މާލެއާއި ތިލަފުށި ދެމެދު ކަނޑުއޮޅިތަކުން އާންމު ދަތުރުފަތުރު ކުރުން މަނާކޮށްފައި ވަނިކޮށް، އެ ސަރަހައްދުން ދަތުރުކުރާކަން ފާހަގަކުރެވިގެން އެކަން ނުކުރުމަށް ފުލުހުން އަނެއްކާވެސް އަންގައިފި އެވެ.
ފުލުހުން ނެރުނު އިއުލާނުގައި ބަޔާންކޮށްފައިވާ ގޮތުގައި، ގްރޭޓަރ މާލެ ކަނެކްޓިވިޓީ ބްރިޖުގެ މަޝްރޫއުގެ މަސައްކަތްތައް ކުރިއަށްދާ ސަރަހައްދުން ދަތުރުކުރުމަކީ ރައްކާތެރި ކަމެއް ނޫނެވެ. އެހެންކަމުން، އާންމު ދަތުރުފަތުރަށް އަލުން ހުޅުވާލަންދެން އެ ސަރަހައްދުން ދަތުރު ނުކުރުމަށް ވަނީ އަންގާފަ އެވެ.
މި މަޝްރޫއަކީ ދިވެހިރާއްޖެއާއި އިންޑިއާއާ ދެމެދު އޮތް ވަރުގަދަ ގުޅުން ދައްކުވައިދޭ މަޝްރޫއެއްގެ ގޮތުގައި ފާހަގަކުރެވެ އެވެ. މިހާތަނަށް ބްރިޖުގެ 53 ޕަސެންޓްގެ މަސައްކަތް ވަނީ ނިމިފަ އެވެ. މިހާރު ކުރިއަށްދަނީ ޕައިލް ކެޕް، ޕިއަރ ކޮލަމްސް އެޅުމުގެ މަސައްކަތާއި ސުޕަރ ސްޓްރަކްޗަރގެ ސެގްމެންޓްސް ލޯންޗް ކުރުމުގެ މަސައްކަތްތަކެވެ.
ކުރީގެ ސަރުކާރުގެ ދައުރު ނިމުނުއިރު މަޝްރޫއުގެ 29 އިންސައްތަ މަސައްކަތް ނިމިފައިވާއިރު، މިހާރުގެ ސަރުކާރުން މަޝްރޫއުގެ މަސައްކަތް އަވަސްކޮށްފައިވާކަން ފާހަގަކުރެވެ އެވެ. މާލެއިން ގުޅިފަޅާ ހަމައަށް ގުޅާލުމުގެ މަސައްކަތް 31 މާރޗް 2026 ގެ ކުރިން ނިންމުމަށް ރޭވިފައިވީ ނަމަވެސް، މިހާރުގެ ސަރުކާރުން އަމާޒު ކުރަނީ 2025 ގެ ނިޔަލަށް ނުވަތަ 2026 ގެ ކުރީކޮޅު މުޅި މަޝްރޫއު ނިންމުމަށެވެ.
