ތައިލެންޑުގައި ހުންނަވާ ދިވެހި ސަފީރުކަމުގެ މަގާމަށް އިލެކްޝަންސް ކޮމިޝަން (އީސީ)ގެ ކުރީގެ ރައީސް ފުއާދު ތައުފީގް ހަމަޖެއްސުމަށް ރައްޔިތުންގެ މަޖިލީހުން ރުހުން ދީފި އެވެ.
ތައިލެންޑަށް ދިވެހިރާއްޖެއިން ކަނޑައަޅުއްވާފައި ހުންނަވާ ސަފީރު ކަމަށް ފުއާދު ހަމަޖެއްސެވުމަށްޓަކައި މަޖިލީހަށް ފޮނުވާފައިވަނީ ނޮވެމްބަރު 25 ވަނަ ދުވަހު އެވެ.
ހާރިޖީ ގުޅުންތަކުގެ ކޮމިޓީން މި މައްސަލަ ދިރާސާ ކުރުމަށްފަހު ނިންމާފައިވަނީ ފުއާދަށް ރުހުން ދިނުމަށެވެ.
މަޖިލީހުގެ މިއަދުގެ ޖަލްސާގައި ތައިލެންޑުގައި ހުންނަވާ ދިވެހި ސަފީރުކަމުގެ މަގާމަށް ފުއާދު އައްޔަނު ކުރުމަށް ރުހުން ދީފައިވަނީ ވޯޓުގައި ބައިވެރިވި 58 މެންބަރުންގެ އިއްތިފާގުންނެވެ.
ފުއާދު ވަނީ އިލެކްޝަންސް ކޮމިޝަންގައި ދެ ދައުރު ފުރިހަމަ ކުރައްވާފަ އެވެ.
