މަސްތުވާތަކެތީގެ ފަރުވާ ފުރިހަމަކުރި މީހުންގެ ތެރެއިން 18 ޕަސެންޓު މީހުން އަލުން މަސްތުވާތަކެތި ބޭނުންކުރުމުގެ މައްސަލަތަކުގައި ޝާމިލުވެފައިވާ ކަމަށް ޑްރަގް ކޯޓުން އާންމުކޮށްފައިވާ އެންމެ ފަހުގެ ތަފާސްހިސާބުތަކުން ދައްކައިފި އެވެ.
މަސްތުވާތަކެއްޗާ ދެކޮޅަށް މަސައްކަތްކުރާ ދުވަހާ ގުޅުވައިގެން ޑްރަގް ކޯޓުން ހާމަކުރި މަޢުލޫމާތުގައިވާ ގޮތުން، އެ ކޯޓު އުފެދުނު ފަހުން މިވީ 13 އަހަރުގެ ތެރޭގައި 11،700 އަށްވުރެ ގިނަ މައްސަލަ ހުށަހެޅިފައިވެއެވެ. މީގެ ތެރެއިން 94 ޕަސެންޓަކީ ފިރިހެނުންނާ ގުޅުންހުރި މައްސަލަތަކެވެ. އަދި އަންހެނުންގެ މައްސަލަތައް ތިން ޕަސެންޓުގައި ހުރިއިރު، ކުޑަކުދިންނާ ގުޅުންހުރި މައްސަލަތައް ދެ ޕަސެންޓުގައި ހިމެނެއެވެ.
ކޯޓުގެ ތަފާސްހިސާބުތަކުން އިތުރަށް ދައްކާ ގޮތުގައި، މިހާތަނަށް 5،148 މައްސަލައިގައި ފަހުގެ ހުކުމް ކޮށްފައިވާއިރު، އޭގެ ތެރެއިން 946 މީހުންގެ މައްސަލަ އަލުން ކޯޓަށް ހުށަހެޅިފައިވެއެވެ. ނަމަވެސް، ފަރުވާ ފުރިހަމަކުރި މީހުންގެ ތެރެއިން 82 ޕަސެންޓު، ނުވަތަ 4،202 މީހުން އަލުން މައްސަލަތަކުގައި ޝާމިލުވެފައެއް ނުވެއެވެ.
ފަރުވާއިން ވަކިކުރެވުނު މީހުންނަށް ބަލާއިރު، 2،389 މީހަކު ފަރުވާއިން ވަކިކޮށް، ޖަލު ހުކުމް ތަންފީޒުކުރުމަށް ކޯޓުން އަމުރުކޮށްފައިވެއެވެ. މީގެ ތެރެއިން 498 މީހުން، ޖަލު ހުކުމް ތަންފީޒުކޮށް ނިމުމަށްފަހު އަލުން މަސްތުވާތަކެތި ބޭނުންކުރުމުގެ މައްސަލަތަކުގައި ހައްޔަރުވެފައިވެއެވެ.
ޑްރަގް ކޯޓުން އިތުރަށް ހާމަކޮށްފައިވާ ގޮތުގައި، 2024 ވަނަ އަހަރުގެ މެއި މަހުގެ ނިޔަލަށް 1،376 މައްސަލަ ވަނީ ނުނިމި އެ ކޯޓުގައި ހުއްޓެވެ.
