ކުރެވެމުންދާ ތުހުމަތުތަކަށް އިންކާރު ކުރާ ކަމަށާއި މަގާމުން އިސްތިއުފާ ދިނީ މިހާރު ކުރިއަށްދާ ތަހުގީގަށް ފުރުސަތު ދިނުމުގެ ގޮތުންކަމަށް ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) ގެ އެމްޑީކަމުން އިސްތިއުފާދެއްވި އިބްރާހިމް ފަޒުލް ރަޝީދު ވިދާޅުވެއްޖެ އެވެ.
ފަޒުލް މިހެން ވިދާޅުވެފައިވަނީ އޭނާ ރައީސުލްޖުމްހޫރިއްޔާ ޑރ. މުހައްމަދު މުއިއްޒަށް މިއަދު ފޮނުއްވި އިސްތިއުފާގެ ސިޓީގަ އެވެ.
ރައީސް މުއިއްޒަށް ފަޒުލް ފޮނުއްވި ސިޓީގައި ވަނީ އެޗްޑީސީގެ އެމްޑީގެ މަގާމުގައި އޭނާ ހޭދަ ކުރި މުއްދަތުގައި އޭނާއާ މެދު އެކި ގޮތްގޮތުން ކޮށްފައިވާ އަދި މިހާރު ކުރެވެމުންދާ ތުހުމަތުތަކަށް އިންކާރު ކުރައްވާފަ އެވެ. އަދި މަގާމަށް އައްޔަން ކުރެވުނު ފަހުން އެޗްޑީސީގެ ފަރާތުން މިހާތަނަށް ކޮށްފައިވާ އެންމެހާ މުއާމަލާތްތަކަކީ އެޗްޑީސީގެ ބޯޑުގެ ނިންމުންތަކާއި އެޗްޑީސީގައި ހެދިފައިވާ ޕޮލިސީތަކުގެ އިމުގެ ތެރެއިން އެޗްޑީސީގެ މަސްލަހަތު އިސްކޮށްގެން ކޮށްފައިވާ މުއާމަލާތްތަކެއްކަމަށް ފަޒުލް ވަނީ ވިދާޅުވެފަ އެވެ.
މީގެ އިތުރުން ބިންވެރިޔާ ސްކީމާ ގުޅިގެން އެޗްޑީސީއަށް އަމާޒުވެފައިވާ ތުހުމަތުތަކަކީ އެޗްޑީސީއާ އެއްވެސް ގުޅުމެއް ހުރި ކަންތައްތަކެއް ނޫންކަމަށް ފަޒުލްގެ ސިޓީގައި ވިދާޅުވެފައިވެ އެވެ. އަދި އެ ތުހުމަތުގެ ހަގީގަތް ވީ އެންމެ އަވަހަކަށް ރައްޔިތުންނަށް ހާމަވުމަކީ އޭނާ އެދޭ ގޮތްކަމަށް ފަޒުލް ވިދާޅުވި އެވެ.
އަދި މިކަމުގެ ސަބަބުން ކުންފުންޏާއި ސަރުކާރުގެ ސިޔާސަތުތައް ހުއްޓިފައި އޮންނާކަށް އަޅުގަނޑު ނޭދެމެވެ.
މަގާމުން އިސްތިއުފާ ދެއްވާ ސަބަބެއްކަމަށް ފަޒުލް ވިދާޅުވެފައިވަނީ ބިންވެރިޔާ ސްކީމާ ގުޅިގެން މިހާރު ކުރިއަށްދާ ތަހުގީގަށް ފުރުސަތު ދިނުމަށާއި އެޗްޑީސީއާއި ސަރުކާރުގެ ސިޔާސަތުތައް ނުހުއްޓި ކުރިއަށް ގެންދިއުމަށް ފުރުސަތު ދިނުމުގެ ގޮތުން ކަމަށެވެ.
މި ސިޓީގައި ފަޒުލް ވަނީ ރައީސް މުއިއްޒަށާއި ސަރުކާރަށް ކާމިޔާބު ދުވަސްތަކަކަށް އެދޭކަމަށްވެސް ވިދާޅުވެފަ އެވެ.
ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) ހައުސިން ޑިވެލޮޕްމެންޓް ކޯޕަރޭޝަންގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދު ރައީސުލްޖުމްހޫރިއްޔާ ޑރ. މުހައްމަދު މުއިއްޒު ބިންވެރިޔާ ސްކީމް
