މި އަހަރުގެ ވިޒިޓް މޯލްޑިވްސްގެ ހަރަކާތްތައް އެންމެ ފައިދާހުރި ގޮތެއްގައި ބައްޓަން ކުރުމަށްޓަކައި، ޓޫރިޒަމް އިންޑަސްޓްރީގައި ހަރަކާތްތެރިވާ ފަރާތްތަކުގެ ޚިޔާލު ހޯދުމަށް ބާއްވާ ބައްދަލުވުންތަކުގައި ބައިވެރިވުމުގެ ފުރުޞަތު މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) އިން ހުޅުވާލައްވައިފިއެވެ.
އެމްއެމްޕީއާރްސީ އިން ބުނެފައިވާ ގޮތުގައި، މި ބައްދަލުވުންތަކުގެ މަޤްޞަދަކީ ތަފާތު ސެގްމަންޓުތައް ހިމެނޭހެން، އެންމެ ސަމާލުކަން ދޭންވީ ދާއިރާތަކަށް ޚާއްޞަކޮށް، ރާއްޖެ އިޝްތިހާރުކުރުމުގެ ހަރަކާތްތައް އެންމެ ފައިދާހުރި ގޮތަކަށް ރޭވުމެވެ. މި ބައްދަލުވުންތައް ބާއްވާނީ ފޯކަސް ގްރޫޕްތަކަށް ވަކިވަކިންނެވެ. އަދި މީގެ އިތުރުން، އާ މާކެޓުތަކުގައި އިސްތިހާރު ކުރުމާއި އިސްތިހާރު ކުރުމުގައި އީޖާދީ ގޮތްތައް ހޯދުމަށް ވެސް މި ބައްދަލުވުންތަކުގައި ޚިޔާލު ބަދަލުކުރެވޭނެ ކަމަށް އެމްއެމްޕީއާރްސީ އިން ހާމަކޮށްފައިވެއެވެ.
މި ބައްދަލުވުންތައް ބާއްވާނެ ތާރީޚެއް އަދި ކަނޑައަޅާފައި ނުވިނަމަވެސް، ބައިވެރިވާން ބޭނުންވާ ޓޫރިޒަމް އިންޑަސްޓްރީގައި ހަރަކާތްތެރިވާ ފަރާތްތަކުން ރަޖިސްޓްރީވުމަށް އީމެއިލް މެދުވެރިކޮށް ފުރުޞަތު ހުޅުވާލާފައިވާ ކަމަށް އެމްއެމްޕީއާރްސީ އިން ބުނެފައިވެއެވެ.
އެމްއެމްޕީއާރުސީން މީގެކުރިން ބުނެފައިވާ ގޮތުގައި މި އަހަރު ރާއްޖޭގެ ފަތުރުވެރިކަން އިސްތިހާރުކުރުމަށް ހާއްސަ މަސައްކަތްތަކެއް ކުރުމަށް ވަނީ ނިންމާފަ އެވެ.
މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ)
