ކްރިމިނަލް ކޯޓާއި ޑްރަގް ކޯޓު ބަދަލުކުރުމަށް ހުޅުމާލޭގައި އިމާރާތްކުރި ”ޖަސްޓިސް ބިލްޑިން އެނެކްސް“ ހުޅުވައިފި އެވެ.
މި އިމާރާތް ހުޅުވައިދެއްވީ ރައީސް ޑރ. މުހައްމަދު މުއިއްޒު އެވެ. އަދި ބަންޑާރަނައިބު އަހުމަދު އުޝާމްއާއި ސުޕްރީމް ކޯޓު ހިންގެވުމާ ހަވާލުވެވަޑައިގެން ހުންނެވި ފަނޑިޔާރު އަބްދުﷲ ހަމީދު ވަނީ ޤައުމީ ދިދައާއި ޝަރުއީ ދާއިރާގެ ދިދަ އެ އިމާރާތުގައި ނަންގަވާފަ އެވެ. އިމާރާތް ހުޅުވުމަށްފަހު ޖުޑިޝަލް އެޑްމިނިސްޓްރޭޝަންގެ ފަރާތުން ފިލައެއް ވަނީ ރައީސް މުއިއްޒުއަށް އަރުވާފަ އެވެ.
މި އިމާރާތުގައި ކްރިމިނަލް ކޯޓު އަދި ޑްރަގް ކޯޓު ހިންގުމަށް ހަމެޖެހިފައިވާއިރު، ޑްރަގް ކޯޓަށް ހާއްސަ 5 ކޯޓު ރޫމް އަދި ކްރިމިނަލް ކޯޓަށް ހާއްސަ 10 ކޯޓު ރޫމް ހުންނާނެ ކަމަށް ޑީޖޭއޭއިން މައުލޫމާތުދީފައިވެ އެވެ.
މި އިމާރާތް ހުޅުވުމަށް ބޭއްވި ރަސްމިއްޔާތުގައި ކުރީގެ އުއްތަމަ ފަނޑިޔާރު، ޖަސްޓިސް ރިޓަޔާޑް އަހުމަދު މުއުތަސިމް އަދުނާން، ސުޕްރީމް ކޯޓު، ހައިކޯޓު، އަދި އެހެން ކޯޓުތަކުގެ ފަނޑިޔާރުން ބައިވެރިވެވަޑައިގަތެވެ.
މި އިމާރާތުގެ މަސައްކަތް ކުރިއަށް ގެންގޮސްފައިވަނީ ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)އާ ހަވާލުކޮށްގެއްނެވެ.
މި އިމާރާތް ހުޅުވުމުން، މާލޭގައި ހިންގާ ޑްރަގް ކޯޓާއި ކްރިމިނަލް ކޯޓުގެ ހިންގުން މި އިމާރާތަށް ބަދަލުވެގެންދާނެ އެވެ.
ކްރިމިނަލް ކޯޓު އަދި ޑްރަގް ކޯޓަށް ޖާގައިގެ ދަތިކަން ދިމާވެފައިވާ މައްސަލަ ބޮޑުގެ އެކަމުގެ ކަންބޮޑުވުން އަބަދުވެސް ފާޅުކުރެ އެވެ. މިއާ އިމާރާތާއެކު ޖާގައިގެ ދަތިކަމަށް ހައްލެއް ލިބިގެންދާނެ އެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކްރިމިނަލް ކޯޓު ޑިޕާޓްމަންޓް އޮފް ޖުޑިޝަލް އެޑްމިނިސްޓްރޭޝަން (ޑީޖޭއޭ) ޑްރަގް ކޯޓު
