ހޯމް މިނިސްޓަރު އަލީ އިހުސާންގެ އިތުބާރު ނެތްކަމުގެ މައްސަލަ ރައްޔިތުންގެ މަޖިލީހަށް ހުށަހެޅީ ސިޔާސީ މަގުސަދެއްގައި ކަމަށާއި އެ މައްސަލައާ އެއްކޮޅަށް ވޯޓެއް ނުލާނެކަމަށް ވެރިކަން ކުރާ ޕީއެންސީގެ ޕާލިމެންޓްރީ ގްރޫޕުން ބުނެފި އެވެ.

ޕީއެންސީގެ ޕީޖީ ލީޑަރު އިބްރާހިމް ފަލާހް ’ޖަވިޔަނި‘ ނޫހަށް ވިދާޅުވީ މި މައްސަލައަކީ އިދިކޮޅު އެމްޑީޕީން ސިޔާސީ މަގުސަދެއް ހާސިލް ކުރުމަށް ހުށަހަޅާފައިވާ މައްސަލައެއް ކަމަށެވެ.

މިއީ ސިޔާސީ މަގުސަދެއް ހާސިލް ކުރުމަށް ހުށަހެޅި މައްސަލައެއް. ސަރުކާރުން ރައްޔިތުންގެ ހައްގުގައި ރަނގަޅު ކަންތައްތަކެއް ކުރަމުން ދާތީ ހަޖަމް ނުވެގެން ހުށަހެޅި މައްސަލައެއް މީ.

ފަލާހް ވިދާޅުވީ މިނިސްޓަރު އިހުސާންއާ ދެކޮޅަށް ކުރެވެމުން ދަނީ ދޮގު ތުހުމަތުތަކެއް ކަމަށާއި އެފަދަ އެއްވެސް ކަމެއް މިނިސްޓަރި ކުރައްވާފައި ނުވާ ކަމަށެވެ. އަދި މިއީ ހޯމް މިނިސްޓްރީން ކުރަމުންދާ ބޮޑެތި އެތަށް މަސައްކަތަކަށް ހުރަސް އެޅުމަށް ހުށަހެޅި މައްސަލައެއްކަމަށްވެސް ވިދާޅުވި އެވެ.

އެމްޑީޕީން އިތުބާރު ނެތްކަމުގެ މައްސަލަ މަޖިލީހަށް ވެއްދި ނަމަވެސް މަޖިލީހުން އެ މައްސަލަ ފާސް ނުވާނެކަމަށް ފަލާހް ވިދާޅުވި އެވެ. އެގޮތުން ރައްޔިތުންގެ ތާއީދު މިނިސްޓަރު އިހުސާނަށް އޮތްކަމަށާއި ޕީއެންސީން މި މައްސަލައާ އެއްކޮޅަށް ވޯޓެއް ނުލާނެކަމަށް ފަލާހް ވިދާޅުވި އެވެ. އަދި އެމްޑީޕީން އެ މައްސަލަ ހުށަހެޅި 10 މީހުންގެ ސޮޔާ އެކު ކަމަށް ވަންޏާ އެ މައްސަލައަށް ލިބޭނީ 10 ވޯޓު ކަމަށްވެސް ފަލާހް ވިދާޅުވި އެވެ.

10 މީހުންގެ ސޮޔާ އެކު ހުށަހެޅިއްޔާ 10 ވޯޓު ލިބޭނީ. 12 މީހުންގެ ސޮޔާ އެކު ހުށަހެޅިއްޔާ 12 ވޯޓު ލިބޭނީ. އަޅުގަނޑަށް ޔަގީން އިރާދަކުރެއްވިއްޔާ މި މައްސަލަ މަޖިލީހުން ފާހެއް ނުވާނެކަން.

މިނިސްޓަރު އިހުސާނާ ދެކޮޅަށް ހުށަހަޅާފައިވާ އިތުބާރު ނެތްކަމުގެ މައްސަލައަކީ މިނިސްޓަރާ ދެކޮޅަށް ކުރެވޭ ބައެއް ތުހުމަތުތަކުގެ ސަބަބުން ހުށަހެޅުނު މައްސަލަ އެކެވެ. އޭގެ ތެރޭގައި ވެރިކަން ކުރާ ޕީއެންސީއަށް މެންބަރުން ވެއްދުމަށް ހޯމް މިނިސްޓްރީއާއި އެ މިނިސްޓްރީގެ ދަށުން ހިންގަމުން އަންނަ ޑިޕާޓްމެންޓް އޮފް ނެޝަނަލް ރެޖިސްޓްރޭޝަންގެ މުދަލާއި މީހުން ބޭނުންކޮށްފައިވާކޮށްފައިވާކަމަށް ކުރެވޭ ތުހުމަތުތައް ހިމެނެ އެވެ. އަދި ބައެއް މީހުންނަށް ނޭނގި ޕީއެންސީއަށް ވެއްދިކަމަށްވެސް ތުހުމަތު ކުރެވިފައިވެ އެވެ.

މިނިސްޓަރު އިހުސާންއާ ދެކޮޅަށް މިފަދަ ތުހުމަތުތަކެއް ކުރެވުނު ނަމަވެސް މިފަދަ ކަމެއްގައި މިނިސްޓަރު އިހުސާން ބައިވެރިވި ކަމުގެ އެއްވެސް ހެއްކެއް ދެއްކިފައި ނުވާކަމަށް ޕީއެންސީން ބުނެ އެވެ. މިނިސްޓަރު އިހުސާން ޑީއެންއާރު އޮފީހުގައި ހުންނެވި ފޮޓޯއެއް ދައުރުވި ނަމަވެސް، އެއީ ޑީއެންއާރުގެ މުވައްޒަފުން ޕިއްޒާ ކާތީ އެތަނަށް އެއްޗެއް ކާން ދިއުމަށް އެދުމުން ދިޔަ ދުވަހެއްގައި ނަގާފައިވާ ފޮޓޯއެއްކަމަށް މިނިސްޓަރު އިހުސާން ވަނީ ވިދާޅުވެފަ އެވެ.

ހޯމް މިނިސްޓަރު އަލީ އިހުސާން ރައްޔިތުންގެ މަޖިލިސް ކޮންގްރެސް ޕާޓީ އެމްޑީޕީ ޕީއެންސީގެ ޕީޖީ ލީޑަރު އިބްރާހިމް ފަލާހު