ހަށިގަނޑުގެ ބޭރުން ނެގޭ ސާމްޕަލެއް ނުވަތަ ހަށިގަނޑުގެ ތެރެއިން ނެގޭ ސާމްޕަލެއް ނެގުމަށް، ހައްޔަރު ނުކޮށް ހުރި ނުވަތަ ބަންދުގައި ނެތް މީހެއްގެ މައްޗަށް ކޯޓު އަމުރެއް ނުނެރެވޭނެ ކަމަށް ސުޕްރީމް ކޯޓުން އިއްޔެ ނިންމައިފި އެވެ.
ސުޕްރީމް ކޯޓުން މިގޮތައް ނިންމާފައި ވަނީ، ކަސްޓަމްސްގައި ކުރިން ވަޒީފާ އަދާކުރި މުއާޒް އަލީގެ މައްޗަށް ތުހުމަތު ކުރެވުނު ކޮރަޕްޝަންގެ މައްސަލައެއްގެ ތަހްގީގަށް އޭނާގެ ފޮޓޯ އާއި އޯޑިއޯ ސާމްޕަލް ނަގަން ކްރިމިނަލް ކޯޓުން ކުރި އަމުރެއް ސުޕްރީމް ކޯޓުގައި އިސްތިއުނާފު ކުރުމުންނެވެ.
މުއާޒް ވަނީ، އޭނާގެ ފޮޓޯ އާއި އޯޑިއޯ ސާމްޕަލް ދޭން ދެކޮޅު ހެދީ އަމިއްލަ ނަފްސާއި ދެކޮޅަށް ބަޔާނެއް ނުދިނުމުގެ ހައްގުގެ ދަށުން އެފަދަ ސާމްޕަލެއް ދޭން ދެކޮޅު ހެދިދާނެ ކަމަށް ބުނެފަ އެވެ.
ސުޕްރީމް ކޯޓުގެ ހުކުމުގައި ބުނެފައި ވަނީ، ކޯޓު އަމުރެއްގެ ދަށުން މީހެއްގެ ސާމްޕަލް ނަގާނަމަ އެމީހަކީ އެމައްސަލައަކާއި ގުޅުން ހުރި އިތުރު ހެކިތަކާއިއެކު ތުހުމަތެއް އުފެދި، ފުލުހުންގެ ބަންދުގައި ހުރި މީހަކަށް ވާން ޖެހޭނެކަން ޖިނާއީ އިޖުރާއަތުގެ ގާނޫނުން ސާފުކޮށް އެނގެން އޮތް ކަަމަށެވެ.
ކަސްޓަމްސް ކްރިމިނަލް ކޯޓު ދިވެހި ފުލުހުންގެ ޚިދުމަތް ސުޕްރީމް ކޯޓު
