ނިމިދިޔަ އަހަރު ފެމިލީ ކޯޓަށް އެކި ހަރަދުތަކުގެ ގޮތުގައި 97 މިލިއަނަށް ވުރެ ގިނަ ރުފިޔާ ސާބިތުކޮށްފައިވާކަމަށް އެ ކޯޓުން ބުނެފި އެވެ.
ފެމިލީ ކޯޓުން އާންމު ކުރި މިދިޔަ އަހަރުގެ އުސްއަލިތަކަށް ބަލާއިރު އަނބިދަރިންގެ ހަރަދާއި، އިއްދައިގެ ހަރަދާއި، ވިހެއުމުގެ ހަރަދާއި ކައިވެނީގެ ރަނުގެ ގޮތުގައި 97،170،594.94 ރުފިޔާ ވަނީ އެ ކޯޓުން ސާބިތުކޮށްފަ އެވެ.
ފެމިލީ ކޯޓުން ބުނީ މިދިޔަ އަހަރު އެ ކޯޓަށް ބަލައިގަނެފައިވަނީ 46،792،061.34 ރުފިޔާ ކަމަށެވެ. އަދި 2023 ވަނަ އަހަރު އެ ކޯޓުން ރައްދު ނުކުރެވި ހުރި ފައިސާ ހިމެނޭ ގޮތަށް 47،542،924.87 ރުފިޔާ ރައްދުކޮށްދެވުނުކަމަށްވެސް ބުނެފައިވެ އެވެ.
މިދިޔަ އަހަރު ފެމިލީ ކޯޓުގެ އާއިލީ މައްސަލަތައް ހައްލު ކުރުމާ ބެހޭ ބަޔަށް 227 މައްސަލަ ހުށަހެޅުނު އިރު 119 މައްސަލައަކަށް ވަނީ ސުލްހަވެރި ހައްލެއް ގެނެވިފަ އެވެ. އަދި ދެމަފިރިންގެ މެދުގައި ޖެހިފައިވާ މައްސަލަތައް ހައްލު ކުރުމަށާއި ވަރިވެފައިވާ ދެމީހުންގެ ދަރިން ބެލުމާ ގުޅޭ ގޮތުން 6 އެއްބަސްވުމެއް ލިޔުމުން ވެފައިވާކަމަށް ފެމިލީ ކޯޓުން ބުނެ އެވެ.
މީގެ އިތުރުން ފެމިލީ ކޯޓަށް ހާޒިރުވުމަށް އަންގާ 12،096 އަމުރު ފޮނުވާފައިވާއިރު 4،101 ޝަރީއަތުގެ އަޑުއެހުން ބާއްވާފައިވެ އެވެ. 2023 ވަނަ އަހަރު ނިމުނު އެ ކޯޓަށް ނުބެލި ބާކީ ހުރީ 318 މައްސަލަ އެކެވެ. މިދިޔަ އަހަރު ޖުމުލަ 2،293 މައްސަލަ ހުށަހެޅުނު އިރު 2،370 މައްސަލައެއް ވަނީ ނިންމާފަ އެވެ. މިދިޔަ އަހަރު ނިމުނު އިރު ފެމިލީ ކޯޓުން ނުނިމި އޮތީ 241 މައްސަލަ އެވެ.
