކުރާ ކަމަށް ފާހަގަކުރައްވައި، މިއީ ދެފުށް ފެންނަ ގޮތެއް ނޫން ކަމަށް ރައީސް ވިދާޅުވިއެވެ. މިކަން ކައުންސިލްތަކުން ނުކުރާތީ، ގާނޫނުގައި ލިޔެގެން މިކަން ކުރުވަން ޖެހުނު ކަމަށްވެސް ރައީސް ފާހަގަކުރެއްވިއެވެ.
މި މޭރުމުން ވާހަކަފުޅުކުރިއަށްގެންދަވަމުން ރައީސުލްޖުމްހޫރިއްޔާ ވަނީ، ލާމަރުކަޒީ ނިޒާމަށް އިސްލާހު ގެނައުމަށް ކުރަމުންދާ މަސައްކަތުގެ ޙަޤީޤަތް އޮޅުވާލުމަށް ބައެއް ފަރާތްތަކުން ހަރަކާތްތެރިވާކަން ފާހަގަކުރައްވައި، ވަކިވަކިން މިސާލު ނަންގަވައި ކަމުގެ އަސްލު، ބަޔާންކޮށްދެއްވާފައެވެ. ކައުންސިލްތައް ހިންގަންޖެހޭނީ ރައްޔިތުންނަށް ފައިދާވާ އަދި ރައްޔިތުން ބާރުވެރިކުރެވޭނެ ގޮތަށް ކަމަށާ، ސަރުކާރުން ހުށަހަޅުއްވައިގެން ރައްޔިތުންގެ މަޖިލީހުން ފާސްކުރައްވާފައިވާ އިޞްލާޙުތަކުގައިވެސް ވަނީ މިކަންކަން ކަމުގައި ރައީސުލްޖުމްހޫރިއްޔާ ފާހަގަކުރެއްވިއެވެ. އެގޮތުން، ރައްޔިތުން ބާރުވެރިކުރުވުމުގެ ފައިދާ އޮތީ ކައުންސިލަށްކަމުގައިވެސް އެމަނިކުފާނު ފާހަގަކުރެއްވިއެވެ.
