ބައެއް ކައުންސިލްތަކުން ތަޖުރިބާގެ ދަތުރުގެ ނަމުގައި އެއްވެސް ރައްޔިތަކަށް ފައިދާ ނުވާ ގައުމުތަކަށްދާ ކަމަށް ވިދާޅުވެ އެކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ފާޑު ވިދާޅުވެއްޖެ އެވެ.
ރައީސް މުއިއްޒު މިހެން ވިދާޅުވީ މިހާރު ބ. އަތޮޅަށް އެމަނިކުފާނު ކުރައްވަމުން ގެންދަވާ ރަސްމީ ދަތުރުފުޅުގައި ބ. ކެންދޫއަށް ވަޑައިގެން އެރަށުގެ ރައްޔިތުންނާ ބައްދަލު ކުރައްވާ ދެއްކެވި ވާހަކަފުޅުގަ އެވެ.
ރައީސް ވިދާޅުވީ ބައެއް ކައުންސިލްތަކުން ޒިންމާދާރުކަން ކުޑަކޮށް ބްލޮކް ގްރާންޓްގެ ގޮތުގައި ދޭ ފައިސާ އާއި އާމްދަނީގެ ގޮތުގައި، އޮންނަ އުސޫލުގެ ތެރެއިން ހޯދާ ފައިސާވެސް ބޭނުން ކުރާތަން ފެންނަ ކަމަށެވެ.
މުޅި ކައުންސިލް އޮތްގޮތަށް، ރަށު ކައުންސިލް އެކަންޏެއް ނޫން، އަތޮޅު ކައުންސިލްވެސް، މުޅި ކައުންސިލް އޮތް ގޮތަށް ތަޖުރިބާގެ ދަތުރު ކިޔާފަ އެއްވެސް ރަށެއްގެ ރައްޔިތަކަށް ނޫނީ އަތޮޅަކަށް ފައިދާއެއް ނުހޯދޭނެ ތަންތަނަށް، ގައުމުތަކަށް އެބަ ދޭ ބްލޮކް ގްރާންޓްގެ ގޮތުގައި ދޭ ފައިސާ ބޭނުންކޮށްގެން. ނޫނީ އާމްދަނީގެ ގޮތުގައި ހޯދާ ފައިސާ ބޭނުންކޮށްގެން.
ރައީސް ވިދާޅުވީ މިކަން ކުރަނީ ބައެއް ކައުންސިލްތަކުން ކަމަށާއި މިއީ ޒިންމާދާރުކަމެއް ނޫން ކަމަށެވެ.
ކައުންސިލްތަކަށް ބްލޮކް ގްރާންޓް ދީ އާމްދަނީ ހޯދޭނެ މަގު ފަހިކޮށްދެނީ ރަށުގައި ކުރަން ހުންނަ މުނިސިޕަލް ހިދުމަތް ކުރުމަށްކަމަށް ރައީސް ވިދާޅުވި އެވެ. އަދި އެ ފައިސާ ކައުންސިލަށް ދެނީ ރަށަށް ބޭނުންވާ ކަންކަމަށް އިންވެސްޓް ކުރުމަށާއި އިތުރު އާމްދަނީ ރަށަށް ހޯދުމަށް ކަމަށް ރައީސް ވިދާޅުވި އެވެ.
