ދިވެހި ރައްޔިތުންގެ ޕާޓީ (ޑީއާރުޕީ)ގެ ދަރަންޏަށް ކުރީގެ ރައީސް މައުމޫން އަބްދުލްގައްޔޫމް ޒިންމާ ކުރުވަން އުޅޭތީ އެކަމާ ދެކޮޅަށް އެމަނިކުފާނުގެ ފަރާތުން ސުޕްރީމް ކޯޓަށް ހުށަހެޅި މައްސަލައިގެ ޝަރީއަތް ފެށުން ފަސްކޮށްފި އެވެ.
ސުޕްރީމް ކޯޓުގައި މިމައްސަލައިގެ އަޑުއެހުންތައް މިއަދު ފެށުމަށް ތާވަލުކޮށްފައިވަނީ 09:00 ގަ އެވެ. އެހެންނަމަވެސް މިއަދުގެ އަޑުއެހުން ސުޕްރީމް ކޯޓުގައި ކުރިއަށް ގެންގޮސްފައެއް ނުވެ އެވެ.
އެނގިފައިވާ ގޮތުގައި ސުޕްރީމް ކޯޓުގެ މިއަދުގެ އަޑުއެހުން ކެންސަލް ކޮށްފައިވަނީ އެމްޓީސީސީން އެކަމަށް އެދިގެންނެވެ. މައްސަލަ ބައްލަވާ ފަނޑިޔާރުންގެ ބެންޗުގައި ހިމެނިވަޑައިގަންނަވަނީ ފަނޑިޔާރު ޑރ. އަޒްމިރާލްދާ ޒާހިރާއި ފަނޑިޔާރު އާއިޝާ ޝުޖޫން މުހައްމަދު އަދި ފަނޑިޔާރު ޑރ. މުހައްމަދު އިބްރާހީމް އެވެ.
ޑީއާރުޕީން އެމްޓީސީސީއަށް ދައްކަންޖެހޭ 1.1 މިލިއަން ރުފިޔާ އެ ޕާޓީން ނުދައްކާ އޮތް މައްސަލައިގައި އެމްޓީސީސީން ސިވިލް ކޯޓުގައި ދައުވާކުރީ ޕާޓީގެ އޭރުގެ ރައީސްގެ ހައިސިއްޔަތުން މައުމޫން އެ ދަރަންޏަށް ޒިންމާ ކޮށްދިނުމަށްއެދި އެވެ. މި މައްސަލައިގައި ސިވިލް ކޯޓުން ހުކުމް ކޮށްފައިވަނީ އެ ފައިސާ ދެއްކުމަށް ރައީސް މައުމޫންގެ މައްޗަށް އަމުރުކުރާނެ ތަނެއް ނެތް ކަމަށެވެ. މި ނިންމުން ހައި ކޯޓުގައި އެމްޓީސީސީގެ ފަރާތުން އިސްތިއުނާފުކޮށް އިސްތިއުނާފީ ތިން ނުކުތާއެއް ހުށަހަޅާފައިވެ އެވެ.
އެމްޓީސީސީން ހައި ކޯޓަށް މައްސަލަ ހުށަހެޅުމުން ރައީސް މައުމޫންގެ ފަރާތުން އިޖުރާއީ އިއުތިރާޒެއް ނަގާ ބުނެފައިވަނީ، މި މައްސަލައިގައި ޖުމުލަ 5 މައްސަލައެއް ސިވިލް ކޯޓޫގައި ކުރިއަށް ގެންދިޔައިރު، މިއިން އެއްވެސް މައްސަލައެއްގައި މައުމޫނަކީ ހަސްމެއްވެސް ނޫން ކަމަށެވެ. އެހެންކަމުން އެއްވެސް ސިފައެއްގައި ހަސްމެއްގެ ގޮތުގައި ނުހިމެނޭ ދަށު ކޯޓުގެ މައްސަލަތަކެއް އިސްތިއުނާފީ މަރުހަލާފައި އައުމުން، އިސްތިއުނާފީ މައްސަލަ ރައީސް މައުމޫނަށް ރައްދު ކުރުމަކީ ކުރެވިދާނެ ކަމެއްކަމަށް ނުދެކޭ ކަމަށެވެ. މި އިޖުރާއީ އިއުތިރާޒާ ގުޅިގެން ރައީސް މައުމޫނުގެ ފަރާތުން ހައިކޯޓުގައި އެދިފައިވަނީ ސިވިލް ކޯޓުގެ މި ގަޟިއްޔާގެ އިސްތިއުނާފު ރައީސް މައުމޫނަށް ރައްދުވާގޮތަށް ހުށަނޭޅޭނެ ކަމަށް ކަނޑައަޅައިދިނުމަށެވެ. މި ހުށަހެޅުމާ ގުޅިގެން ހައިކޯޓުން ނިންމާފައިވަނީ އިސްތިއުނާފީ 3 ނުކުރާތެ ތެރެއިން 1 އަދި 3 ވަނަ އިސްތިއުނާފީ ނުކުރާއަކަށް ޖަވާބުދާރީވާން އަންގާނެ ތަނެއް ނެތް ކަމަށެވެ. ނަމަވެސް އިސްތިއުނާފީ 2 ވަނަ ނުކުތާއަށް ޖަވާބުދާރީވުމަށް އަންގާފައިވެ އެވެ.
ހައި ކޯޓުގައި މި މައްސަލަ ކުރިއަށްގެންދެވޭނެ ކަމަށް އެ ކޯޓުން ނިންމުމުން އެ ނިންމުން މައުމޫންގެ ފަރާތުން ސުޕްރީމް ކޯޓުގައި އިސްތިއުނާފު ކޮށްފައިވަނީ މިދިޔަ އަހަރު އޭޕްރިލް މަހުގެ ތެރޭގަ އެވެ.
ރައީސް މައުމޫން އަބްދުލްގައްޔޫމް މޯލްޑިވްސް ޓްރާސްޕޯޓް އެންޑް ކޮންޓްރެކްޓިން ކޮންޕެނީ (އެމްޓީސީސީ) ސުޕްރީމް ކޯޓު