ތައިލެންޑާއި ކެމްބޯޑިޔާއާ ދެމެދު ވަރުގަދަ ހަމަލާތަކެއް ބަދަލުކޮށްފި އެވެ.
ދެގައުމުގެ އިމުގެ މައްސަލައިގައި ހަމަނުޖެހުންބޮޑުވެފައިވާއިރު، މިއަދުގެ ދެ ޤައުމުންވެސްވަނީ ވަރުގަދަ ހަމަލާތަކެއް ދީފަ އެވެ. މިއަދުގެ ހަމަލާތައް ފުރަތަމަ ދީފައިވަނީ ތައިލެންޑުންކަމަށް ކެމްބޯޑިޔާއިން ބުނާއިރު ތައިލެންޑުން ބުނަނީ ފުރަތަމަ ހަމަލާތައް ދީފައިވަނީ ކެމްބޯޑިޔާއިން ކަމަށެވެ.
މިއަދުގެ ހަމަލާތަކުގައި މިހާތަނަށް 11 މީހަކު ތައިލެންޑުން މަރުވެފައިވާ ކަމަށް ބޭރުމީޑިއާތަކުން ރިޕޯޓު ކޮށްފައިވެ އެވެ.
މިއަދުގެ ހަމަލާތަކުގައި ތައިލެންޑުންވަނީ ރޮކެޓާއި، ބޮޑުބަޑި އަދި އެފް-16 ޖެޓް ބޭނުންކޮށްގެން ވައިގެ މަގުންވެސް ކެމްބޯޑިޔާއަށް ހަމަލާދީފަ އެވެ. ތައިލެންޑްގެ އަސްކަރިއްޔާއިން ބުނެފައިވަނީ ޖެޓުތައް ބޭނުންކޮށްގެން ކެމްބޯޑިޔާގެ އަސްކަރީ އަމާޒުތަކަކަށް ހަމަލާދީފައިވާ ކަމަށެވެ.
މިއަދުގެ ހަމަލާތަކުގައި ކެމްބޯޑިޔާއިން މަރުވި މީހުންގެ ތަފުސީލެއް ނުލިބެ އެވެ.
މި ދެ ގައުމުގެ ބޯޑަރުގެ މައްސަލައަކީ ޒަމާންވީ ކޯޅުމެކެވެ. އެގޮތުން މިދިޔަ މޭ މަހުގެވެސް ދެ ގައުމުގެ އަސްކަރިއްޔާގެ މެދުގައި ހަމަލާތަކެއް ބަދަލުކޮށްފައިވެ އެވެ. މޭ މަހުގެ ހަމަލާތަކުގައި ކެމްބޯޑިޔާގެ ސިފައިންގެ މީހަކުވެސް މަރުވެފައިވެ އެވެ.
