ތިލަމާލޭ ބްރިޖްގެ ޕައިލިންގެ މަސައްކަތް ކާމިޔާބު ކަމާއެކު ނިންމާލެވިފައިވާ ކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބް ވިދާޅުވެއްޖެ އެވެ.
މިނިސްޓަރު މުއްތަލިބް އެކްސްގައި ކުރެއްވި ޕޯސްޓެއްގައި ވިދާޅުވީ، މަޝްރޫއުގެ އެންމެ ބޮޑު ގޮންޖެހުންތައް ކުރިމަތިވި ޕައިލިންގެ މަސައްކަތް ނިމިފައިވާ ކަމަށެވެ.
އެގޮތުން، 263 ޕައިލް، އެއްގަމާއި ކަނޑުމަތީގެ 68 ތަނެއްގައި ޖަހާފައިވާ ކަމަށާއި، މި މަރުހަލާ ނިމުމާ އެކު، މަޝްރޫއުގެ %60.84 މިހާރު ނިމިފައިވާ ކަމަށް މިނިސްޓަރު މުއްތަލިބް ވިދާޅުވި އެވެ.
ކުރީ ސަރުކާރުން ސޮއިކުރި މި މަޝްރޫއަކީ ދިވެހިރާއްޖެ އާއި އިންޑިއާއާ ދެމެދު އޮތް ވަރުގަދަ ގުޅުން ދައްކުވައިދޭ މަޝްރޫއެކެވެ. އަދި ކުރީ ސަރުކާރުގެ ދައުރު ނިމުނުއިރު މަޝްރޫއުގެ 29 އިންސައްތަ މަސައްކަތް ނިމިފައިވާއިރު، މި ސަރުކާރުން މަޝްރޫއުގެ މަސައްކަތް އަވަސްކޮށްފައިވެ އެވެ.
އެގޮތުން، މާލެއިން ގުޅިފަޅާ ހަމައަށް ގުޅާލުމުގެ މަސައްކަތް 31 މާރޗް 2026 ގެ ކުރިން ނިންމުމަށް ވަނީ ރޭވިފަ އެވެ. ނަމަވެސް މިހާރުގެ ސަރުކާރުން އަމާޒު ކުރަނީ 2025 ގެ ނިޔަލަށް ނުވަތަ 2026 ގެ ކުރީކޮޅު މުޅި މަޝްރޫއު ނިންމުމަށެވެ.
