މާލޭގެ މަގެއްގައި ސައިކަލުގައި ދުއްވަމުންދިޔަ އަންހެނެއްގެ ކަރުން ރަން ފަށެއް ފޭރުނު މައްސަލައިގައި ހައްޔަރުކުރެވުނު މީހާގެ ބަންދު މުއްދަތު އިތުރުކޮށްފި އެވެ.

ބަންދުގެ މުއްދަތާ މެދު ގޮތެއް ނިންމުމަށް ކޯޓަށް ހާޒިރު ކުރުމުން ކްރިމިނަލް ކޯޓުން ވަނީ އޭނާގެ ބަންދަށް އިތުރު 15 ދުވަސް ޖަހާފަ އެވެ.

މި މައްސަލައިގެ ތުހުމަތުގައި ހައްޔަރުކުރެވުނު ފަރާތަކީ ފ. ފިޔަބަރިގެ، ހަސަން އިސާމް (30 އަހަރު) އެވެ. އޭނާ ހައްޔަރުކުރެވުނީ އިއްޔެ ހަވީރު 17:20 ގައި ކަމަށް ފުލުހުން މަޢުލޫމާތު ދީފައިވެއެވެ. މީގެ އިތުރުން، އޭނާ ދުއްވި ސައިކަލު ވެސް ފުލުހުން ވަނީ ހިފަހައްޓާފައެވެ.

އިއްޔެ ބޭއްވުނު ބަންދު މުއްދަތު އިތުރުކުރުމުގެ އަޑުއެހުމުގައި، ހަސަން އިސާމް ވަނީ ކުށަށް އިޢުތިރާފުވެފައެވެ. އޭނާ ބުނި ގޮތުގައި، ރަން ފަށް ފޭރުނު ނަމަވެސް މިހާރު އެ ފަށް އޭނާގެ އަތުގައި ނެތެވެ. އަދި ގެއްލުން ލިބުނު ފަރާތަށް ބަދަލު ދިނުމަށް ތައްޔާރަށް ހުރި ކަމަށްވެސް އޭނާ ވަނީ ބުނެފައެވެ.

ކްރިމިނަލް ކޯޓުން ހަސަން އިސާމްގެ ބަންދު މުއްދަތު އިތުރުކުރި ސަބަބެއްގެ ގޮތުގައި ފާހަގަކޮށްފައިވަނީ، އޭނާ ދޫކޮށްލައިފިނަމަ މުޖުތަމަޢުގެ ސަލާމަތަށް ނުރައްކަލެއް ކުރިމަތިވެދާނެ ކަމަށް ފެންނާތީއެވެ. އަދި އޭނާއަކީ ގިނަ އަދަދެއްގެ ކުށުގެ ރެކޯޑު އޮތް މީހެއްކަންވެސް ފާހަގަކުރެވިފައިވެއެވެ.

މި ހާދިސާގެ ވީޑިއޯ މީސްމީޑިއާގައި ދައުރުވަމުންދާއިރު، އެ ވީޑިއޯގައި ފެންނަނީ ސައިކަލެއްގައި ދުއްވަމުންދިޔަ އަންހެނެއްގެ ފަހަތުން އައި ފިރިހެނަކު، އެ އަންހެން މީހާގެ ކަރުގައި އޮތް ފަށް ފޭރިގަތް މަންޒަރެވެ. އަދި އޭނާ އަމިއްލަ ސައިކަލު ދޫކޮށްލާފައި އަންހެން މީހާގެ ދަބަސް ޖަހައިގަންނަން އުޅޭ މަންޒަރުވެސް ފެނެއެވެ. ނަމަވެސް، އެ އަންހެން މީހާ ވަނީ އޭނާގެ ސައިކަލު ދޫކޮށްލާފައި ގޮސްފައެވެ. އަދި ފަށް ފޭރުނު ފިރިހެނާ ވަނީ އޭނާ ދުއްވަން އައި ސައިކަލަށް އަރައި ފިލައިގެން ގޮސްފައެވެ.

ފުލުހުން މި މައްސަލަ ދަނީ ތަޙްޤީޤުކުރަމުންނެވެ.

ވައްކަމާއި ފޭރުން ދިވެހި ފުލުހުންގެ ޚިދުމަތް