ކީރިތި ރަސޫލާގެ ހަތަރު ހަލީފާއިންގެ ސުންނަތަށް ތަބާވެ، ކަޅު ފޮއި ރެއެއްގެ އަނދިރިކަންފަދަ ފިތުނަވެރި ދުނިޔޭގައި ހައްގު މަގުގައި ކެރިގެން ފައިތިލަ ސާބިތު ކުރަންޖެހޭ ކަމަށް މިއަދުގެ ހުކުރު ހުތުބާގައި ބުނެފި އެވެ.
މިއަދުގެ ހުކުރު ހުތުބާގެ މައުލޫއަކީ ”އަލްޚުލަފާއުއްރާޝިދޫންގެ ހަޔާތްޕުޅުން ދަރުސްތަކެއް“ އެވެ.
ޙުތުބާގައި ބުނެފައި ވަނީ، މާތްﷲ ކޮންމެ ނަބިއްޔަކަށްމެ އެ ބޭކަލަކަށް ތަބާވާނޭ ޞަޙާބީން ލެއްވި ކަމަށެވެ. އެހެންނަމަވެސް، މި އުންމަތަށް ކައުކުރެއްވި ނަބިއްޔާ މުހައްމަދުގެފާނުގެ އަޞްޙާބުންވެފައި ވަނީ އުންމަތް ދެކެފައިވާ ރަންމުތްތަކެއް ކަމަށެވެ.
އޭގެ ތެރެއިން ވެސް 10 ބޭކަލަކު ޚާއްޞަކުރައްވައި އެ ބޭކަލުންނަށް ސުވަރުގޭގެ އުފާވެރިކަމުގެ ޚަބަރު ދެއްވާފައިވާ ކަމަށް ޚުތުބާގައި ބުނެފައިވެ އެވެ.
އަލްޚުލަފާއުއްރާޝިދޫންއަކީ، މާތް ނަބިއްޔާގެ ޚަލީފާކަން ކުރެއްވި ހަތަރު އަޞްޙާބުބޭކަލުންކަމުގައިވާ އަބޫބަކުރުގެފާނާއި، އުމަރުގެފާނާއި، އުސްމާނުގެފާނާއި، އަލީގެފާނެވެ. މި ބޭކަލުންނަކީ ނަބިއްޔާ މުހައްމަދުގެފާނު، އެ ބޭކަލުންނަށް ތަބާވުމަށް އިރުޝާދުދެއްވައިފައިވާ ހަތަރު ބޭކަލުން ކަމަށްވެސް ހުތުބާގައި ބުނެފައިވެ އެވެ.
ހުތިުބާގައި ބުނެފައި ވަނީ، މި ބޭބޭކަލުންގެ ސުންނަތުގައި ހިފުމަށްޓަކައި އެ ބޭކަލުންގެ ހަޔާތްޕުޅަށް ނަޒަރު ހިންގައި، އެއިން ލިބޭ ފިލާވަޅުތަކުގެ އަލީގައި އަހަރެމެންގެ ދިރިއުޅުން ބިނާކުރުން ވަރަށް މުހިންމު ކަމެއް ކަމަށް ހަނދާންކޮށްދީފަ އެވެ.
