ތައިލެންޑަށް ރާއްޖެއިން ކަނޑައެޅި ސަފީރު، ފުއާދު ތައުފީޤް އޭނާގެ ސަފީރުކަމުގެ ފަތްކޮޅު އެ ޤައުމުގެ ރަސްގެފާނަށް އަރުވައިދި އެވެ.

ބެންކޮކްގެ އެމްފޯން ރޯޔަލް ޕެލަސްގައި ބޭއްވުނު ރަސްމިއްޔާތެއްގައި ފުއާދު، އޭނާގެ ސަފީރުކަމުގެ ފަތްކޮޅު އެރުވީ އެ ޤައުމުގެ ރަސްގެފާނު މަހާ ވަޖިރަލޮންގްކޯން އަށެވެ.

މި ރަސްމިއްޔާތުގައި ސަފީރު ތޯފީކް ވަނީ ތައިލެންޑްގެ ރަސްގެފާނާއި، ސަރުކާރާއި އަދި އެގައުމުގެ އެކުވެރި ރައްޔިތުންނަށް، ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ އިތުރުން ދިވެހި ރައްޔިތުންގެ ހެޔޮއެދުމާއި ސަލާމް އަރިސްކުރައްވާފަ އެވެ.

ދެގައުމުގެ ދެމެދުގައި އޮތް ދިގު މުއްދަތުގެ ގުޅުން އިތުރަށް ހަރުދަނާކުރުމަށް ދިވެހި ސަރުކާރުން ދެމިހުންނާނެކަން ސަފީރު ފުއާދު ވަނީ ކަށަވަރުކޮށްދެއްވާފަ އެވެ. އަދި ދެގައުމުގެ އެއްބާރުލުން އިތުރަށް ވަރުގަދަކުރުމަށް ގާތުން މަސައްކަތްކުރައްވާނެ ކަމުގެ ޔަގީންކަންވެސް ދެއްވާފައިވެ އެވެ.

ދިވެހިރާއްޖެއާއި ތައިލެންޑާ ދެމެދު ޑިޕްލޮމެޓިކް ގުޅުން ގާއިމުކުރެވިފައިވަނީ 1979 ވަނަ އަހަރުގެ ޖޫން 21 ވަނަ ދުވަހު އެވެ. ސަފީރު ފުވާދު ތޯފީކް ތައިލެންޑަށް ދިވެހިރާއްޖޭގެ ސަފީރުކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު އައްޔަންކުރެއްވީ މިދިޔަ 2024 ވަނަ އަހަރުގެ ޑިސެމްބަރު 16 ވަނަ ދުވަހުއެ ވެ.

ރާއްޖެ - ތައިލެންޑް މިނިސްޓްރީ އޮފް ފޮރިން އެފެއާޒް ފުއާދު ތައުފީޤް