ދިވެހީންގެ ޢަޤީދާއާއި އަދަބު އަޚްލާޤު ހަރުދަނާކުރުމުގައި ލިޔުންތެރީންގެ އެހީތެރިކަން މި ޤައުމަށް ބޭނުންވާ ކަމަށް ރައީސް ޑރ. މުހައްމަދު މުޢިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވެފައިވަނީ، ދިވެހި ލިޔުންތެރިންގެ ދުވަހުގެ މުނާސަބަތުގައި ފޮނުއްވި ހިތާބުގައެވެ.
މިއަދަކީ ދިވެހިރާއްޖޭގެ ލިޔުންތެރީންގެ ދުވަހެވެ. މި ދުވަސް ފާހަގަކުރެވެނީ ދިވެހިރާއްޖޭގައި ފުރަތަމަ މަޖައްލާއެއް ކަމުގައިވާ ”އަލްއިސްލާހު“ ނެރުނު 1933 ވަނަ އަހަރުގެ ޖުލައި މަހުގެ 8 ވަނަ ދުވަހުގެ މުނާސަބަތުގައެވެ. އެ މަޖައްލާގެ މައިގަނޑު މަޤްޞަދަކީ ދީނީ، އިޖްތިމާޢީ، އިޤްތިޞާދީ، ސިޔާސީ އަދި އިލްމީ ދާއިރާތަކުން ދިވެހި ޤައުމު އިޞްލާޙުކުރުމެވެ.
ރައީސް މުޢިއްޒު ވިދާޅުވި ގޮތުގައި، އިންސާނާ ކޮންމެ ދުވަހަކު ކުރަންޖެހޭ އެއް ކަމަކީ އިޞްލާޙު ކުރުމެވެ. މި މަސައްކަތުގައި ލިޔުމަކީ އެންމެ މުހިންމު އެއް ވަސީލަތެވެ. އިންސާނުންގެ ނަފުސުތަކާއި، މުޖުތަމަޢާއި، ޤައުމާއި ދުނިޔެ އިޞްލާޙުކުރުމަށްޓަކައި އެކި މައުޟޫޢުތަކުގައި ލިޔެ އިލްމު ފެތުރުމުގެ މަތިވެރި ޒިންމާ އަދާކުރާ ބަޔަކީ ލިޔުންތެރީންނެވެ.
ރައީސް އިތުރަށް ފާހަގަކުރެއްވި ގޮތުގައި، މިއަދުގެ ދިވެހިރާއްޖޭގައި ލިޔުންތެރިކަމުގެ ދައުރު އިތުރަށް ފުޅާވެ ތަނަވަސްވެފައިވެއެވެ. ދީނީ، އިޖްތިމާޢީ އަދި އިޤްތިޞާދީ ދާއިރާތަކުގައި ލިޔުންތެރީންގެ ދައުރު އިންތިހާއަށް މުހިންމެވެ. ”ދޭދޭ ގުޅުންތަކާއި، މުޖުތަމަޢުގެ ހަމަޖެހުން ޤާއިމުކުރުމުގައި ލިޔުންތެރީންގެ އަމާނާތްތެރިކަން ބޭނުންވޭ“ ރައީސް ވިދާޅުވިއެވެ.
ސިޔާސީ ދާއިރާގައި ވެސް ލިޔުންތެރީންގެ ދައުރު މުހިންމެވެ. ރައީސް ފާހަގަކުރެއްވި ގޮތުގައި، މެނިފެސްޓޯ އެކުލަވާލުމާއި، ޤައުމީ މައްސަލަތައް ރައްޔިތުންނަށް ވިސްނައިދިނުމުގައި އެންމެ އިސް ދައުރެއް އަދާކުރެވޭނީ ލިޔުންތެރީންނަށެވެ. އަދި ބައިނަލްއަޤްވާމީ ގުޅުންތައް ބަދަހިކުރުމުގައި ވެސް ލިޔުންތެރީންގެ ދައުރު މުހިންމެވެ.
ދިވެހި ތާރީޚަށް ބަލާއިރު، ދިވެހިރާއްޖެ ބިނާކުރުމުގައި ދީނީ، އަދަބީ، ތާރީޚީ އަދި ސިޔާސީ ދާއިރާތަކުން ލިޔުންތެރީން ވަނީ އަގުހުރި ޚިދުމަތްތަކެއް ކޮށްދީފައެވެ. ރައީސް މުޢިއްޒު ވަނީ މި ދުވަހުގެ މުނާސަބަތުގައި އެ އެންމެހައި ލިޔުންތެރީންނަށް ތަހުނިޔާ ފޮނުއްވާފައެވެ.
