އެމެރިކާއިން ޑިއޭގޯ ގާސިއާއަށް ބީ-2 ސްޕިރިޓް ސްޓެލްތް ބޮމްބާސްތައް ފޮނުވައިފި އެވެ.
އެމެރިކާއިން މި ފިޔަވަޅު އަޅާފައިވަނީ އީރާނާ ދެމެދު އޮތް ގުޅުން އިތުރަށް ގޯސްވަމުން ދަނިކޮށެވެ.
އެމެރިކާގެ އޮފިޝަލުން މަޢުލޫމާތު ދޭ ގޮތުގައި ނިއުކްލިއަރ އަދި އާންމު ހަތިޔާރު އުފުލޭ ބީ-2 ބޮމްބާސްތައް ފޮނުވާފައިވަނީ ބާރުގަދަކަން ދެއްކުމުގެ ގޮތުންނެވެ. އަދި މިއީ އީރާނުން ސަރަޙައްދުގައި އެއްވެސް އަދާވާތްތެރި ޢަމަލެއް ހިންގިޔަ ނުދިނުމަށް އަޅާ ފިޔަވަޅެއް ކަމަށް އެ ފަރާތުން ބުނެ އެވެ.
އޮފިޝަލުން ބުނާ ގޮތުގައި ޑިއޭގޯ ގާސިއާގައި ހުންނަ އަސްކަރީ މަރުކަޒު މެދުވެރިކޮށް، އެމެރިކާއަށް ފަސޭހަކަމާއެކު އީރާނުގެ މުހިންމު އަސްކަރީ އަދި ނިއުކްލިއަރ ތަންތަނަށް ހަމަލާދެވޭނެ އެވެ. އަދި މި އަސްކަރީ އުޅަނދުތަކަށް ފަސޭހަކަމާއެކު، އިނާރުގެ އަމާޒުތަކަށް ވާސިލްވެވޭނެކަމަށް އޮފިޝަލުން ބުނެ އެވެ.
އެމެރިކާއާ އިރާނުގެ މަޝްރަހު އަނެއްކާވެސް ގޯސްވެފައިމިވަނީ އެމެރިކާގެ ރައީސް ޑޮނަލްޑް ޓްރަމްޕްގެ އިންޒާރުތަކާއި ގުޅިގެންނެވެ. އެމެރިކާއާ އިރާނަކީ ދެ ހަތުރުންކަމަށްވާއިރު، ޓްރަމްޕް ވަނީ އިރާނުން ނިއުކްލިއަރ މަޝްވަރާތަކުގައި ބައިވެރިނުވާނަމަ އެ ޤައުމަށް ބޮން އަޅާނެކަމުގެ އިންޒާރުދީފަ އެވެ.
އެއާއެކު އީރާނުގެ ސުޕްރީމް ލީޑަރު، އާޔަތުއްﷲ ޢަލީ ޚާމެނީ ވަނީ އެމެރިކާއިން އެއްވެސް ހަމަލާއެއް ދޭން އުޅެފިނަމަ، ”އީރާނުން ވަރުގަދައަށް ރައްދު ދޭނެ“ ކަމަށް އިންޒާރު ދެއްވާފަ އެވެ. އަދި އިރާނަށްވެސް ޑިއޭގޯ ގާސިއާއަށް ހަމަލާތައް ދިނުމުގެ ޤާބިލްކަން ލިބިގެންވާކަމަށާއި، އިރާނަށް ހަމަލާދީފިނަމަ ޑިއޭގޯ ގާސިއާއަށްވެސް ހަމަލާތައް އަމާޒުކުރާނެކަމުގެ އިންޒާރުދީފައިވެ އެވެ.
ބައިނަލްއަޤްވާމީ މުޖުތަމަޢުން ވަނީ ދެފަރާތުންވެސް ބޮޑު ހަނގުރާމައަކަށް މަގުފަހިވެދާނެ ފަދަ އިތުރު ކަންކަން ނުކުރުމަށް ގޮވާލާފަ އެވެ.
ޑިއޭގޯ ގާސިއާއަކީ ރާއްޖޭގެ ދެކުނަށް އޮންނަ ފޯޅަވަހީގައި ތަރައްޤީކޮށްފައިވާ އެމެރިކާގެ އަސްކަރީ މަރުކަޒު އެވެ.
