އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް)ގެ ކުޑަކުދިންގެ އިމަޖެންސީ ރޫމް (އީއާރް) ހުޅުވި ފަހުން 10،000 އަށްވުރެ ގިނަ ކުދިންނަށް ފަރުވާ ދީފައިވާ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެ އެވެ.
”ރައްޔިތުންނާ އެކު“ ޕޮޑްކާސްޓްގެ ދެވަނަ އެޕިސޯޑުގައި ވާހަކަފުޅު ދައްކަވަމުން ރައީސް މުއިއްޒު ވިދާޅުވި ގޮތުގައި، މިދިޔަ އަހަރުގެ ނޮވެމްބަރު މަހު ފެށި މި ޚިދުމަތުން މިހާތަނަށް 10،393 ކުޑަކުދިންނަށް ފަރުވާ ދެވިފައިވެ އެވެ. އަދި 16 އަހަރުން ދަށުގެ ކުދިންނަށް ޚާއްސަކޮށްގެން ހުޅުވި މި އީއާރްގެ ސަބަބުން ހޮސްޕިޓަލުގެ މައި އީއާރަށް ވެސް ލުއިތަކެއް ލިބިފައިވާ ކަމަށް ރައީސް ފާހަގަކުރެއްވި އެވެ.
ކުޑަކުދިންގެ އީއާރްގެ ޚާއްސަ ކަންތައްތަކާ ބެހޭގޮތުން ވާހަކަފުޅު ދައްކަވަމުން ރައީސް މުއިއްޒު ވިދާޅުވީ، ”އެތަނުގެ މާހައުލު ބައްޓަންކުރެވިފައި ހުންނާނީ ކުޑަކުދިންނަށް ހިތްގައިމު ގޮތަކަށް“ ކަމަށެވެ. އަދި މި އީއާރްގައި ކުޑަކުދިންގެ ޚާއްސަ ޑޮކްޓަރުން ޚިދުމަތް ދެމުންދާ ކަމަށް ވެސް ވިދާޅުވި އެވެ.
މީގެއިތުރުން، ކުޑަކުދިންގެ އީއާރުން ވަރަށް އަވަހަށް ފަރުވާ ލިބޭނެ ކަމަށާއި، މިކަމުގެ ސަބަބުން ކުދިންނަށް ލިބެންޖެހޭ ބޭސްފަރުވާ ލަސްނުވެ ލިބޭނެ ކަމަށް ރައީސުލްޖުމްހޫރިއްޔާ ވަނީ ފާހަގަކުރައްވާފަ އެވެ.
