ކުޑަކުދިންގެ ޒާތީ މައުލޫމާތު ސޯޝަލް މީޑިއާގައި ހިއްސާ ނުކުރުމަށް ސޯޝަލް އެންޑް ފެމިލީ ޑިވެލޮޕްމެންޓް މިނިސްޓްރީން އިލްތިމާސްކޮށްފި އެވެ.
ސޯޝަލް މިނިސްޓްރީން މިއަދު އެކްސްގައި ކުރި ޕޯސްޓެއްގައި ބުނެފައިވަނީ، ކުޑަކުދިންގެ ކަރާމާތަށް އުނިކަން އަންނަ ގޮތަކަށް އެކުދިންގެ ޒާތީ މައުލޫމާތު ސޯޝަލް މީޑިއާގައި ހިއްސާނުކުރުމަށް އިލްތިމާސް ކުރާ ކަމަށެވެ.
ކުޑަކުދިންގެ ހައްގުތައް ރައްކާތެރިކުރުމުގެ ގާނޫނުގައި ކުށުގެ ތުހުމަތުގައިވާ ކުދިންނާއި، ކުށުގެ ޝިކާރައަކަށްވާ ކުދިންނާއި، އަދި އެހެނިހެން ސަބަބުތަކަށްޓަކައި އަޅާލުމާއި ރައްކާތެރިކަން ބޭނުންވާ ކުދިންގެ ނަން، އެޑްރެސް، އަދި ތައުލީމު ހާސިލުކުރާ ތަނުގެ ނަން ފަދަ ޒާތީ މައުލޫމާތު މީޑިއާގައި ނުވަތަ އެނޫން ވެސް ވަސީލަތެއްގައި ޝާއިރު ނުކުރުމަށްވެސް މިނިސްޓްރީން ބުނެފައިވެ އެވެ.
މީގެ އިތުރުން، އެކުދިންގެ ތަސްވީރު، އަދި ސީދާ ގޮތުން ނުވަތަ ނުސީދާ ގޮތުން ނަމަވެސް ކުއްޖާއަކީ ކާކުކަން ދެނެގަނެވޭނެ މައުލޫމާތެއް ހިއްސާނުކުރުމަށް ވެސް އެ ގާނޫނުގައި ބަޔާންކޮށްފައިވާ ކަމަށް އެ މިނިސްޓްރީއިން ފާހަގަކޮށްފައިވެ އެވެ.
މިނިސްޓްރީއިން އިތުރަށް ބުނެފައިވަނީ، ކުޑަކުދިންގެ މައުލޫމާތު ސޯޝަލް މީޑިއާގައި ހިއްސާކުރުމުގެ ސަބަބުން އެކުދިންނަކީ ކާކުކަން އާންމުންނަށް އެނގޭ ހިސާބުން ނަފްސާނީ ގޮތުން އިތުރު ގެއްލުން ލިބި، ކުދިންގެ ކަރާމާތައް އުނިކަން ލިބިގެންދާ ކަމަށެވެ. މިއީ ވުޒާރާއިން ނުހަނު ކަންބޮޑުވާ ކަމެއް ކަމަށެވެ.
އެހެންކަމުން، ކުދިންގެ ކަރާމާތައް އުނިކަން ލިބިގެންދާނެ އެއްވެސް ކަމެއް ވިޔަ ނުދިނުމަށްޓަކައި އެ ކުދިންގެ ޒާތީ މައުލޫމާތާއި އެފަދަ ފޮޓޯތައް މީޑިއާގައި ދައުރުނުކުރުމަށް ވުޒާރާއިން އިލްތިމާސްކޮށްފައިވެ އެވެ.
އަދި ކުޑަ ކުއްޖަކަށް އެއްވެސް ބާވަތެއްގެ އަނިޔާއެއް ލިބޭކަން އެނގޭނަމަ، ވުޒާރާގެ ޗައިލްޑް ހެލްޕްލައިން 1412 އަށް ގުޅާ، ލަސްނުކޮށް އެކަން ރިޕޯޓުކުރުމަށް ވުޒާރާއިން އާންމުންނަށް ގޮވާލާފައިވެ އެވެ.
