ތައިލޭންޑާއި ޔޫއޭއީ އިން މިހާރު އާސަންދަ ލިބޭނެ: ފުރަތަމަ އިސްކަންދެނީ ކިޑްނީ ޓްރާންސްޕްލާންޓަށް

Advertisement

އެންމެ ފަސް

Advertisement

ތައިލޭންޑާއި، ޔުނައިޓެޑް އެރެބް އެމިރޭޓްސް (ޔޫއޭއީ) އިން މިއަދުން ފެށިގެން އާސަންދަ ސްކީމްގެ ދަށުން ޚިދުމަތް ލިބޭނެ ކަމަށް އެ ކުންފުނިން ބުނެފި އެވެ.

މި ހިދުމަތް ލިބޭނީ މި ދެ ޤައުމުގައި އެމްޕެނަލްވެފައިވާ ހޮސްޕިޓަލްތަކަށެވެ.

އާސަންދަ ކޯޕަރޭޝަނުން މިއަދު ނެރުނު ނޫސްބަޔާނެއްގައި ބުނެފައިވާ ގޮތުގައި، މި ހޮސްޕިޓަލްތަކަށް ބަލިމީހުން ފޮނުވާނީ ހުސްނުވާ އާސަންދަ ސްކީމް ހިންގުމުގެ ގަވާއިދުގެ ދަށުން މިހާރުވެސް ރާއްޖެއިން ބޭރުގެ ހޮސްޕިޓަލްތަކަށް ބަލިމީހުން ފޮނުވާ އުސޫލުންނެވެ.

ތައިލޭންޑާއި ޔޫއޭއީގެ ހޮސްޕިޓަލްތަކަށް ބަލިމީހުން ފޮނުވަން ފަށާއިރު، އެންމެ ފުރަތަމަ އިސްކަންދޭނީ ކިޑްނީ ޓްރާންސްޕްލާންޓް ކުރަން ބޭނުންވާ ބަލިމީހުންގެ ތެރެއިން ”ފަސްޓް ޑިގްރީ ޑޯނަރ“ އެއް ނުލިބުމުގެ ސަބަބުން ޓްރާންސްޕްލާންޓް ނުކުރެވި ތިބި ފަރާތްތަކަށެވެ. މިހާތަނަށް އާސަންދައަށް އެމްޕެނަލްކުރެވިފައިވާ ޤައުމުތަކުގެ ޤާނޫނުތަކުން ލާޒިމްކުރާތީ، ކިޑްނީ ޑޯނަރަކީ ”ފަސްޓް ޑިގްރީ ޑޯނަރ“ އަކަށްވާން ޖެހެއެވެ.

ދެވަނައަށް އިސްކަންދޭނީ ރާއްޖެ، އިންޑިޔާ ނުވަތަ ސްރީލަންކާގެ މަރުކަޒެއް މެދުވެރިކޮށް އެތައް ފަހަރެއްގެ މަތިން ފަރުވާދެވުނު ނަމަވެސް، ބަލި ޙާލަތަށް ކުރިއެރުމެއް ނުލިބި ތިބި ފަރާތްތަކަށެވެ. މިފަދަ ފަރާތްތަކަށް ކަމާބެހޭ ޑޮކްޓަރުންގެ ޓީމުގެ ލަފަޔާއެކު ބަލިމީހާ ފޮނުވާނެ މަރުކަޒެއް އާސަންދަ ކޯޕަރޭޝަނުން ކަނޑައަޅާނެއެވެ.

އާސަންދަ ކޯޕަރޭޝަނުން ބުނެފައިވާ ގޮތުގައި، ކުރިއަށް އޮތް ދުވަސްތަކުގައި އިތުރު ބައިތަކަށްވެސް މި ޚިދުމަތް ފުޅާކުރެވޭނެއެވެ. އަދި ރާއްޖެއިން ބޭރުން ފަރުވާ ހޯދުމަށް އެދި ހުށަހަޅާނީ މިހާރުވެސް ޢަމަލުކުރަމުންދާ އުސޫލުން، އާސަންދަ މޯބައިލް އެޕް، މައި އާސަންދަ ޕޯޓަލް، ވިރަ ކައުންޓަރުތައް އަދި އާސަންދަ ފްރަންޓް އޮފީސް މެދުވެރިކޮށެވެ.

ތައިލޭންޑާއި، ޔުނައިޓެޑް އެރެބް އެމިރޭޓްސް (ޔޫއޭއީ) އިން އާސަންދަ ލިބޭނެ އިންތިޒާމް ހަމަޖެއްސުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ. މި ދެ ޤައުމުގައި އާސަންދަ ހިދުމަތް ލިބޭނީ އަބޫ ދާބީގެ ބުރްޖީލް މެޑިކަލް ސިޓީއާއި ބެންކޮކްގެ ވޯލްޑް މެޑިކަލް ހޮސްޕިޓަލްގެ އިތުރުން ބެންކޮކްގެ ބެންކޮކް ހޮސްޕިޓަލުންނެވެ.

ރާއްޖެ - ތައިލެންޑް ރާއްޖެ - ޔޫއޭއީ އާސަންދަ

Leave a Reply

Your email address will not be published. Required fields are marked *

ހަބަރާއި ގުޅޭ