އޯޓިޒަމަށް ހޭލުންތެރިކުރުމުގެ ދުވަހާ ގުޅިގެން ހެލްތު މިނިސްޓްރީން ޚާއްޞަ ޕެނަލް ޑިސްކަޝަނެއް ކުރިއަށ ްގެންގޮސްފި އެވެ.
މި ޕެނަލް ޑިސްކަޝަންގައި އޯޓިޒަމް ދާއިރާގެ ތަޖުރިބާކާރުންނާއި، އޯޓިޒަމް ސްޕެކްޓްރަމް ޑިސްއޯޑަރ (އޭއެސްޑީ) ކުދިންގެ ބެލެނިވެރިންގެ އިތުރުން ސަރުކާރުގެ އިސް ބޭފުޅުންނާއި ސިޔާސީ ފަރާތްތައް ބައިވެރިވެ ވަޑައިގަންނަވާނެ ކަމަށް ހެލްތު މިނިސްޓްރީން މަޢުލޫމާތު ދެއްވާފައިވެ އެވެ.
މި ޑިސްކަޝަންގައި ބައިވެރިވެ ވަޑައިގަންނަވާ ފަރާތްތަކުގެ ތެރޭގައި ހެލްތް މިނިސްޓްރީގެ ރެކްޓަރ ޖެނަރަލް އޮފް ހެލްތް ސަރވިސަސް ޑރ. އަޙްމަދު އަޝްރަފް، ހުޅުމާލެ ހޮސްޕިޓަލްގެ މެންޓަލް ހެލްތް ސެންޓަރގެ ކޮންސަލްޓަންޓް ސައިކިއޭޓްރީ ޑރ. މަޢުމޫން ޝަރީފް، އައި.ޖީ.އެމް.އެޗްގެ ކޮންސަލްޓަންޓް ސަބްސްޕެޝަލިސްޓް އިން ޑިވެލޮޕްމެންޓަލް ޕީޑިއެޓްރިކްސް ޑރ. އައިމިނަތު ފަޒުނާ އަދި ނެޝަނަލް މެންޓަލް ހެލްތް ޑިޕަރޓްމަންޓްގެ ޑިރެކްޓަރ އައިމިނަތު ޝަހުޒާ ހިމެނިވަޑައިގަންނަވަ އެވެ.
މިއަދު މެންދުރު 14:30 ގައި ބޭއްވުމަށް ހަމަޖެހިފައިވާ މި ޕްރޮގްރާމް އަސްލު ޓީވީ، ވީ މީޑިއާ، ސަންގު ޓީވީ، މެންދުރު ޓީވީ، އެމްއެމް ޓީވީގެ އިތުރުން ޕީއެސްއެމްއިން ލައިވްކޮށް ގެނެސްދީފައިވެ އެވެ.
މި ޑިސްކަޝަން ބޭއްވުމުގެ މައިގަނޑު މަޤްޞަދަކީ އޯޓިޒަމަށް ހޭލުންތެރިކަން އިތުރުކުރުމާއި، އޯޓިޒަމް ހުންނަ ކުދިންނަށް ބޭނުންވާ އެހީތެރިކަން ފޯރުކޮށްދިނުމުގެ މުހިންމުކަން ފާހަގަކުރުމެވެ. އަދި މީގެ އިތުރުން މުޖުތަމަޢުގައި އޯޓިޒަމް ހުންނަ ކުދިންނާ މެދު ހުރި ނުރަނގަޅު ވިސްނުންތައް ނައްތާލުމަށް މަސައްކަތްކުރުމެވެ.
